‘Larim Mi Skulim Yupela Bai Yupela i Kisim Gutpela Tingting na Save’

1. (a) Yumi ken mekim wanem bilong kisim savetingting? (b) Olsem wanem savetingting inap helpim yumi?

JEHOVA em i As bilong gutpela tingting na save, na em i save givim savetingting bilong em long ol narapela. Jems 1:5 i tok: “Sapos wanpela bilong yupela i sot long savetingting, orait em i mas wok long askim God, na God bai givim long em. Long wanem, God i save amamas long givim planti samting long ol man na em i no save krosim ol.” Yumi inap kisim savetingting bilong God taim yumi larim em i stretim yumi. Savetingting bilong God inap helpim yumi long sakim ol pasin nogut na lukautim yumi long sait bilong bilip. (Snd. 2:10-12) Long dispela rot, yumi “stap insait yet long pasin laikim bilong God” na “kisim laip oltaim.”—Jut 21.

2. Olsem wanem yumi inap kisim pasin bilong amamas taim God i stretim yumi?

² Yumi no save amamas o holim stretpela tingting taim ol narapela i stretim yumi, long wanem, yumi gat sin, yumi bilong narapela narapela sindaun, na i gat ol narapela risen. Maski i olsem, yumi inap amamas long kisim ol tok bilong stretim yumi taim yumi luksave long olsem wanem ol dispela tok i helpim yumi, na dispela i kamapim klia pasin laikim bilong God. Sindaun 3:11, 12 i tok: “Pikinini, sapos Bikpela i mekim wanpela samting long yu bilong stretim yu, yu no ken kros na bel nogut. Long wanem, Bikpela i save stretim ol man em i laikim tumas.” Yumi mas save olsem Jehova i tingim yumi na em i laik bai yumi stap gut. (Ritim Hibru 12:5-11.) God i save gut tru long yumi, olsem na em i save stretim yumi inap stret long skel bilong yumi. Yumi ken skelim 4-pela samting i insait long pasin bilong stretim man: (1) pasin bilong bosim bel, (2) pasin bilong papamama long stretim pikinini, (3) pasin bilong ol elda long stretim wanpela insait long kongrigesen, na (4) hevi yumi kisim taim yumi sakim tok bilong stretim yumi.

PASIN BILONG BOSIM BEL I KAMAPIM SAVETINGTING

3. Olsem wanem pikinini inap kisim pasin bilong bosim bel? Stori long dispela.

³ Taim yumi bosim bel, dispela i makim olsem yumi bosim pasin na tingting bilong yumi. Yumi no bon wantaim pasin bilong bosim bel, olsem na yumi mas lain long kisim dispela pasin. Tingim dispela tok piksa: Taim pikinini i lain long ronim baisikol, pastaim papamama i mas holim baisikol bambai pikinini i no ken pundaun. Taim pikinini i save liklik long ronim baisikol, orait nau papamama bai larim em yet i stiaim baisikol. Tasol taim em i laik pundaun, ol bai holim gen baisikol. Taim pikinini i lain gut pinis na em i no moa pundaun, papamama i no gat wok moa long holim baisikol. Olsem tasol, sapos oltaim papamama i no les kwik long skulim ol pikinini na “trenim ol olsem Jehova i makim, na putim tingting bilong em long bel bilong ol,” ol i helpim pikinini long kisim savetingting na pasin bilong bosim bel.—Efe. 6:4.

4, 5. (a) Bilong wanem pasin bilong bosim bel i insait long “nupela pasin”? (b) Bilong wanem yumi no ken givap maski yumi “pundaun planti taim”?

