Stap Rabis Long Kirap—Kisim Planti Blesing Long Pinis

TAIM mi stap long skul, i no gat planti senis. Yu bai kirap skul wantaim seim lain i go inap long yu pinisim skul. Yu bai save long nem bilong planti man long taun, na ol bai save long nem bilong yu.

Liberty em wanpela taun i gat planti liklik fam, na olgeta man i save planim kon. Taim mi bon, papa bilong mi i save mekim wok bilong wanpela fama long dispela hap. Taim mi tineja, mi lain long draivim trakta na lainim ol narapela wok bilong fam.

Mi no bin lukim wanpela man i kamap papa taim em i yangpela yet. Papa i gat 56 krismas na Mama i gat 35 krismas taim mi bon. Papa i no gat bikpela skin, tasol em i gat gutpela helt na em man bilong wok, na tu, em i skulim mipela long pasin bilong wok. Em i no save kisim planti mani, tasol em i lukautim mipela long sait bilong haus, klos, na kaikai, na oltaim em i save mekim ol samting bilong lukautim mipela. Papa i dai taim em i gat 93 krismas, na Mama i dai taim em i gat 86 krismas. Tupela i no lotuim Jehova. Wanpela liklik brata bilong mi i mekim wok olsem elda taim ol i kirap makim ol elda long 1972 samting.

TAIM MI YANGPELA YET

Mama bilong mi i save tingim tru lotu. Olgeta Sande em i save bringim mipela i go long haus lotu bilong ol Baptis. Taim mi gat 12 krismas, mi harim dispela tok God Triwan. Mi askim Mama: “Hau na Jisas i stap olsem Pikinini na Papa?” Mi inap tingim bekim bilong em: “Pikinini, yumi no inap save long bekim. Em i no samting bilong yumi long save long en.” Tru tru, em samting mi hatwok long kliagut long en. Maski i olsem, taim mi gat 14 krismas samting, mi kisim baptais long wanpela liklik wara long taun—ol i putim mi i go insait long wara inap 3-pela taim bilong makim bilip bilong God Triwan!

Taim mi stap long haiskul, wanpela pren bilong mi i save pilai boksen bilong winim mani, na em i kirapim mi long insait long dispela spot. Olsem na mi stat long kisim trening na putim nem long wanpela oganaisesen (Golden Gloves) bilong pilai boksen. Mi no gutpela tumas long pilai boksen, olsem na mi lusim. Bihain, ol i putim nem bilong mi long insait long ami bilong Amerika, na ol i salim mi i go long Jemani. Taim mi wok long dispela hap, ol bosman i salim mi i go long wanpela skul bilong ol ami (Noncommissioned Officers Academy) bikos ol i ting mi gat pasin olsem bilong ol lida. Ol i laik bai mi mekim wok ami long laip olgeta bilong mi. Tasol mi no laik insait long ami, olsem na taim mi pinisim 2-pela yia long wok ami, mi lusim dispela wok long 1956. I no longtaim na mi insait long wanpela lain i olsem bikpela lain ami.

STATIM NUPELA LAIP

Bipo mi save hambak na soim olsem mi strongpela man. Ol muvi na pasin bilong ol man i stiaim mi long kisim pasin bilong hambak na soim olsem mi gat bikpela strong. Long tingting bilong mi, man i autim tok em man i no gat strong. Tasol mi kisim save long sampela samting na dispela i senisim laip bilong mi. Wanpela taim mi draivim retpela kar bilong mi i go long taun, na 2-pela yangpela meri i tromoi han, olsem na mi stopim kar. Mi save long tupela—ol i liklik susa bilong man husat i maritim bikpela susa bilong mi. Dispela tupela yangpela meri em ol Witnes Bilong Jehova. Pastaim mi save kisim nius Wastaua na Kirap! long ol, tasol mi save hatwok long kliagut long ol tok bilong nius Wastaua. Tupela i invaitim mi long i go long Buk Stadi Bilong Kongrigesen, em liklik miting ol i save mekim bilong stadi long Baibel long haus bilong ol. Mi tokim ol olsem bai mi skelim sapos mi bai go o nogat. Tupela i smail na askim mi: “Yu promis?” Mi tok: “Mi promis.”

