Yu Ting Olsem Wanem Long Baibel?
1 Ol i bin wokim planti milion ol kain kain buk, tasol wanpela em i narapela kain tru. Em Baibel. Baibel i tokim yumi long ol samting i bin kamap long bipo bipo yet, long taim God i bin wokim heven na graun. Dispela buk i stap long olgeta hap bilong graun, na ol i bin wokim long 1,700 tok ples. Planti man long ol narapela narapela hap ol i kisim Baibel, winim ol narapela buk, na planti man i save kamapim sampela tok bilong en.
2 Ol manmeri long olgeta hap bilong graun ol i ting olsem wanem long tok bilong Baibel? Planti ol i no save long ol dispela tok, tasol ol man i tok ol i Kristen, ol i tingim Baibel em i Tok bilong God. Sampela man i tok, tok bilong Baibel em i stori nating tasol. Na sampela i tok Baibel i stori gut long ol samting i bin kamap bipo, tasol em i no inap helpim ol man long nau, em taim nogut bilong ol bom nuklia samting. Na planti man em ol i no Kristen, ol i tok Baibel em i tok bilong wanpela saveman bilong graun tasol. Tok bilong ol dispela man i kamapim long ples klia tingting bilong ol long Baibel.
TINGTING BILONG YUMI LONG BAIBEL
3 Yumi ting olsem wanem long Baibel? Yumi ‘no kisim olsem tok bilong man. Nogat. Yumi kisim olsem tok tru bilong God.’ (1 Te 2:13) Yumi save ol tok i stap long Baibel i kam long God, na ol dispela tok inap skelim “olgeta tingting na laik bilong bel bilong yumi.” (Hi 4:12) Na sapos yumi bihainim ol tok bilong en, bai yumi “redi long mekim olgeta kain gutpela wok.” (2 Ti 3:16, 17) Tok bilong Baibel i winim tru ol gutpela gutpela kago na mani samting. (Snd 3:13-15) Baibel i soim rot long yumi long olgeta samting yumi mas mekim, na i stiaim wokabaut bilong yumi. Yumi “laikim tru” ol tok bilong Baibel.—Sng 119:97, 105.
MEKIM GUTPELA WOK LONG EN
4 Yumi save Baibel em i tok bilong God, olsem na yumi mas mekim gutpela wok long en. (2 Ti 2:15) Yumi mas wok strong long bihainim tok bilong Baibel long olgeta wokabaut bilong yumi, na yumi mas wok long helpim ol narapela man na bai ol tu i laikim tok bilong God na larim Baibel i stiaim wokabaut bilong ol. Yumi laik mekim wok long olgeta samting bilong yumi bambai olgeta man inap kisim save long tok bilong Baibel.
5 Olsem wanem long yumi olgeta wan wan? Yumi pilim olsem yumi mas mekim gut wok long Baibel na autim stret tok bilong en? Sapos yumi gat tingting olsem, bai yumi wok strong long tilim long ol man. Tru, planti man i kisim Baibel, tasol i no planti man i save long insait bilong ol tok i stap long en. Yumi no inap kisim kwik save long ol tok bilong Baibel; narapela man i mas helpim yumi na God i mas soim rot long yumi. (Ap 8:30, 31, 35) Yumi ken tokim ol narapela man bilong wanem yumi laikim tru tok bilong Baibel na bilong wanem yumi save bihainim olgeta tok bilong en. Helpim ol long save, tok bilong Baibel i helpim yumi long bilip na wetim gutpela samting i kamap long bihain, na nau yumi gat as bilong i stap bilong yumi. Sapos yumi mekim olsem, ating rot bai op na yumi ken kamapim sampela gutpela tok i stap long Baibel bilong helpim ol man long winim ol hevi i save painim ol long olgeta de, na ating bai yumi inap kirapim sampela Baibel-stadi.
6 Long olgeta de yumi mas tok tenkyu long Jehova, long wanem em i bin givim Baibel long yumi. Yumi tok tenkyu tu long ‘gutpela wokboi,’ long wanem ol i wokim planti Baibel, na ol i wokim planti buk na magasin bilong helpim yumi long save long as bilong ol tok bilong Baibel. Na ol i wokim ol dispela buk na buklet long ol tok ples yumi inap kaunim. Ating yu kisim wankain tingting olsem man bilong raitim song long Baibel, em i tok: “Tok bilong yu i gutpela tumas. Olsem na mi save bihainim olgeta.”—Sng 119:129.
[Ol Askim]
1. (a) Olsem wanem na Baibel i narapela kain buk tru? (b) Tok bilong Stat 1:1 i stori long ol samting i bin kamap long wanem taim?
2. (a) Planti manmeri i tok wanem long Adam na Iv na Noa na Jona? (b) Planti man, em ol i no Kristen, ol i tok wanem long Baibel?
3. (a) Olsem 1 Tesalonaika 2:13 i tok, yumi ting olsem wanem long tok bilong Baibel? (b) Sapos yumi bihainim tok bilong Baibel, olsem wanem dispela samting bai helpim yumi? (c) Bilong wanem yu laikim tru Baibel?
4. (a) Taim yu kisim save olsem Baibel em i tok bilong God, dispela save i mekim wanem long yu? (b) Dispela save i kirapim yu long mekim wanem?
5. (a) Bilong wanem planti man i no save long insait bilong ol tok bilong Baibel? (b) Olsem na yu inap mekim wanem gutpela wok? (c) Filip i bin mekim wanem? (Ap 8:30, 31, 35)
6. (a) Yumi mas tenkyu long Jehova long wanem samting? (b) Dispela ‘gutpela wokboi’ em wanem lain? Yumi mas tok tenkyu long dispela lain long wanem samting? (c) Olsem wanem yumi inap kamapim bel bilong yumi, yumi laikim tru Baibel? Yu mekim wanem bilong kamapim bel bilong yu olsem yu laikim tru Baibel?