⁴ Tok piksa bilong pikinini i ronim baisikol i stret tu long ol manmeri husat i bikpela pinis na ol i kisim save long Jehova. Ating ol i kisim pinis pasin bilong bosim bel. Tasol long sait bilong bilip, ol i stap yet olsem liklik pikinini. Isi isi ol inap kamap olsem man i bikpela pinis long bilip taim ol i lain long kisim “nupela pasin” olsem bilong Krais. (Efe. 4:23, 24) Pasin bilong bosim bel bai helpim em long mekim olsem. Dispela pasin i skulim yumi long “givim baksait long olgeta samting i no stret wantaim laik bilong God na long givim baksait long olgeta laik nogut bilong dispela graun. Na tu, dispela pasin i skulim yumi long bihainim gutpela tingting na stretpela pasin na pasin bilong givim bel tru long God nau long dispela taim.”—Tai. 2:12.

⁵ Yumi olgeta i gat sin. (Sav. 7:20) Tasol dispela i no makim olsem yumi no gutpela o yumi no inap bosim bel, nogat. Sindaun 24:16 i tok: “Maski sapos stretpela man i save pundaun planti taim, oltaim em bai i kirap gen.” Wanem samting bai helpim yumi long mekim olsem? Yumi no inap mekim long strong bilong yumi yet, nogat, holi spirit bilong God i save strongim yumi. (Ritim Filipai 4:13.) Pasin bilong bosim bel em wanpela pasin bilong holi spirit. Dispela pasin i makim tu pasin bilong skulim yumi yet long bihainim gutpela pasin na holim stretpela tingting.

6. Olsem wanem yumi inap kisim pasin bilong stadi gut long Tok Bilong God? (Lukim piksa long kirap bilong stadi.)

⁶ Taim yumi mekim Baibel stadi, tingim tingim ol tok yumi ritim na beten na kamapim tingting bilong yumi, dispela tu bai helpim yumi long kisim pasin bilong bosim bel. Tasol olsem wanem sapos yu pilim hatwok long stadi long Tok Bilong God? Ating yu pilim olsem yu no inap mekim gut pesenel stadi. Yu mas tingim olsem Jehova bai helpim yu sapos yu larim em i helpim yu. Em inap helpim yu long “lain long laikim tumas” tok bilong Baibel. (1 Pita 2:2) Pastaim, yu mas beten long Jehova na askim em long helpim yu long bosim bel taim yu stadi long Baibel. Bihain yu mas mekim ol samting i stret wantaim beten bilong yu, ating yu inap mekim pesenel stadi inap sotpela haptaim. Taim yu wok long mekim olsem, isi isi yu bai amamas long mekim pesenel stadi na em bai kamap olsem pasin bilong yu! Yu bai amamas long haptaim yu lusim bilong mekim stadi na tingim tingim ol bikpela tok bilong Jehova.—1 Timoti 4:15.

7. Olsem wanem pasin bilong bosim bel inap helpim yumi long winim ol mak long sait bilong bilip?

⁷ Pasin bilong bosim bel inap helpim yumi long winim ol mak long sait bilong bilip. Tingim eksampel bilong wanpela papa husat i pilim olsem em i wok long kamap slek long bilip. Em i bel hevi long dispela samting, olsem na em i putim mak long kamap painia oltaim na em i save ritim ol atikol long ol magasin bilong yumi we i stori long olsem wanem yumi inap kamap strong long bilip. Na tu, pasin bilong beten i helpim em. Em i stretim rot bambai em inap mekim wok painia haptaim. Wanem gutpela samting i kamap? Maski ol hevi i painim em, em i wok strong yet long winim ol mak em i putim bilong kamap painia oltaim, bihain em i winim dispela mak.

BIHAINIM PASIN BILONG JEHOVA LONG STRETIM PIKININI

8-10. Wanem samting inap helpim ol papamama long skulim ol pikinini long mekim laik bilong Jehova? Stori long dispela.

