PAPAMAMA—Helpim Ol Pikinini Long Kisim ‘Savetingting na Bai God i Kisim Bek’ Ol
“Kirap long taim yu stap bebi yet, yu bin save long ol Rait Holi. Em ol inap givim yu savetingting na bai God i ken kisim bek yu.”—2 TIM. 3:15.
OL SINGSING: 141 [1], 134 [41]
1, 2. Bilong wanem sampela papamama i tingting planti taim pikinini i winim mak bilong dediket na baptais?
PLANTI tausen Baibel sumatin i dediket long Jehova na kisim baptais. Planti bilong ol em ol yangpela husat i kamap bikpela insait long tok i tru, na ol i mekim laik bilong God. (Sng. 1:1-3) Sapos yu wanpela papa o mama Kristen, ating yu laik lukim pikinini bilong yu i kisim baptais.—Skelim 3 Jon 4.
2 Tasol ating yu lukim sampela yangpela i kisim baptais na ol i no bihainim moa ol lo bilong God. Planti bilong ol i lusim tok i tru. Olsem na ating yu tingting planti, nogut pikinini bilong yu i kisim baptais na bihain em i no moa laikim tok i tru olsem pastaim. Yu no laik bai em i kamap olsem ol Kristen long kongrigesen long Efesus long taim bilong ol aposel, em ol i lusim tok i tru. Jisas i tok long ol olsem: “Yu lusim pinis pasin laikim em yu bin gat long pastaim.” (Rev. 2:4) Olsem wanem yu inap helpim pikinini long abrusim dispela hevi na “kamap strong na God bai kisim bek” em? (1 Pita 2:2) Yumi ken skelim stori bilong Timoti na dispela inap helpim yumi long bekim dispela askim.
“YU BIN SAVE LONG OL RAIT HOLI”
3. (a) Olsem wanem Timoti i kisim save long tok i tru? (b) Timoti i mekim wanem long ol samting em i lainim? (c) Wanem 3-pela samting i insait long pasin bilong kisim save?
3 Ating em long yia 47 C.E., taim aposel Pol i mekim namba 1 raun bilong em long Listra, na Timoti i kisim save long tok i tru. Ating long dispela taim Timoti em i tineja, na em i givim bel tru long mekim wok insait long kongrigesen. Tupela yia bihain, em i raun wantaim Pol long wok misineri. Inap 16 yia bihain, Pol i tokim Timoti: “Yu mas bihainim yet ol samting ol arapela i bin lainim yu long en na helpim yu long bilip long en, long wanem, yu save gut long ol manmeri i bin skulim yu long ol dispela samting ol i wanem kain manmeri. Na kirap long taim yu stap bebi yet, yu bin save long ol Rait Holi [Ol Skripsa Hibru]. Em ol inap givim yu savetingting na bai God i ken kisim bek yu long rot bilong bilip i stap insait long Krais Jisas.” (2 Tim. 3:14, 15) Pol i stori long 3-pela samting i insait long pasin bilong kisim save. Namba 1, save long ol Rait Holi. Namba 2, helpim yu long bilip long ol samting yu lainim. Namba 3, givim yu savetingting na bai God i ken kisim bek yu long rot bilong bilip long Jisas Krais.
4. Wanem tul inap helpim gut pikinini bilong yu? (Lukim piksa long kirap bilong stadi.)
4 Ol papamama i laik bai pikinini bilong ol i kliagut long ol rait holi, dispela i makim Ol Skripsa Hibru na Ol Skripsa Grik. Maski ol pikinini i liklik yet, ol inap lainim tok Baibel i mekim long ol manmeri na ol samting i bin kamap long bipo. Oganaisesen bilong Jehova i kamapim planti tul em ol papamama inap yusim bilong helpim ol pikinini. Yu inap tingim sampela tul we i stap pinis long tokples bilong yu? Tingim: Save yumi gat long ol tok bilong Baibel bai helpim yumi long strongim pasin pren bilong yumi wantaim Jehova.
“HELPIM YU LONG BILIP”
5. (a) Dispela tok “helpim yu long bilip” i makim wanem samting? (b) Timoti i mekim wanem bilong soim olsem em i bilip long gutnius?
