Yu Ting Baibel Inap Helpim Yumi Long Nau?

SAMPELA MAN I TOK NOGAT. Wanpela dokta i tok, sapos ol man i skulim ol narapela long bihainim tok bilong Baibel, i olsem ol i yusim olpela teks buk bilong 1920 long skulim ol sumatin bilong saiens. Man i luk daun long Baibel inap askim yu: Sapos yu laik yusim kompiuta bilong nau, yu ting yu bai kisim edvais long buklet i stori long rot bilong stretim kompiuta bilong bipo? Sampela man i tingim Baibel olsem olpela buk em ol tok bilong en i ekspaia pinis.

Long nau, save bilong teknoloji i pulap tru, olsem na ol man i no laik kisim edvais long buk bilong bipo. Planti Web-sait i kamapim ol nupela edvais. Oltaim ol program long TV na redio i save intaviuim ol saveman. Ol stua i salim planti buk i kamapim ol skultok na ol i kisim planti bilion mani.

Ol man inap kisim ol nupela save, olsem na ol i no laik skelim Baibel, em buk ol i raitim olsem 2,000 yia i go pinis. Ol i tok sapos yumi bihainim tok bilong Baibel, i olsem yumi bihainim olpela saiens buk o olpela buklet bilong stretim kompiuta. Dispela tingting i no stret. Save bilong saiens na teknoloji i senis hariap hariap, tasol yu ting dispela i senisim laip bilong ol man? Ol man i pilim olsem laip i no gat mining, na ol i laik save long rot bilong i stap amamas, pas gut wantaim famili, na stap pren bilong ol narapela.

Baibel em olpela buk, tasol em inap helpim tru yumi. Baibel i tok God i bin stiaim ol man long raitim ol tok bilong en, na ol dispela tok inap stiaim na redim yumi long karim hevi. (2 Timoti 3:16, 17) Ol tok bilong en i gat strong we i no inap long pinis—edvais bilong en i no inap tru long ekspaia! Baibel yet i tok: “Tok bilong God i gat laip.”—Hibru 4:12.

Yu ting ol dispela tok bilong Baibel em i tru? Yu ting ol i ekspaia pinis, o ol i stret olgeta na i gat strong long helpim yumi—ol tok bilong en i stap laip yet? Mipela i wokim ol spesel edisen bilong Wastaua, na dispela em namba 1 bilong ol dispela edisen na em bai bekim ol dispela askim.