Mi rigret olsem mi mekim dispela promis, tasol mi pilim olsem mi mas truim tok bilong mi. Olsem na long dispela nait mi go long miting. Mi kirap nogut olsem ol liklik pikinini i save gut long ol tok bilong Baibel! Maski mi save go wantaim Mama long lotu long Sande, mi no save long planti tok bilong Baibel. Nau mi mekim disisen long kisim sampela save moa long Baibel, olsem na mi wanbel long wanpela i ken stadi wantaim mi. Pastaim mi kisim save olsem Jehova em nem bilong God i Gat Olgeta Strong. Planti yia paslain, mi save askim Mama long ol Witnes Bilong Jehova i husat, na em i save tok: “O, ol i save lotuim wanpela lapun man nem bilong em Jehova.” Tasol nau mi pilim olsem ai bilong mi i op!

Mi save olsem mi painim pinis tok i tru, olsem na kwiktaim mi mekim ol senis na winim ol mak. Mi kisim baptais long Mas 1957, em 9-pela mun bihain long fes miting bilong mi. Laip bilong mi i senis. Pastaim mi gat pasin bilong hambak, tasol mi amamas tru olsem mi kisim save long tok Baibel i mekim long pasin bilong i stap olsem man i gat strong. Jisas em man i gutpela olgeta na em i wanpela strongpela man. Olsem na ol man bilong hambak long strong bilong ol inap pilim olsem ol i samting nating sapos ol i lukim Jisas. Maski i olsem, em i no save pait, nogat. “Em i daunim em yet na karim pen” olsem Baibel i tok profet long en. (Ais. 53:2, 7) Mi kisim save olsem disaipel tru bilong Jisas i mas “isi long olgeta man.”—2 Tim. 2:24.

Mi kirap mekim wok painia long 1958. Tasol i no longtaim na mi mas lusim wok painia inap liklik haptaim. Bilong wanem mi mekim olsem? Mi mekim disisen long maritim Gloria, em wanpela bilong dispela tupela yangpela sista husat i bin invaitim mi long i go long buk stadi! Mi no rigret long disisen mi mekim long maritim em. Taim mi maritim Gloria, em i gat ol naispela pasin, na em i stap wankain yet long nau. Mi tingim Gloria olsem samting i dia tumas winim wanpela daimon i gat bikpela pe, na mi amamas tru olsem mi bin maritim em! Mi bai larim em i stori liklik long laip bilong em:

“Mi kamap bikpela insait long famili i gat 17 pikinini. Mama bilong mi em wanpela strongpela Witnes. Em i dai taim mi gat 14 krismas. Taim Mama i dai, Papa i kirap long stadi. Mama i no stap bilong lukautim mipela, olsem na Papa i stretim tok wantaim hetmasta long skul. Bikpela susa i stap long haiskul, olsem na Papa i askim hetmasta sapos em orait long mitupela i senis senis long go long skul long wan wan de. Long dispela rot, wanpela bilong mitupela inap stap long haus na lukautim ol liklik bratasusa, na redim kaikai paslain long Papa i pinis wok na kam long haus. Hetmasta i orait long dispela, olsem na mipela i mekim olsem i go inap long bikpela susa i grediuet long haiskul. Tupela famili Witnes i save stadi wantaim mipela, olsem na mipela 11-pela pikinini long famili i kamap ol Witnes Bilong Jehova. Mi save amamas long autim tok, maski mi gat pasin bilong sem long toktok long ol narapela. Tasol Sam i helpim mi long daunim dispela pasin insait long ol yia i kam.”

Mitupela Gloria i marit long Februeri 1959. Mipela i bin amamas tru long mekim wok painia wantaim. Long Julai 1959, mitupela i putim aplikesen bilong i go long Betel bikos mipela i laik tru long wok long hetkota. Wanpela gutpela brata em Simon Kraker, em i wok long Betel long dispela taim na em i intaviuim mitupela. Em i tokim mipela olsem Betel i no inap kisim ol bratasista husat i marit bilong mekim wok long dispela taim. Maski i olsem, mitupela i holim strong yet dispela laik bilong wok long Betel, tasol mipela i mas wet longpela taim!

Mitupela i salim pas long hetkota na tokim ol olsem mipela i redi long i go helpim wok autim tok long ol ples i sot long ol pablisa. Ol brata i bekim pas na ol i tok asainmen bilong mipela em long Pine Bluff, Arkansas. Long dispela taim, i gat 2-pela kongrigesen long Pine Bluff—wanpela kongrigesen em bilong ol waitskin bratasista, na narapela kongrigesen em bilong ol blakskin bratasista. Mipela i kisim asainmen long helpim kongrigesen bilong ol blakskin bratasista. Dispela kongrigesen i gat 14 pablisa tasol.