5 Em i bikpela samting long yumi mas kisim save long tok bilong Baibel. Tasol yumi mas mekim sampela samting moa taim yumi skulim ol pikinini long tok Baibel i mekim long ol manmeri na ol samting i bin kamap long bipo. Pol i helpim Timoti “long bilip.” Long tok Grik, dispela tok “helpim yu long bilip” i makim olsem “yu save tru” o “yu bilip olsem dispela tok em i tok i tru.” Timoti i save long Ol Skripsa Hibru taim em i liklik yet. Tasol taim em i kamap bikpela em i skelim ol tok em i lainim, na dispela i helpim em long bilip olsem Jisas em i Mesaia. O yumi ken tok, save em i kisim i strongim tru bilip bilong em. Timoti i bilip strong long ol tok bilong gutnius, na dispela i kirapim em long kisim baptais na bihainim Pol long wok misineri.
6. Olsem wanem yu inap helpim pikinini long bilip long ol tok em i lainim long Baibel?
6 Olsem wanem yu inap helpim pikinini bilong yu bambai em i ken kamap strong long bilip wankain olsem Timoti? Pastaim, yu mas i gat pasin bilong i no les kwik. Yumi no inap kamap strong long bilip wantu tasol, na tu, pikinini i no inap kamap strong long bilip bikos yu bilip, nogat. Pikinini yet i mas yusim “gutpela tingting” long bilipim tok i tru bilong Baibel. (Ritim Rom 12:1.) Yupela ol papamama i mekim bikpela wok tru long helpim ol pikinini bilong yupela, moa yet taim pikinini i kamapim ol askim. Yumi bai stori long wanpela eksampel.
7, 8. (a) Olsem wanem wanpela papa i soim pasin bilong i no les kwik taim em i skulim pikinini? (b) Olsem wanem yu inap kisim pasin bilong i no les kwik?
7 Thomas em wanpela papa, na pikinini meri bilong em i gat 11 krismas. Thomas i tok: “Pikinini i save askim mi olsem, ‘Jehova i wokim ol samting long rot bilong evolusen?’ o ‘Bilong wanem yumi no save insait long wok bilong helpim komiuniti, olsem long sait bilong ileksen?’ Sampela taim mi mas skelim gut ol tok mi bai mekim na bai mi ken givim gutpela bekim. I no olsem mi mas kamapim wanpela bikpela tok bilong Baibel na nau bilip bilong pikinini i kamap strong, nogat. Pikinini i mas lainim planti samting olsem evidens na bai bilip bilong em i kamap strong.”
8 Thomas i luksave olsem bilong skulim gut pikinini, em i mas i gat pasin bilong i no les kwik. Em i bikpela samting long olgeta Kristen i mas i gat dispela pasin. (Kol. 3:12) Thomas i luksave tu olsem em i mas lusim bikpela haptaim long stori wantaim pikinini. Em i mas kamapim gut insait bilong ol tok bilong Baibel bambai pikinini i ken bilipim ol tok em i lainim. Thomas i tok: “Pikinini i mas bilip tru long ol bikpela tok bilong Baibel. Mi na meri bilong mi i laik bai pikinini bilong mipela i bilip long ol tok em i lainim na em i mas kliagut long en. Sapos em i gat sampela askim, dispela em i gutpela samting. Mi bai tingting planti sapos em i bilip tasol na em i no kamapim ol askim.”
9. Olsem wanem papamama inap putim Tok Bilong God i go daun long bel bilong pikinini?
9 Taim papamama i no les kwik long skulim ol pikinini, dispela bai helpim ol pikinini long kliagut long tok ol i bilip long en, i olsem ol i save long ‘bikpela na longpela, na antap na daunbilo’ bilong tok. (Efe. 3:18) Papamama i mas skelim krismas na save bilong ol pikinini taim ol i skulim ol. Taim ol pikinini i bilip long ol tok ol i lainim, dispela bai helpim ol long sambai long bilip bilong ol taim ol wanskul na ol narapela i sutim tok long ol. (1 Pita 3:15) Kain olsem: Yu ting pikinini bilong yu inap stori long tok Baibel i mekim long wanem samting bai painim ol man i dai pinis? Ol i kliagut long tok bilong Baibel?a Taim papamama i givim bel long skulim pikinini long Tok Bilong God, gutpela samting bai kamap long hatwok bilong ol.—Lo 6:6, 7.
