LAIP STORI
Jehova i Givim Ol Blesing i Winim Tru Ol Samting Mi Inap Tingim
MI GAT tupela tingting, ‘I stret long mi mekim wok painia. Tasol tru tru wok painia bai i gat amamas long en, o nogat?’ Mi laikim tru wok bilong mi long Jemani. Mi stap maneja long wok bilong salim kaikai i go long ol ples long Afrika, olsem Dar es Salaam, Elisabethville, na Asmara. Mi no bin ting olsem planti yia bihain, mi bai mekim wok bilong Jehova long ol dispela ples na planti narapela ples long Afrika!
Taim mi holim wanpela tingting tasol na mi kirap mekim wok painia, rot i op long mi inap mekim planti gutpela wok mi no bin ting mi bai mekim. (Efe. 3:20) Tasol ating yu laik save long olsem wanem dispela samting i kamap. Mi laik stori nau long laip bilong mi.
Mi bon long 1939 long Berlin, Jemani. Em sampela mun tasol bihain long Wol Woa 2 i kirap. Klostu long woa i pinis long 1945, ol balus bilong ol ami i bomim planti hap bilong taun Berlin. Wanpela taim, bom i pundaun stret long strit bilong mipela, olsem na mi na famili bilong mi i ranawe i go long painim ples hait. Bihain, mipela i go stap long Erfurt, em asples bilong Mama.
Wantaim papamama na susa long Jemani, klostu long yia 1950
Mama i laik save long tok i tru. Em i ritim ol buk bilong ol saveman, na skelim kain kain lotu, tasol em i no painim tok i tru. Long 1948, tupela Witnes Bilong Jehova i kam kamap long haus bilong mipela. Mama i tokim ol i kam insait long haus na em i givim planti askim long ol. Insait long 1-pela aua, em i tokim mi na liklik susa bilong mi olsem, “Mi painim pinis tok i tru!” Bihain liklik, mi, liklik susa, na Mama, mipela i go long ol miting long Erfurt.
Long 1950, mipela i go bek long Berlin, na mipela i bung wantaim Berlin-Kreuzberg Kongrigesen. Bihain, mipela i muv i go long narapela hap insait long Berlin yet, na mipela i go long Berlin-Tempelhof Kongrigesen. Mama i kisim baptais, tasol mi surik long mekim olsem. Bilong wanem?
DAUNIM PASIN BILONG PRET NA SURIK
Mi surik long mekim wok bilong God bikos mi gat pasin bilong sem. Mi poromanim ol narapela taim ol i go autim tok, tasol inap 2-pela yia olgeta mi yet i no autim tok. Tasol mi senisim pasin taim mi bung wantaim ol bratasista husat i bin strongim bel na stap gut long Jehova. Sampela bilong ol i bin stap long ol banis kalabus nogut bilong lain Natsi o long hap bilong Is Jemani. Sampela i bin daunim laik bilong ol yet na ol i bringim litresa i go long Is Jemani taim gavman i tambuim wok bilong yumi. Eksampel bilong ol i kirapim tru tingting bilong mi. Mi pilim olsem ol dispela bratasista i bin daunim tru laik bilong ol yet bikos ol i laikim tru Jehova na ol wanbilip, olsem na mi tu mas wok strong long daunim pasin bilong sem.
Mi stat long daunim pasin bilong sem taim mi insait long spesel kempein bilong wok autim tok long 1955. Long wanpela pas i kamap long nius Informant,a Brata Nathan Knorr i tokaut olsem dispela kempein i bikpela moa winim olgeta narapela kempein bilong autim tok. Em i tok sapos olgeta pablisa i sapotim dispela wok, “dispela mun bai winim tru olgeta narapela mun long sait bilong wok autim tok.” Dispela tok i tru olgeta! Bihain liklik, mi dediket long Jehova, na long 1956, mi kisim baptais wantaim Papa na susa bilong mi. Tasol i no longtaim mi mas mekim narapela bikpela disisen.
Mi save olsem wok painia em stretpela wok mi mas mekim, tasol planti yia i lus na mi no kirap kwik long mekim dispela wok. Pastaim, mi stap long Berlin na mekim wok aprentis (wok na kisim trening long seim taim) long bisnis bilong baim na salim ol samting i go long ol bisnis i stap long ol narapela kantri. Bihain, mi yet i laik mekim dispela wok na kisim sampela moa save na ekspiriens. Olsem na long 1961, mi kisim wok long Hamburg, em bikpela taun long Jemani. Mi laikim moa yet wok bisnis, olsem na mi surikim taim bilong insait long fultaim sevis. Bai mi mekim wanem?