OL WAITSKIN NA BLAKSKIN I NO BUNG WANTAIM

Ating yu laik save long risen na ol kongrigesen bilong ol Witnes Bilong Jehova i bin orait long ol waitskin na ol blakskin bratasista i bung ol yet. Bekim em olsem, gavman i putim dispela lo na mipela i mas bihainim. Lo i tambuim ol blakskin na ol waitskin long bung wantaim, na tu, ol man i save birua na mekim nogut long ol narapela. Long planti hap, ol brata i save olsem sapos ol waitskin na blakskin bratasista i bung bilong mekim lotu, ol birua bai kam na bagarapim Haus Kingdom. Kain hevi olsem i bin kamap. Sapos ol blakskin Witnes i autim tok long haus bilong ol waitskin, polis bai arestim ol o paitim ol. Olsem na bilong helpim wok autim tok long ron gut, mipela i bihainim ol lo gavman i putim, na mipela i bilip na wet long ol samting bai kamap gutpela long bihain.

Wok autim tok bilong mipela i gat hatwok bilong en. Taim mipela i autim tok long hap bilong ol blakskin, sampela taim mipela i popaia na nok long dua bilong waitskin famili. Wantu mipela i mas skelim sapos i stret mipela i stori liklik long Baibel, o mipela i mas tok sori na lusim ol. Dispela kain hevi i bin kamap long sampela ples mipela i autim tok long en.

Mipela i mas painim wok mani bilong sapotim wok painia bilong mitupela. Planti wok mipela i mekim, mipela i kisim 3 dola long wan wan de. Gloria i save wok long klinim haus na putim gut ol samting. Long wanpela haus, ol i tok orait long mi inap helpim em bambai em i pinisim wok hariap. Long belo, ol i givim kaikai long mipela, na mitupela Gloria i save kaikai paslain long mipela i lusim haus mipela i wok long en. Long olgeta wik, Gloria i save ainim klos bilong wanpela famili. Mi save klinim banis, wasim ol windo, na mekim ol narapela liklik wok long haus. Long haus bilong wanpela waitskin famili, mitupela Gloria i save wasim ol windo—Gloria i stap insait long haus na wasim windo na mi stap long ausait. Mipela i wok long de olgeta, olsem na ol i givim mipela kaikai long belo. Gloria i stap insait long haus na kaikai, tasol em i no sindaun wantaim famili, na mi stap ausait na kaikai long hap bilong putim kar. Mi no wari long dispela samting. Ol i givim mipela gutpela kaikai. Dispela famili i gat gutpela pasin, tasol lo i stap na i hatwok long ol i bung wantaim ol blakskin. Mi tingim wanpela taim, mipela i go long petrol stesin. Mi putim petrol long kar pinis, na mi askim wokman sapos Gloria i ken yusim toilet. Dispela man i lukluk strong long mi na em i tok, “Dua i lok.”

TINGIM OL GUTPELA PASIN

Mipela i gat planti gutpela memori wantaim ol bratasista, na mipela i laikim tru wok autim tok! Fes taim mipela i go long Pine Bluff, mipela i stap wantaim wanpela brata husat i mekim wok olsem kongrigesen sevan. Meri bilong em i no Witnes, olsem na Gloria i kirap stadi long Baibel wantaim em. Dispela brata i gat wanpela pikinini meri, olsem na mi kirap stadi wantaim em na man bilong em. Bihain, meri bilong dispela brata wantaim pikinini meri i mekim disisen long mekim wok bilong Jehova, olsem na ol i kisim baptais.

Mipela i gat ol gutpela pren long kongrigesen bilong ol waitskin bratasista. Ol i save singautim mipela long i go kaikai wantaim ol long nait. Lain Ku Klux Klan (KKK) i save birua long ol blakskin na ol i save pait na mekim nogut long ol. Long dispela taim, ol i go pas long daunim ol blakskin. Wanpela nait, mi lukim wanpela man i sindaun long veranda, na em i amamas tru long werim waitpela klos na haitim pes bilong en—em bilas bilong lain Ku Klux Klan. Maski i olsem, dispela i no daunim pasin bilong ol bratasista long mekim gut long narapela. Wanpela taim, mi na Gloria i sot long mani bilong i go long kibung, olsem na wanpela brata i orait long baim kar bilong mipela. Wanpela mun bihain, mitupela Gloria i mekim ol Baibel stadi, na mitupela i taiet stret. Mipela i kam kamap long haus na kirap nogut long lukim kar bilong mipela i stap long fran bilong haus! Liklik pas i stap long windo bilong kar i rit olsem, “Mi givim bek kar olsem presen. Mi brata bilong yupela.”

