Askim

◼ Long Haus Kingdom na ples kibung, bilong wanem papamama i mas bosim gut ol pikinini na bai ol i bihainim pasin i stret? Sapos papamama i no wok long mekim olsem, ol elda i mas mekim wanem?

 Pasin ol pikinini i mekim i kamapim klia, papamama i bin skulim gut ol na long bel ol i tingim tru ol lo bilong God na ol man o nogat. (Snd 29:15) “Olgeta samting . . . i save kamap long taim bilong em yet,” olsem na i gat taim bilong ran na i gat taim bilong pilai. Tasol taim ol pikinini i stap long ol miting Kristen long Haus Kingdom o long ples kibung, i no taim bilong ran na pilai, nogat.​—⁠Sav 3:⁠1.

 Sampela yangpela i save mekim planti pairap samting na mekim pasin hambak, winim ol narapela yangpela. Sapos papamama i save gut long ol samting i stap long bel bilong pikinini, dispela bai helpim ol long save wanem pikinini ol i mas was gut moa long en. Sapos papamama i no was gut long pikinini na em i ran nabaut na bamim ol narapela, o bagarapim sampela samting bilong Haus Kingdom, o kain samting olsem, orait, ol elda o sampela narapela ol i mas toktok wantaim pikinini o kisim em i go long papa o mama bilong em na bai ol i ken stretim em. Papamama i mas amamas long ol narapela i laik helpim ol olsem, na bai pasin nogut bilong pikinini i no ken semim ol.

 Sapos ol wan wan elda i bin givim gutpela tok long papamama, tasol papamama i no wok long bosim gut pikinini, orait, sampela elda i ken bung wantaim famili long wanpela taim na ples i stret long ol na toktok wantaim ol long ol lo bilong Baibel i insait long dispela samting. Na ol i ken tokim ol, pasin bilong wokabaut stret long haus na long Haus Kingdom, em i bikpela samting.