Taim Yu Yangpela Yet Yu Mas Pilim Tru Gutpela Pasin Sori Jehova i Mekim Long Yu
1 Olsem wanem? Yupela ol yangpela long kongrigesen i pilim gutpela pasin sori Jehova i mekim long yupela? Yu mekim pasin Jehova i laikim bambai yu ken kamapim klia olsem yu pilim tru gutpela sori bilong em? Bilong kamapim klia dispela samting, yu mas mekim wanem?
2 Yupela planti yangpela, yupela i gat gutpela papamama. Ol i mekim bikpela wok bilong lukautim yu long ol samting bilong skin na spirit, na bilong helpim bel na tingting bilong yu i stap gutpela. Dispela em i wanpela blesing yu kisim long Jehova. Na long rot bilong ol buk na nius oganaisesen i wokim, Jehova i givim planti gutpela tok long yu bilong helpim yu bambai yu ken karim ol hevi na kisim laip. Sapos yu bihainim gut ol dispela tok, yu inap winim ol hevi na traim i paulim planti yangpela long nau. Yu ting olsem wanem long dispela gutpela pasin sori God i mekim long yu?—1 Jo 4:8, 19.
3 Jehova i givim Baibel long yumi olgeta, maski yumi yangpela o yumi lapun. Na long rot bilong ofa bilong Pikinini bilong em, Krais Jisas, em i baim bek yumi. Dispela ofa i helpim ol yangpela i bilip, wankain olsem i helpim ol lapun i bilip. Yupela i wetim Kingdom i kam na graun i kamap paradais, na ol hevi i no ken painim yu olsem i save painim planti yangpela long nau em ol i no save long Jehova.
4 Jehova i mekim planti samting bilong helpim yu. Yu no askim em; laik bilong em yet na em i mekim. (Ro 5:8) Bel bilong yu i pilim tru dispela samting, a? Tasol yu ken mekim wanem na bai yu kamapim bel bilong yu olsem yu pilim tru gutpela pasin sori God i mekim long yu?
MEKIM WOK NA KAMAPIM BEL BILONG YU
5 Yu ken mekim sampela samting bilong strongim bilip bilong yu bambai yu bilip tru long tok i tru. Olsem: Yu ken wok long kaunim olgeta tok bilong Baibel insait long wanpela yia. Bilong mekim olsem yu mas wok strong long kaunim 4-pela o 5-pela pes long olgeta de. Na yu ken lain long mekim wok long Indeks long Wastaua bilong painim bekim bilong ol askim bilong yu. Sapos yu wok long kisim save olsem, na yu yet yu stadi gut, bai yu kamap strong long spirit. (Snd 2:2-4; 1 Ti 4:15) Yu yet yu mas kirap na redim tok bilong ol miting, na redi long bekim tok long miting. Taim yu go long miting na long kibung, raitim sampela tok yu laik tingim, na bihain yu ken toktok wantaim ol narapela long ol dispela tok. Sapos yu wok strong olsem bai yu kamapim bel bilong yu, yu pilim tru gutpela pasin sori Jehova i bin mekim long yu, na bai yu kamap strong long spirit.—2 Pi 1:5-8.
6 Na i gat sampela wok yu ken mekim bilong helpim kongrigesen. Sapos yu helpim ol lapun brata sista na ol brata sista i gat sik bai yu kamapim bel bilong yu, yu pilim tru gutpela pasin sori Jehova i bin mekim long yu. Olsem wanem? Yu tingting pinis long givim liklik mani long olgeta taim bilong baim ol samting bilong Haus Kingdom? Sapos yu kaunim tok bilong Mak 12:41-44 bai yu save, sapos man i no gat planti mani samting na em i givim liklik mani bilong helpim Haus Kingdom, God Jehova na Krais Jisas i save amamas long dispela liklik mani em i givim. Taim ol brata i tok long klinim Haus Kingdom na banis bilong en, gutpela sapos yu go mekim dispela wok. Na long ol kibung distrik na kibung sekit tu i gat sampela wok yu ken mekim.
HELPIM OL NARAPELA LONG OL SAMTING BILONG SPIRIT
7 Aposel Pol i pilim tru gutpela pasin sori Jehova i mekim long em na dispela i kirapim em long mekim bikpela wok bilong helpim ol man long ol samting bilong spirit. Maski yu yangpela yet, yu ken lain long mekim gut wok bilong autim tok, na yu ken wok long skruim sampela aua moa long mekim dispela wok. Olsem wanem? Yu makim pinis hamas aua yu laik lusim long mekim wok autim tok long olgeta wik o mun? Planti yangpela pablisa ol i bin mekim Baibel-stadi long sampela wanskul bilong ol o long narapela man. Olsem wanem long yu? Sapos yu no pret na Jehova i helpim yu, ating bai yu tu yu inap mekim. Olsem wanem? Yu baptais pinis? Orait, taim yu no gat skul, olsem long taim bilong holide, yu inap mekim wok painia haptaim na helpim ol narapela man long ol samting bilong spirit? Olsem wanem? Yu inap kirapim sampela moa long wok wantaim yu long mekim wok painia haptaim?
8 Baibel i givim strongpela tok long ol Kristen, olsem: Ol i kisim pinis marimari bilong God, orait nogut ol i no mekim wok long en, olsem “lusim nating” marimari bilong em. (2 Ko 6:1) Yu mas mekim ol wok i kamapim long ples klia olsem yu pilim tru gutpela pasin marimari God i bin mekim long yu. Taim yu yangpela yet, sapos yu tingim Bikpela Man em i bin wokim yu, orait bai yu inap kisim ol gutpela samting long sori bilong God inap long olgeta taim bihain.—Sav 12:1.
[Ol Askim]
1. I gat wanem 3-pela askim ol yangpela i mas tingim? Olsem na olgeta yangpela i laik save long wanem samting?
2. (a) Wanem wanpela gutpela blesing ol yangpela i kisim long papamama? (b) Ol yangpela i kisim wanem blesing long rot bilong oganaisesen bilong Jehova? (c) Bilong wanem yumi laikim tumas Jehova, olsem 1 Jon 4:8, 19 i tok? (d) Jehova i mekim wanem bilong helpim yu na dispela i kirapim yu long laikim tumas em?
3. I gat wanem ol narapela blesing Jehova i givim long ol yangpela na long ol lapun tu?
4. Ol yangpela i kisim planti blesing, olsem na i gat wanem askim ol i ken tingim?
5. (a) Long 1 Timoti 4:15, Baibel i givim wanem gutpela tok long ol yangpela wantaim ol lapun? (b) Olsem 2 Pita 1:5-8 i tok, wanem samting inap helpim yumi na bai yumi no i stap nating, bai yumi karim planti kaikai?
6. Olsem wanem ol yangpela i ken bihainim tok bilong Jisas long Mak 12:41-44?
7. Ol yangpela i ken mekim wanem bilong helpim ol narapela man long ol samting bilong spirit, olsem aposel Pol i bin mekim?
8. Ol yangpela i ken mekim wanem na bai ol i kamapim long ples klia olsem ol i no “lusim nating” marimari bilong God?