“Stretpela Man Bai i Amamas Long Jehova”
DIANA em wanpela sista i winim pinis 80 krismas. Man bilong em i kisim sik alsaima na em i stap sampela yia long haus bilong lukautim ol lapun paslain long em i dai. Tupela pikinini man bilong em i dai, na em i kisim kensa long susu. Maski i olsem, taim ol bratasista i bungim em long Haus Kingdom o long wok autim tok, ol i lukim olsem em i stap amamas.
John i mekim wok olsem wasman sekit winim 43 yia. Em i laikim tru dispela wok! Tasol em i lusim wok sekit na lukautim wanfamili husat i sik. Taim ol bratasista i bungim John long ol kibung, ol i lukim olsem pasin bilong em i no senis. Em i stap amamas yet.
Wanem samting i mekim na Diana na John i stap amamas yet? Olsem wanem man inap i stap amamas maski em i sik o bel hevi? Olsem wanem man inap stap amamas yet maski em i lusim gutpela wok em i save mekim? Baibel i tok: “Stretpela man bai i amamas long Jehova.” (Sng. 64:10) Yumi tu inap i stap amamas olsem sapos yumi kliagut long rot tru bilong i stap amamas.
AMAMAS BILONG SOTPELA TAIM
Ating yu save long sampela samting we i save mekim ol man i amamas. Ating man na meri i laikim narapela narapela na ol i marit. Tupela marit i gat fes bebi. O man i kisim nupela asainmen long wok tiokratik. Ol dispela samting i save kamapim amamas bikos Jehova yet i kamapim ol dispela samting. Em yet i kamapim pasin bilong marit, kamapim pikinini, na em i givim asainmen long rot bilong kongrigesen.—Stt. 2:18, 22; Sng. 127:3; 1 Tim. 3:1.
Sampela samting i kamapim amamas, tasol dispela amamas i bilong sotpela taim. Poroman marit inap mekim pasin pamuk o em i dai. (Ese. 24:18; Hos. 3:1) Sampela pikinini i sakim tok bilong God na papamama, o ol i raus long kongrigesen. Ol pikinini man bilong Samuel i mekim ol pasin nogut na mekim tu wok bilong Jehova. Pasin nogut bilong Devit i kamapim hevi insait long famili bilong em. (1 Sml. 8:1-3; 2 Sml. 12:11) Ol dispela kain hevi i save pinisim amamas bilong ol man na mekim ol i wari na tingting planti.
Senis inap kamap na yumi lusim gutpela wok yumi mekim namel long ol manmeri bilong God. Ating yumi sik, yumi mas lukautim wanfamili, o asainmen i senis. Dispela samting i kamap long planti bratasista, na ol i misim amamas ol i bin kisim long asainmen bilong ol.
Yumi luksave olsem ol dispela samting inap kamapim amamas bilong sotpela taim tasol. Olsem na yumi laik save sapos i gat amamas we inap stap yet maski ol hevi i kamap. Ating i gat kain amamas olsem bikos Samuel, Devit, na ol narapela bilipman i stap amamas yet maski hevi i painim ol.
AMAMAS BILONG OLTAIM
Jisas i save long pasin bilong i stap amamas tru. Paslain long em i kam long graun, em i stap long heven na “olgeta taim [em i] amamas long ai bilong [Jehova].” (Prov. 8:30) Taim Jisas i stap long graun, ol bikpela hevi i painim em. Maski i olsem, em i amamas yet long mekim laik bilong Papa. (Jon 4:34) Olsem wanem long taim em i karim bikpela pen paslain long em i dai? Baibel i tok: “Em i tingim amamas em bai kisim na dispela i helpim em long sanap strong na karim hevi long diwai pos.” (Hib. 12:2) Olsem na yumi ken skelim 2-pela tok Jisas i mekim long rot bilong i stap amamas tru.
Wanpela taim 70 disaipel bilong Jisas i autim tok, na ol i wokim planti strongpela wok na rausim tu ol spirit nogut, olsem na ol i amamas tru. Jisas i tokim ol: “Yupela i no ken amamas long yupela i kisim namba long daunim ol spirit nogut, nogat. Tasol yupela i mas amamas, long wanem, God i raitim pinis nem bilong yupela long heven.” (Luk 10:1-9, 17, 20) Tru tumas, taim Jehova i orait long yumi, dispela i kamapim bikpela amamas moa winim amamas yumi kisim long asainmen bilong yumi. Em bai givim gutpela pe long ol disaipel, olsem na ol i amamas tru.