Mi amamas tru olsem Jehova i yusim ol brata long helpim mi long luksave olsem em i bikpela samting moa long mi mekim wok bilong em. Sampela pren i kirap pinis long mekim wok painia, na ol i stap gutpela eksampel. Na tu, Brata Erich Mundt, em wanpela brata husat i bin stap long banis kalabus nogut, em i kirapim mi long trastim Jehova. Em i tok sampela brata long banis kalabus nogut i bin bilip long strong bilong ol yet, olsem na ol i kamap slek long bilip. Tasol ol brata husat i trastim tru Jehova, ol i stap gut long God na ol inap mekim wok bilong strongim kongrigesen.
Mi kirap mekim wok painia, 1963
Brata Martin Poetzinger i kamap memba bilong Gavening Bodi, na em i save tokim ol brata olsem, “Pasin bilong strongim bel em nambawan gutpela pasin yupela i mas i gat!” Mi tingim tingim dispela tok, na mi lusim wok mani na kirap mekim wok painia long Jun 1963. Dispela em nambawan gutpela disisen mi mekim! Tupela mun bihain, paslain long mi painim nupela wok mani, ol i invaitim mi long mekim wok olsem spesel painia. Sampela yia bihain, Jehova i givim mi blesing mi no bin ekspektim. Ol i invaitim mi long i go long namba 44 klas bilong Skul Gileat.
KISIM GUTPELA SKUL LONG GILEAT
Mi kisim wanpela gutpela skul long tok bilong Brata Nathan Knorr na Lyman Swingle. Tupela i tok, “No ken givap kwik long asainmen bilong yu.” Ol i kirapim mipela long stap gut long asainmen bilong mipela maski i gat hatwok. Brata Knorr i tok: “Yu bai tingim wanem samting? Yu bai tingim ples i doti, ol binatang, na hevi bilong i stap rabis? O yu bai lukim ol diwai, ol plaua, na smail bilong ol manmeri? Lain long laikim ol manmeri!” Wanpela taim Brata Swingle i aiwara taim em i stori long ol samting i mekim na sampela brata i givap kwik long asainmen bilong ol. Em i stop long toktok bambai bel bilong em i ken stap isi, na em i kirapim gen tok. Mi pilim tru dispela tok na mi tingting strong long mi no ken mekim Krais na ol brata bilong em i bel hevi.—Mat. 25:40.
Mi, Claude, na Heinrich long misineri asainmen long Lubumbashi, Kongo, 1967
Taim mipela i kisim ol asainmen, sampela Betelait i askim sampela bilong mipela long mipela bai go we. Ol i mekim gutpela tok long ples em ol narapela bai go long en. Tasol taim mi tok: “Kongo (Kinshasa),” ol i tok: “Yu bai go long Kongo? Jehova i ken stap wantaim yu!” Long dispela taim bipo, bikpela hevi tru i kamap long Kongo; ol man i pait na kilim narapela narapela. Tasol mi tingim ol skul mi bin kisim. Bihain tasol long gretiuesen bilong mipela long Septemba 1967, mi na Heinrich Dehnbostel, na Claude Lindsay i go long Kinshasa, em biktaun bilong Kongo.
GUTPELA TRENING BILONG OL MISINERI
Taim mipela i go kamap long Kinshasa, mipela i stadi long tok Frans inap 3-pela mun. Bihain mipela i kisim balus i go long Lubumbashi, olpela nem bilong en Elisabethville, klostu long boda bilong Sambia long hap saut bilong Kongo. Mipela i go stap long haus misineri namel long taun.
Ol manmeri long planti hap bilong Lubumbashi i no bin harim yet tok i tru, olsem na mipela i amamas tru olsem mipela i fes lain bilong autim tok i tru long ol dispela manmeri. I no longtaim, mipela i gat planti Baibel stadi tru. Na tu, mipela i autim tok long ol polisman na ol narapela wokman bilong gavman. Planti manmeri i rispektim Tok Bilong God na wok autim tok bilong mipela. Bikpela tokples bilong ol manmeri em tok Swahili, olsem na mitupela Claude Lindsay i lainim dispela tokples. I no longtaim, mitupela i kisim asainmen bilong bung wantaim kongrigesen bilong tok Swahili.
Mipela i amamas long planti gutpela ekspiriens, tasol sampela hevi i painim mipela. Taim mipela i bungim ol polisman na ol soldia husat i spak na holim gan, ol i save sutim ol tok giaman long mipela. Wanpela taim, mipela i mekim miting long haus misineri na ol polisman i holim gan na kam insait na kisim mipela i go long polis stesin, na larim mipela i sindaun long graun i go inap long 10 klok nait na ol i larim mipela i go fri.