⁸ Ol papamama Kristen i gat gutpela blesing tru long “trenim ol [pikinini] olsem Jehova i makim, na putim tingting bilong em long bel bilong ol.” (Efe. 6:4) Dispela wok i gat hatwok bilong en, na moa yet long dispela haptaim yumi stap long en. (2 Tim. 3:1-5) Ol pikinini i no bon wantaim save bilong bihainim pasin i stret na pasin i no stret. Ol i gat maus bilong bel, tasol ol i mas skulim na stretim maus bilong bel. (Rom 2:14, 15) Wanpela dikseneri bilong Baibel i stori olsem, tok Grik ol i tanim olsem “stretim” inap makim pasin bilong skulim na stiaim pikinini long kamap gutpela man o meri.

⁹ Ol pikinini em papamama i stretim ol, planti bilong ol i pilim olsem ol i stap gut. Ol pikinini i stap fri long makim ol samting ol i laik mekim, tasol ol i mas bihainim sampela lo. Ol disisen na pasin ol i mekim inap kamapim gutpela samting o putim hevi long ol. Olsem na em i bikpela samting long ol papamama Kristen i mas larim Jehova i stiaim ol long stretim pikinini. Tingim olsem tingting na pasin bilong ol man i no wankain, wan wan kalsa i gat pasin bilong ol yet, na tu, pasin bilong ol lain long nau i no wankain olsem ol lain long bipo. Taim papamama i bihainim tok bilong God na i no save bilong ol yet, ol bai bihainim stretpela pasin long mekim bikpela long ol pikinini.

¹⁰ Yumi ken tingim eksampel bilong Noa. Taim Jehova i tokim Noa long wokim sip, Noa i no bilip long save bilong em yet. Em i no bin wokim wanpela sip long bipo. Olsem na em i larim Jehova i helpim em, na em i mekim “olgeta samting olsem God i tokim em.” (Stt. 6:22) Wanem gutpela samting i kamap? Noa i wokim gut dispela sip na em i seivim famili bilong em. Na tu, em i mekim gut wok bilong em olsem het bilong famili bikos em i bilip long savetingting bilong God. Noa i skulim gut ol pikinini bilong em na em i stap gutpela eksampel long ol, em wanpela wok i hatwok tru long mekim paslain long Bikpela Tait.—Stt. 6:5.

11. Bilong wanem ol papamama i mas stap gutpela eksampel taim ol i skulim ol pikinini?

¹¹ Olsem wanem ol papamama inap mekim “olgeta samting olsem God i tokim” ol? Ol i mas bihainim tok bilong Jehova, na larim em i skulim ol long rot bilong Baibel, na ol gutpela skultok ol i kisim long oganaisesen bilong God bambai ol i ken mekim bikpela long ol pikinini. Taim ol papamama i mekim olsem, ol pikinini bai amamas na tok tenkyu long ol! Wanpela brata i gat 21 krismas i tok: “Mi amamas tru long gutpela pasin papamama i bihainim bilong mekim bikpela long mi. Ol i wok strong long putim ol tok i go daun long bel bilong mi. Mi winim ol mak long sait bilong bilip bikos papamama i skulim mi gut.” Ol papamama i givim bel long skulim gut ol pikinini, tasol sampela pikinini i lusim Jehova. Maski i olsem, papamama husat i wok strong long putim tok i tru long bel bilong ol pikinini, maus bilong bel i no kotim ol. Na tu, ol i bilip olsem bihain pikinini i lusim tok i tru bai kam bek long Jehova.

12, 13. (a) Sapos pikinini i raus, olsem wanem papamama inap soim olsem ol i bihainim tok bilong God? (b) Olsem wanem wanpela famili i kisim blesing taim papamama i bihainim tok bilong Jehova?

¹² Wanpela bikpela traim i save painim ol papamama, em taim pikinini i raus long kongrigesen na ol i no ken bung o toktok wantaim pikinini. Tingim stori bilong wanpela mama em pikinini meri bilong em i raus na em i lusim haus. Mama i tok: “Mi ritim ol pablikesen bilong yumi bambai mi inap painim ol eskius long bung wantaim pikinini meri na tumbuna pikinini bilong mi.” Em i tok moa: “Tasol long gutpela pasin, man bilong mi i helpim mi long tingim olsem God i stretim pikinini meri, olsem na mitupela i no ken bung wantaim em.”