Mi no inap lusim tingting long narapela gutpela pasin ol bratasista i mekim bilong helpim mipela. Long 1962, ol i singautim mi long go long Skul Bilong Wok Kingdom long South Lansing, New York. Mipela i kisim trening insait long 1-pela mun. Dispela skul i helpim ol brata i go pas long mekim ol wok long kongrigesen, ol sekit, na ol distrik. Taim mi kisim invatesen bilong i go long skul, mi no wok mani na mipela i sot long mani. Tasol wanpela telefon kampani long Pine Bluff i bin intaviuim mi long wok wantaim ol. Sapos ol i haiarim mi, mi bai fes blakskin man long wok wantaim kampani bilong ol. Ol i tokim mi olsem ol bai kisim mi long wok. Mi bai mekim wanem? Mi no gat mani bilong i go long New York. Mi tingting strong long kisim dispela wok mani na tok nogat long i go long skul. Mi redi long raitim pas na tokim ol brata olsem mi no inap i go, tasol narakain samting i kamap na mi no inap lusim tingting long en.

Wanpela sista long kongrigesen bilong mipela, man bilong em i no wanpela Witnes, em i nok long dua bilong mipela long traipela moning na givim mi wanpela envelop. Dispela envelop i pulap long mani. Em wantaim sampela pikinini bilong em i save kirap long bikmoning na ol i go rausim ol gras nogut i gro namel long ol koten. Ol i mekim olsem bilong kisim mani bilong helpim mi long i go long New York. Dispela sista i tokim mi, “Go long skul na lainim planti samting, na kam bek na skulim mipela!” Bihain, mi askim telefon kampani sapos em orait long mi kam bek 5-pela wik bihain na wok wantaim ol. Ol i tok stret long mi olsem, “Nogat!” Tasol mi no wari. Mi mekim pinis disisen bilong mi. Mi amamas tru olsem mi no kisim dispela wok!

Gloria bai stori liklik long ekspiriens bilong mipela long Pine Bluff: “Mi laikim stret teritori! Mi gat olsem 15 i go 20 Baibel stadi. Olsem na mitupela i autim tok long ol haus long moning, na bihain mekim ol Baibel stadi. Sampela taim, mipela i mekim ol stadi i go inap 11 klok long nait. Mi amamas tru long autim tok! Mi laikim tru wok painia. Mi mas tokaut olsem mi no laik bai asainmen bilong mipela i senis na mipela mekim wok sekit, tasol Jehova i save pinis long wanem wok mipela bai mekim.” Bihain, asainmen bilong mitupela i senis.

MEKIM WOK SEKIT

Taim mipela i mekim wok painia long Pine Bluff, mipela i bin putim aplikesen long kamap painia salim. Mipela i ting olsem mipela bai mekim wok olsem painia salim bikos wasman distrik i laik bai mipela i helpim wanpela kongrigesen long Texas. Em i laik bai mipela i mekim wok olsem painia salim long dispela hap. Mipela i luk fowed long mekim dispela wok. Olsem na mitupela i wet inap longpela taim, na mipela i laik tru long Sosaiti i toksave long aplikesen mipela i putim. Tasol mipela i no kisim wanpela toksave. Bihain long Janueri 1965, mipela i kisim pas bilong toksave olsem mipela bai mekim wok sekit! Long seim taim, ol i makim Brata Leon Weaver long mekim wok sekit, nau em i kodineta bilong Brens Komiti long brens ofis long Amerika.

Mi tingting planti long mekim wok wasman sekit. Wanpela yia paslain, James A. Thompson, Jr., em wanpela wasman distrik i skelim ol wok mi mekim. Long gutpela pasin, em i tokim mi long ol samting mi inap mekim bilong kamap gutpela wasman sekit. Mi mekim wok olsem wasman sekit inap liklik haptaim na mi luksave olsem tok kaunsel bilong em i helpim mi tru. Bihain long ol i makim mi long mekim wok sekit, Brata Thompson em fes wasman distrik mi bin wok wantaim. Mi lainim planti samting long dispela strongpela brata.

