Taim Disasta i Kamap

“Pastaim mipela i pilim olsem i no gat hop. Olgeta samting mipela i gat i bagarap long graun malumalum i bruk na tait wara.”—Andrew, Siera Leon.

Bihain long strongpela win, mipela i kam bek long haus bilong mipela. No gat wanpela samting i stap. Mipela i kirap nogut. Pikinini meri bilong mi i brukim skru i go daun na krai.—David, Virgin Islands.

SAPOS yu bin abrusim bagarap long wanpela disasta, ating yu bai kliagut long filings bilong ol narapela: kirap nogut, i no laik tingim hevi, tingting i paul, wari na tingting planti, na kisim kain kain driman. Planti man i abrusim disasta i bel hevi na pilim olsem ol i no gat strong long mekim gen ol samting.

Sapos i stap bilong yu i bagarap long disasta, yu tu bai pilim olsem yu no inap karim hevi moa. Ating bai yu pilim tu olsem i no gat risen long stap laip. Tasol, Baibel i kamapim olsem i gat risen long stap laip na yu ken bilip olsem gutpela samting bai kamap bihain.

TOK I TRU BILONG BAIBEL I GIVIM HOP

Eklisiastis 7:8 i tok: “Pinis bilong wanpela samting, dispela i gutpela moa winim kirap bilong en.” Ating bai yu pilim olsem i no gat hop, taim i stap bilong yu i stat long kamap orait bihain long disasta. Tasol taim yu no les long stretim gen ol samting, ol samting bai kamap orait.

Baibel i tok long wanpela taim we “ol bai i no inap harim moa nois bilong ol man i krai o krai bilong ol man i pilim pen na hevi.” (Aisaia 65:19) Dispela bai kamap tru taim graun i kamap wanpela paradais aninit long Kingdom Bilong God. (Buk Song 37:11, 29) Disasta bai i no inap kamap gen. Ol memori bilong pen na hevi disasta i kamapim bai pinis olgeta, bikos God i Gat Olgeta Strong i bin tok promis: “Yupela i no inap tingim gen ol samting bilong bipo, na long bel, yupela i no inap tingim na pilim gen ol dispela samting.”—Aisaia 65:17.

Tingim: Krieta i stretim rot pinis long “givim gutpela sindaun long yupela em yupela i ken bilip na wet long en”—laip i gat bel isi aninit long nambawan gutpela wok bos bilong God. (Jeremaia 29:11) Taim yu kisim save long dispela tok i tru, yu ting dispela inap mekim na i gat risen long yu stap laip? Sally, em yumi bin stori long fes atikol, i tok: “Taim yu tingim ol gutpela samting Kingdom Bilong God bai mekim long bihain, dispela bai helpim yu long no ken tingim ol samting i bin painim yu na yu inap karim ol hevi bilong nau.”

I gutpela yu kisim sampela save moa long samting Kingdom Bilong God bai mekim long helpim ol man. Taim yu mekim olsem maski yu karim hevi bilong disasta, i gat risen long yu stap laip long nau na wetim wanpela taim bai kamap we i no gat disasta. Tasol long nau, Baibel i kamapim ol gutpela tok we inap helpim yu long karim hevi bihain long disasta. Skelim sampela eksampel.

Ol Baibel Ves we Inap Helpim Yu

Kisim gutpela malolo.

“I gutpela moa long kisim liklik malolo winim pasin bilong wok hat tumas na ron i go bilong holimpasim win.”—Eklisiastis 4:6.

Ol saveman i tok, bihain long yu bungim wanpela bikpela hevi, sapos yu “no slip gut . . . dispela inap mekim na yu pret moa yet na i hatwok long tingting na bel bilong yu i stap isi.” Olsem na, em i savetingting long kisim gutpela malolo.

Kamapim tingting bilong yu.

“Wari i stap long bel bilong man i save daunim bel bilong em [o, “mekim em i bel hevi,” futnot], tasol gutpela tok i save amamasim bel bilong em.”—Provep 12:25.

Kamapim tingting bilong yu long wanpela long famili o pren yu trastim. Dispela wan famili o gutpela pren bai putim yau long yu, na tu, em bai kamapim ol tok bilong strongim yu na givim helpim long yu.a

Tingim ol gutpela samting bai kamap bihain.

“God i promis pinis long wokim nupela skai na nupela graun, na stretpela pasin tasol bai i stap long en. Em dispela samting tasol yumi wetim.”—2 Pita 3:13.

a Man husat i bel hevi o tingting planti inap longpela taim, em i mas lukim dokta na kisim marasin samting.