Long 1969, mi kisim asainmen bilong mekim wok olsem wasman raun. Mi raun long bus, wokabaut namel long kunai gras, na rot i pulap long graun malumalum. Long wanpela ples, wanpela mama kakaruk wantaim ol pikinini kakaruk i slip aninit long bet bilong mi long nait. Mi no inap lusim tingting long kakaruk i save singaut na dispela i save kirapim mi long olgeta moning paslain long tulait i bruk. Mi laikim tru haptaim mi lusim long bung wantaim ol bratasista na long nait mipela i save sindaun arere long paia na stori long ol tok i tru bilong Baibel.
Wanpela bikpela hevi tru em samting i kamap taim sampela pablisa i stap olsem ol giaman Witnes na ol i sapotim lain Kitawala.b Sampela bilong ol i mekim ol bikpela wok insait long kongrigesen, na ol i stap olsem “ol traipela ston i hait” insait long wara. (Jut 12) Tasol ol gutpela bratasista i tokaut long ol dispela giaman Witnes. Isi isi, Jehova i klinim kongrigesen na stretim rot bilong planti moa manmeri long kam insait long tok i tru.
Long 1971, mi kisim asainmen bilong i go wok long brens ofis long Kinshasa, na mi mekim kain kain wok, olsem wok bilong raitim na salim pas, putim oda bilong litresa, na lukautim sait bilong wok autim tok. Long Betel, mi lain long oganaisim wok long bikpela kantri we i no gat rot bilong kisim gutpela sevis. Sampela taim, planti mun i save lus paslain long ol kongrigesen i kisim ol pas mipela i salim. Balus i save bringim ol pas i go, na bihain ol i putim ol pas long bot. Taim bot i go long wara, ol plaua lili i save pasim rot, olsem na sampela wik i save lus paslain long ol i katim na rausim ol plaua bambai bot inap pinisim ron bilong en. Maski i gat ol kain hevi olsem, dispela i no pasim wok long i go het.
Mi pilim tru pasin bilong ol brata long stretim wei bilong mekim ol bikpela kibung maski mipela i no gat mani bilong baim olgeta samting. Ol i mekim haus bilong ol anis i kamap olsem ples sindaun, na yusim kunai gras long wokim ol banis, na rolim sampela kunai na mekim i kamap olsem matres bilong sindaun. Ol i yusim mambu long sanapim ol haus win, na yusim stik pitpit long wokim ol rup na ol tebol. Ol i katim na sapim skin bilong diwai na yusim olsem nil. Mi laikim tru savetingting bilong ol dispela bratasista na pasin bilong ol long wok hat. Ol i stap olsem lewa tru bilong mi. Mi misim ol tru taim asainmen bilong mi i senis!
MEKIM WOK LONG KENYA
Long 1974, mi go wok long brens ofis long Nairobi, Kenya. Brens ofis long Kenya i mekim bikpela wok bikos ol i sapotim wok autim tok i kamap long 10-pela arapela kantri i stap klostu, na gavman i tambuim wok bilong yumi long sampela bilong ol dispela kantri. Planti taim ol i salim mi go visitim ol dispela kantri, na moa yet Itiopia. Long dispela kantri, ol birua i mekim nogut tru long ol bratasista na ol i karim planti bikpela hevi. Ol birua i kilim i dai sampela bratasista, kalabusim planti bilong ol, na mekim nogut long ol. Tasol ol bratasista i sanap strong na karim hevi bikos ol i pas gut wantaim Jehova na narapela narapela.
Long 1980, laip bilong mi i senis taim mi maritim Gail Matheson. Gail i bilong Kanada, na mitupela i bin stap wanklas long Gileat. Mitupela i save raitim pas long narapela narapela. Gail i mekim wok misineri long Bolivia. Bihain long 12-pela yia, mitupela i bung gen long New York. Bihain liklik, mitupela i marit long Kenya. Mi laikim tru pasin bilong Gail long tingim tru laik bilong God na em i wanbel tasol long olgeta samting long laip bilong mipela. Em i stap yet olsem gutpela poroman tru i save helpim mi.
Long 1986, mitupela Gail i kisim asainmen bilong visitim ol sekit, na long seim taim mi stap olsem wanpela memba bilong Brens Komiti. Long dispela asainmen, mipela i mas visitim planti kantri i stap aninit long lukaut bilong Kenya brens.
Mekim tok long kibung long Asmara, 1992
Mi tingim yet wanpela taim mipela i wok long redim ol samting bilong kibung bai kamap long Asmara (em Eritrea) long 1992. Long dispela taim, gavman i no tambuim yet wok bilong mipela long dispela hap. Mipela bai yusim wanpela olpela haus long mekim kibung. Dispela haus i luk orait long ausait, tasol olgeta samting insait long en i bagarap olgeta. Long de bilong kibung, mi kirap nogut long lukim ol bratasista i senisim dispela haus na mekim i kamap gutpela ples bilong lotuim Jehova. Planti famili i bringim ol naispela laplap i kam na karamapim olgeta samting insait long haus we i bagarap na i luk nogut olgeta. Inap 1,279 manmeri i kam long dispela naispela kibung na mipela i amamas tru long program bilong en.