10. Yu mas mekim wanem bilong strongim bilip bilong ol pikinini?
10 Ol papamama i mas stap gutpela eksampel, na dispela bai strongim bilip bilong ol pikinini. Stephanie i gat 3-pela pikinini, na em i tok: “Kirap long taim ol pikinini i liklik yet, mi save askim mi yet olsem, ‘Mi save tokim ol pikinini long risen na mi bilip olsem Jehova i stap tru, na em i gat pasin laikim na stretpela pasin? Ol pikinini i luksave olsem mi laikim tru Jehova?’ Sapos mi laik bai ol pikinini i gat strongpela bilip, orait mi mas strongim bilip bilong mi yet.”
‘GIVIM YU SAVETINGTING NA BAI GOD I KISIM BEK YU’
11, 12. (a) Dispela tok savetingting i makim wanem samting? (b) Maski man i gat bikpela krismas, bilong wanem dispela i no makim olsem em i gat savetingting?
11 Olsem yumi skelim pinis, Timoti i save gut long ol tok bilong Rait Holi, na em i bilipim ol dispela tok. Tasol bilong wanem Pol i tok olsem ol tok bilong rait holi inap helpim Timoti long kisim “savetingting na bai God i ken kisim bek” em?
12 Volium 2 bilong buk Insight on the Scriptures i stori olsem savetingting i makim “pasin bilong bihainim gutpela tingting long stretim ol hevi, abrusim ol hevi, winim sampela mak, o givim tok kaunsel bilong helpim ol narapela. Man i no gat savetingting, em i no inap mekim ol dispela samting.” Baibel i tok: “Ol pikinini i save mekim olkain longlong pasin.” (Snd. 22:15) Olsem na man i bikpela pinis, em i save bihainim savetingting. Tasol man i bikpela pinis long sait bilong bilip, em bai pret na redi long bihainim ol tok bilong Jehova, maski em i gat bikpela krismas o em i yangpela yet.—Ritim Song 111:10.
13. Olsem wanem yangpela inap soim olsem em i gat savetingting na bai God i ken kisim bek em?
13 Ol yangpela husat i kamap strong long bilip, ol i no larim laik bilong ol yet na ol wanlain i “pulim ol nabaut olsem biksi na win i sakim nabaut ol samting.” (Efe. 4:14) Ol i wok long “skelim ol samting na long dispela rot ol i lainim gut tingting bilong ol long kliagut long wanem samting i stret na wanem samting i no stret.” (Hib. 5:14) Ol i soim olsem ol i kamap man i bikpela pinis taim ol i mekim ol gutpela disisen—maski papamama o ol manmeri i bikpela pinis i no stap wantaim ol. (Fili. 2:12) Taim yumi bihainim savetingting, God bai kisim bek yumi. (Ritim Sindaun 24:14.) Olsem wanem yu inap helpim ol pikinini long kisim savetingting? Pastaim, yu mas tokim pikinini long ol gutpela pasin em Baibel i stori long en. Taim yu stap gutpela piksa long toktok na pasin bilong yu, pikinini bai luksave olsem yu wok strong long bihainim ol gutpela pasin em Tok Bilong God i as bilong en.—Rom 2:21-23.
Bilong wanem em i bikpela samting long ol papamama i mas wok yet long helpim ol pikinini? (Lukim paragraf 14-18)
14, 15. (a) Wanpela yangpela husat i laik kisim baptais i mas skelim wanem ol askim? (b) Olsem wanem yu inap helpim ol pikinini long tingim ol blesing ol inap kisim taim ol i bihainim ol lo bilong God?
14 Taim papamama i tokim ol pikinini long wanem samting i stret na wanem samting i no stret, ol i mas mekim sampela samting moa. Ol i mas kirapim ol pikinini long tingim ol kain askim olsem: ‘Bilong wanem Baibel i tambuim ol pasin we bel i kirapim yumi long mekim? Wanem samting i ken strongim mi long bilip olsem ol lo bilong Baibel inap helpim mi?’—Ais. 48:17, 18.
15 Sapos wanpela pikinini i laik kisim baptais, orait papamama i mas helpim em long skelim gut tingting em i gat long pasin bilong i stap olsem wanpela Kristen. Em inap kisim wanem ol blesing? Em i mas lusim wanem ol samting? Olsem wanem ol blesing em i kisim i winim tru ol samting em i bin lusim? (Mak 10:29, 30) Em i bikpela samting long pikinini i mas tingim ol dispela askim paslain long em i kisim baptais. Taim ol papamama i helpim ol pikinini long tingim ol blesing ol inap kisim taim ol i stap gut long God, na hevi ol inap bungim sapos ol i sakim tok bilong God, orait dispela bai helpim ol long bilip olsem oltaim ol lo bilong Baibel i mas stiaim ol.—Lo 30:19, 20.