¹³ Sampela yia bihain, kongrigesen i kisim em bek. Mama i tok: “Nau pikinini i save ring na salim teks mesis long mi klostu olgeta de! Em i rispektim mi na man bilong mi bikos em i save olsem mitupela i bihainim tok bilong God. Mipela i pas gut wantaim.” Sapos pikinini bilong yu i raus, yu mas “bilip strong long Bikpela. Yu no ken ting save bilong yu yet inap helpim yu.” (Snd. 3:5, 6) Tingim, pasin bilong Jehova long stretim yumi i soim bikpela pasin laikim na savetingting bilong em. God i salim Pikinini bilong em i kam bilong baim bek yumi olgeta, dispela i makim tu pikinini bilong yu. God i no laik bai wanpela man i lus, nogat. (Ritim 2 Pita 3:9.) Olsem na yumi mas bilip long pasin bilong Jehova long stretim na stiaim yumi. Ol papamama i mas mekim olgeta samting Jehova i tokim ol long mekim, maski i hatwok long mekim olsem. Ol i mas sapotim pasin bilong God long stretim pikinini.

INSAIT LONG KONGRIGESEN

14. Yumi kisim wanem helpim taim yumi bihainim ol tok Jehova i givim long yumi long rot bilong “gutpela bosboi”?

¹⁴ Jehova i tok promis long tingim, lukautim, na skulim kongrigesen Kristen. Em i mekim olsem long narapela narapela rot. Kain olsem, em i makim Pikinini bilong em long stap olsem het bilong kongrigesen, na Pikinini i makim “gutpela bosboi” long givim kaikai bilong strongim bilip bilong yumi long taim stret. (Luk 12:42) Ol i redim planti gutpela kaikai bilong skulim na stretim yumi. Askim yu yet, ‘I gat wanpela tok o atikol long ol pablikesen bilong yumi we i helpim mi long senisim tingting na pasin bilong mi?’ Sapos dispela samting i kamap long yu, orait yu ken amamas! Larim Jehova i stretim stretim yu, na dispela bai helpim yu.—Snd. 2:1-5.

15, 16. (a) Olsem wanem yumi inap kisim helpim long “ol man olsem ol presen” insait long kongrigesen? (b) Yumi inap mekim wanem bambai ol elda i amamas long wok ol i mekim?

¹⁵ Krais i givim “ol man olsem ol presen” bilong helpim kongrigesen. Em i makim ol elda long stap olsem wasman bilong lain sipsip bilong God. (Efe. 4:8, 11-13) Olsem wanem yumi inap kisim helpim long ol elda? Wanpela rot em yumi ken bihainim gutpela eksampel bilong ol na pasin bilong ol long bilip. Narapela rot em long bihainim ol tok kaunsel bilong Baibel ol i givim bilong stretim yumi. (Ritim Hibru 13:7, 17.) Tingim, ol elda i laikim yumi na ol i laik bai yumi kamap strong long bilip. Kain olsem, sapos ol i luksave olsem yumi no wok long kam long ol miting o yumi no givim bel moa long autim tok, kwiktaim ol bai helpim yumi long kamap strong gen long bilip. Ol bai putim gut yau long yumi, mekim ol gutpela tok bilong strongim yumi, na ol bai yusim ol tok bilong Baibel we i stret long hevi yumi karim. Olsem wanem? Yu luksave olsem helpim yu kisim long ol elda i soim pasin laikim bilong Jehova?