Wanpela hatwok long asainmen bilong mipela em olsem, mipela i stap long kain kain hap long olgeta wik. Wanpela taim mipela i stap long wanpela bikpela haus klostu long solwara; narapela taim mipela i stap long wanpela liklik hap spes ol i banisim long ol kapa, na toilet i stap 100 mita longwe long ples slip. Tasol maski mipela i mekim wok long wanem hap, mipela i amamas tru long haptaim mipela i lusim long autim tok wantaim ol painia na ol pablisa. Taim mipela i kisim narapela asainmen, mipela i lusim planti gutpela pren, em ol lain mipela i laikim tumas.
KISIM OL BLESING LONG ITIOPIA
Kirap long 1987 i go long 1992, gavman i givim tok orait long wok lotu bilong yumi long sampela kantri i stap aninit long lukaut bilong Kenya brens. Dispela i opim rot bilong kirapim ol nupela brens ofis na kantri ofis. Long 1993, mipela i kisim asainmen bilong i go wok long ofis long Addis Ababa, Itiopia. Inap planti yia, ol bratasista long dispela hap i mekim wok lotu long pasin hait i go inap long gavman i givim tok orait.
Mekim wok olsem wasman raun long ol bus ples bilong Itiopia, 1996
Jehova i blesim wok i kamap long Itiopia. Planti bratasista i kirap long mekim wok painia. Kirap long 2012, long olgeta yia winim 20 pesen bilong olgeta pablisa i mekim wok painia oltaim. Na tu, ol skul tiokratik i givim trening, na ol i bin wokim moa long 120 Haus Kingdom. Long 2004, Betel famili i muv i go long nupela hap, na mipela i amamas tru olsem Haus Kibung tu i stap long dispela hap.
Insait long ol yia i go pinis, mitupela Gail i pas gut wantaim planti bratasista long Itiopia, na mipela i laikim tru ol dispela pren. Ol i gat gutpela pasin laikim, na dispela i kirapim mipela long laikim tru ol. Sampela yia i go pinis, mipela i kisim hevi long sait bilong helt, olsem na asainmen bilong mipela i senis na mipela i stap nau long brens ofis long Sentral Yurop. Brens ofis i lukautim gut mipela, tasol mipela i misim tru ol pren bilong mipela long Itiopia.
JEHOVA I MEKIM KAIKAI I KAMAP
Mipela yet i lukim olsem Jehova i bin mekim kaikai i kamap. (1 Kor. 3:6, 9) Taim mi autim tok fes taim long ol lain Ruanda husat i kam painim kopa long Kongo, i no gat pablisa long Ruanda. Long nau, namba bilong ol bratasista long dispela kantri i winim 30 tausen. Long 1967, namba bilong ol pablisa long Kongo (Kinshasa) em inap olsem 6 tausen. Long nau, namba bilong ol pablisa em inap olsem 230 tausen, na winim 1 milion manmeri i kam long Memorial long 2018. Long olgeta kantri i bin stap aninit long lukaut bilong Kenya brens, namba bilong ol pablisa i go antap tru winim 100 tausen.
Winim 50 yia i go pinis, Jehova i bin yusim narapela narapela brata long kirapim mi long insait long fultaim sevis. Long nau, mi stap yet olsem man bilong sem, tasol mi lain pinis long trastim tru Jehova. Ol samting mi lainim long Afrika i helpim mi long kisim pasin bilong no ken les kwik na amamas long ol blesing mi kisim. Mitupela Gail i laikim tru pasin bilong ol bratasista husat i save mekim gut tru long ol lain i go visitim ol, na ol i sanap strong na karim hevi, na trastim Jehova. Mi pilim tru bikpela pasin helpim bilong Jehova. Ol blesing bilong Jehova i winim tru olgeta samting mi yet inap tingting long en.—Sng. 37:4.
a Bihain ol i kolim Wok Kingdom Bilong Yumi, na nau em Kristen Laip na Wok Autim Tok—Miting Wok Buk.
b “Kitawala” i kam long wanpela tok Swahili na mining bilong en “bilong bosim, stiaim, o kontrolim.” Dispela lain i laik kirapim ol manmeri long kisim indipendens na no ken larim Beljam i bosim ol. Ol grup bilong Kitawala i kisim ol pablikesen bilong ol Witnes Bilong Jehova, stadi long en, na tilim long ol manmeri na yusim tok bilong Baibel long sapotim tingting bilong ol long sait bilong wok politik, kastam bilong ples, na pasin pamuk.