TAIM HEVI I BUNGIM YANGPELA KRISTEN
16. Ol papamama i mas tingim wanem ol samting taim pikinini husat i baptais pinis i laik lusim bilip?
16 Olsem wanem sapos pikinini i baptais pinis, tasol em i holim tupela tingting long tok bilong Baibel? Kain olsem: Ating yangpela Kristen i larim ol samting bilong graun i pulim tingting bilong em, o em i holim tupela tingting long ol stiatok bilong Baibel. (Sng. 73:1-3, 12, 13) Ol papamama i mas was gut long tok ol i mekim bilong helpim pikinini taim em i bungim ol hevi. Pasin bilong papamama na tok ol i mekim inap kirapim pikinini long stap strong long bilip o lusim bilip. Papamama i no ken tok pait wantaim pikinini long taim hevi i painim em, maski em i liklik yet o em i stap tineja yet. Ol i mas helpim pikinini bambai em inap winim ol hevi em i karim.
17, 18. Sapos yangpela i gat tupela tingting long tok i tru, olsem wanem papamama inap helpim em long stap gut long bilip?
17 Taim pikinini i kisim baptais, dispela i soim olsem em i dediket pinis long Jehova. Taim man i dediket long God, em i tok promis long laikim God na putim laik bilong Em i stap namba 1 samting long laip bilong em. (Ritim Mak 12:30.) Jehova i save tingim ol tok promis olsem bikpela samting tru. Olsem na yumi mas wok strong long truim ol tok promis bilong yumi. (Sav. 5:4, 5) Bihainim gutpela pasin na long taim stret, toktok wantaim pikinini bilong yu long tingim olsem promis em i mekim long God em i bikpela samting. Paslain long yu mekim olsem, yu ken yusim ol tul em oganaisesen bilong Jehova i redim bilong helpim yu long toktok wantaim ol pikinini. Dispela bai opim rot long yu inap tokim pikinini long ol blesing em bai kisim olsem wanpela Kristen i dediket long Jehova na i kisim baptais, na risen na em i bikpela samting long em i mas truim dediket bilong em.
18 Ol papamama inap kisim gutpela helpim long apendiks i gat het tok “Questions Parents Ask,” long ol laspela pes bilong buk Questions Young People Ask—Answers That Work, Volium 1. Em i tok: “No ken hariap long kisim kain tingting olsem pikinini bilong yu i no inap bihainim bilip bilong yu. Planti taim, i gat risen na pikinini i gat tupela tingting long bilip bilong papamama.” Sampela yangpela inap putim presa long em. Ating em i stap wanpis o em i pilim olsem ol narapela yangpela i winim em long mekim gutpela wok insait long kongrigesen. Dispela apendiks i tok moa olsem: “I no olsem dispela yangpela i no bilip long ol tok em i lainim. Planti samting inap kamap na dispela i putim hevi long ol yangpela long holimpas bilip bilong ol.” Bihain apendiks i stori moa long sampela samting em ol papamama inap mekim bilong helpim ol pikinini husat i laik lusim bilip.
19. Olsem wanem ol papamama inap helpim ol pikinini long kisim “savetingting na bai God i ken kisim bek” ol?
19 Ol papamama i gat bikpela wok long mekim bikpela long ol pikinini “na trenim ol olsem Jehova i makim, na putim tingting bilong em long bel bilong ol.” (Efe. 6:4) Olsem yumi stori pinis, yumi mas skulim ol pikinini long tok bilong Baibel na helpim ol long bilip tru long ol tok ol i lainim. Dispela inap kirapim ol long dediket long Jehova na givim bel olgeta long mekim wok bilong em. Tok Bilong Jehova, holi spirit, na ol gutpela wok bilong papamama inap helpim ol pikinini long kisim “savetingting na bai God i ken kisim bek” ol.
a Ol stadi atikol bilong “Tru Tru Baibel i Tok Wanem?” long tok Inglis em ol gutpela tul bilong helpim ol yangpela na ol manmeri i bikpela pinis long kliagut long tok i tru bilong Baibel na bai ol i ken skulim ol narapela. Yu inap painim long jw.org long planti tokples. Lukim BIBLE TEACHINGS > BIBLE STUDY TOOLS.