Long narapela taim, Jisas i toktok long bikpela lain manmeri. Wanpela meri Juda i tokaut olsem mama bilong nambawan tisa, Jisas, i ken amamas tru. Tasol Jisas i stretim tingting bilong dispela meri na i tok: “Nogat. Ol man i harim tok bilong God na bihainim, ol i ken amamas!” (Luk 11:27, 28) Em tru olsem papamama inap amamas long gutpela wok bilong pikinini, tasol amamas bilong ol bai bikpela moa sapos ol i bihainim tok bilong Jehova na pas gut wantaim em.
Tru tumas, taim yumi pilim olsem Jehova i orait long yumi, dispela i save mekim yumi amamas tru. Maski hevi i kamap, dispela i no inap pinisim amamas bilong yumi. Taim yumi stap gut long God na sanap strong na karim hevi, dispela i save mekim yumi i stap belgut. (Rom 5:3-5) Na tu, Jehova i save givim holi spirit long ol lain i trastim em, na holi spirit i save kamapim pasin bilong amamas. (Gal. 5:22) Buk Song 64:10 i tok: “Stretpela man bai i amamas long Jehova.”
Wanem samting i helpim John long stap amamas tru?
Dispela tok i kamapim klia risen na Diana na John inap stap amamas yet maski hevi i painim ol. Diana i tok: “Papamama i stap olsem ples hait bilong pikinini, na olsem tasol, Jehova i stap olsem ples hait bilong mi.” Hau na em i save olsem God i orait long em? Em i tok: “Mi pilim olsem em i blesim mi na oltaim mi inap smail wantaim na autim tok.” John i mekim yet wok autim tok bihain long em i lusim wok sekit, na em i stori long samting i helpim em: “Kirap long 1998 taim mi kisim asainmen bilong mekim wok tisa long Ministerial Trening Skul, mi lusim bikpela haptaim moa long mekim pesenel stadi.” Em i kamapim tingting bilong em na meri bilong em, na i tok: “Long ol yia i go pinis, mitupela i save redi long mekim olgeta kain samting long wok bilong Jehova, olsem na mipela i redi long bihainim dispela senis. Mitupela i no gat rigret.”
Planti bratasista i ekspiriensim truim bilong Buk Song 64:10. Tingim stori bilong tupela marit husat i mekim wok long Betel long Amerika winim 30 yia. Ol i kisim nupela asainmen bilong mekim wok olsem spesel painia. Tupela i tok: “Em nomol long bel hevi taim yu no inap mekim wok yu save amamas long mekim.” Tasol ol i tok: “Yu no inap stap bel hevi oltaim.” Tupela i kirap kwik long wok bung wantaim kongrigesen long autim tok. Tupela i tok: “Mipela i save beten na kolim stret sampela samting mipela i tingting long en. Taim ol samting i kamap olsem mipela i beten long en, dispela i save strongim na givim amamas long mipela. Bihain liklik long mipela i bung wantaim kongrigesen, ol narapela tu i kirap mekim wok painia, na mipela i gat 2-pela Baibel sumatin.”
“BELGUT INAP OLTAIM OLTAIM”
Yumi no inap i stap amamas long olgeta taim; sampela taim yumi inap bel hevi o wari. Tasol Jehova i kirapim Devit long raitim tok i stap long Buk Song 64:10. Maski yumi bel hevi sampela taim, yumi ken bilip tru olsem sapos yumi stap “stretpela man” na holimpas bilip na bihainim ol senis i kamap long laip bilong yumi, yumi bai “amamas long Jehova.” Na tu, yumi inap bilip na hop long lukim Jehova i truim tok promis bilong kamapim “nupela skai na nupela graun.” God bai pinisim sin. Olgeta manmeri bai “amamas na belgut inap oltaim oltaim” long ol samting God i wokim na ol samting em i givim.—Ais. 65:17, 18.
Piksaim olsem: Yu gat gutpela helt tru na bikpela strong long olgeta de. Maski bikpela hevi i painim yu na i bagarapim tru bel bilong yu, yu bai lusim tingting olgeta long en. Yumi ken bilip tru olsem yumi “no inap tingim gen ol [hevi] bilong bipo, na long bel, [yumi] no inap tingim na pilim gen.” Mirakel bilong kirap bek bai opim rot long yumi inap bungim gen ol wanfamili na ol pren em ol i dai pinis. Planti milion manmeri bai pilim wankain olsem papamama bilong liklik gel i gat 12-pela krismas em Jisas i bin kirapim em bek: “Papamama bilong em i amamas nogut tru.” (Mak 5:42) Ol “stretpela man” tasol bai i stap long graun na ol bai “amamas long Jehova” inap oltaim oltaim.