¹⁶ Sampela taim ol elda inap pilim hatwok taim ol i stretim yumi. Kain olsem, taim profet Natan i go lukim King Devit husat i traim long haitim bikpela rong em i mekim, ating profet Natan i pilim hatwok taim em i laik stretim em Devit! (2 Sml. 12:1-14) Pita em wanpela bilong 12-pela aposel na em i laikim ol lain Juda tasol, olsem na aposel Pol i strongim bel na em i stretim Pita. (Gal. 2:11-14) Yu inap mekim wanem bambai ol elda i no pilim hatwok taim ol i givim ol tok bilong stretim yu? Yu mas bihainim pasin daun, stap olsem man o meri em ol narapela inap toktok wantaim, na kamapim pasin bilong tok tenkyu. Yu mas luksave olsem helpim yu kisim long ol elda i soim pasin laikim bilong God. Yu bai stap amamas, na ol elda tu bai amamas long wok ol i mekim.

17. Wanpela sista i kisim wanem helpim long pasin laikim bilong ol elda?

¹⁷ Wanpela sista i tingim ol samting i kamap long em long pastaim na em i pilim olsem i hatwok long laikim Jehova. Em i tok: “Mi tingim ol samting i kamap long bipo na ol narapela samting tu na dispela i daunim mi tru, olsem na mi luksave olsem mi mas toktok wantaim ol elda. Ol i no kros o sutim tok long mi, nogat, ol i strongim mi. Bihain long olgeta miting, maski ol i bisi tru, wanpela elda bai kam na toktok wantaim mi na askim mi sapos mi orait. Mi tingim ol pasin mi mekim long bipo, na dispela i mekim na mi pilim olsem God i no inap long laikim mi. Maski i olsem, long rot bilong kongrigesen na ol elda, oltaim Jehova i soim olsem em i laikim mi. Mi beten long God i helpim mi bai mi no ken lusim em.”

HEVI YUMI KISIM TAIM YUMI SAKIM TOK BILONG STRETIM YUMI

18, 19. Wanem samting inap kamap taim yumi sakim tok bilong stretim yumi? Stori long dispela.

¹⁸ Yumi no save amamas taim wanpela i stretim yumi. Tasol sapos yumi sakim tok, yumi bai bungim bikpela hevi. (Hib. 12:11) Tingim eksampel bilong Kein na King Sedekaia. Taim Kein i wok long bel nogut long Abel na em i laik kilim Abel, God i tokim Kein: “Watpo yu kros? Na watpo pes bilong yu i senis olgeta? Sapos yu mekim gutpela pasin, orait bai yu amamas, long wanem, mi orait long ofa bilong yu. Tasol sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.” (Stt. 4:6, 7) Kein i no bihainim tok bilong God, olsem na sin i winim em. Kein i sakim tok na em i karim planti hevi! (Stt. 4:11, 12) Sapos em i harim tok bilong Jehova, God inap isi long em.

¹⁹ King Sedekaia em man nogut na em i no gat strongpela bel. Taim em i mekim wok king long Jerusalem, ol man i insait tru long mekim ol pasin nogut. Inap planti taim, profet Jeremaia i tokim Sedekaia long lusim ol pasin nogut, tasol Sedekaia i no laik kisim tok bilong stretim em. Olsem na bikpela hevi i painim em. (Jer. 52:8-11) Jehova i laik stretim yumi bambai yumi inap abrusim ol hevi!—Ritim Aisaia 48:17, 18.

20. Wanem samting bai painim ol lain i amamas long God i stretim ol, na ol lain i sakim tok bilong stretim ol?

²⁰ Long olgeta hap bilong graun, ol man i no laik bai narapela i stretim ol, na ol i no laik bosim bel. Ol man i sakim tok bilong stretim ol, ol bai karim pen na hevi. (Snd. 1:24-31) Olsem na yumi mas ‘larim God i skulim yumi, na bai yumi kisim gutpela tingting na save.’ Sindaun 4:13 i tok, “oltaim yu mas holimpas dispela gutpela tok bilong mi. Em i olsem as bilong laip bilong yu, olsem na yu mas lukautim gut.”