Long pastaim, ol wasman sekit i no save kisim planti trening. Olsem na insait long wanpela wik, mi raun wantaim wasman sekit na skelim pasin na wok bilong em taim em i visitim wanpela kongrigesen. Long narapela wik, em i raun wantaim mi na skelim ol wok mi mekim taim mi visitim narapela kongrigesen, na em i mekim ol tok bilong helpim mi. Bihain, mitupela Gloria yet i mas raun na mekim wok sekit. Mi askim Gloria, “Wai na em go hariap?” Bihain, mi luksave long wanpela bikpela samting. Oltaim ol gutpela brata i stap bilong helpim yu—tasol yu yet i mas larim ol i helpim yu. Mi tingim yet helpim mi kisim long ol brata i gat planti ekspiriens, kain olsem Brata J. R. Brown, em i mekim wok sekit long bipo, na Brata Fred Rusk em i bin wok long Betel.

Long pastaim, pasin bilong birua long ol blakskin i nogut tru. Wanpela taim, lain Ku Klux Klan i mekim protes long wanpela taun long Tennessee, na mipela i bin stap long dispela taim. Mi tingim narapela taim, mipela i autim tok pinis na mipela i go long haus kaikai. Mi go bilong yusim toilet, na mi lukim wanpela waitskin man i bihainim mi, na em i luk olsem man nogut stret. Em i gat ol tatu long bodi na em i save birua long ol blakskin. Tasol wanpela waitskin brata, em i traipela man winim mi na dispela man, em i bihainim mitupela. Dispela brata i askim mi: “Brata Herd, olgeta samting i orait?” Wantu dispela man nogut i lusim mipela na em i no yusim toilet. Inap planti yia, mi luksave olsem sin yumi kisim long Adam i mekim na ol man i save birua long narapela narapela, na i no olsem ol i birua long skin kala bilong ol. Na tu, mi kisim save olsem maski yumi gat narapela narapela skin kala, yumi stap olsem wanpela lain brata tru, na yumi redi long lusim laip bilong yumi long helpim narapela narapela.

KISIM PLANTI BLESING LONG PINIS

Mi na Gloria i mekim wok sekit inap 33 yia, na insait long ol dispela yia, mipela i mekim wok distrik inap 21 yia. Mipela i kisim planti blesing na ol gutpela ekspiriens. Tasol mipela i kisim narapela blesing. Long Ogas 1997, mipela i kisim bekim em mipela i bin wet long en inap longpela taim. Ol i singautim mipela long go long Betel long Amerika klostu 38 yia bihain long mipela i putim aplikesen. Long Septemba 1997, mitupela i kirap wok long Betel. Mi ting olsem ol brata long Betel i laik bai mi helpim ol inap sotpela haptaim.

Pastaim, mi wok long Dipatmen Bilong Wok Autim Tok. Mi lainim planti nupela samting. Ol brata long dispela dipatmen i mas bekim planti strongpela askim bilong ol elda na ol wasman sekit long Amerika. Mi amamas long pasin bilong ol brata long i no les kwik long trenim mi. Mi pilim olsem sapos ol i tokim mi long wok gen long Dipatmen Bilong Wok Autim Tok, mi bai nidim yet planti moa trening.

Mitupela Gloria i amamas long stap long Betel. Mitupela i lain pinis long kirap long bikmoning, na dispela pasin i helpim mipela long Betel. Bihain long 1-pela yia samting, mi mekim wok olsem helpim bilong Komiti Bilong Wok Autim Tok bilong Gavening Bodi Bilong Ol Witnes Bilong Jehova. Long 1999, ol i makim mi long kamap memba bilong Gavening Bodi. Mi lainim planti samting long dispela asainmen. Bikpela samting em olsem, Jisas Krais i stap het bilong kongrigesen Kristen, na i no wanpela man bilong graun.

Mi tingim bek ol samting i kamap long laip bilong mi, na sampela taim mi pilim wankain olsem profet Amos. Jehova i luksave long Amos, em man i gat pasin daun na em i wasman bilong ol sipsip. Amos i save rausim ol pikinini fik long diwai sikamo, em kaikai ol i save givim long ol tarangu lain. Maski i olsem, God i makim Amos long kamap profet, em blesing em i kisim long sait bilong wok lotu. (Amo. 7:14, 15) Olsem tasol, maski mi pikinini bilong wanpela tarangu man husat i mekim wok olsem fama long Liberty, Indiana, Jehova i givim mi planti blesing na i hatwok long mi stori long olgeta dispela blesing! (Snd. 10:22) Mi stap rabis long kirap, tasol mi kisim planti blesing long pinis, em ol blesing mi no ting mi bai kisim!