Tokim Ol Narapela Long “Lait Bilong Graun”
1 Long rot bilong profet Aisaia, Jehova i tok: “Ol manmeri i bin i stap long bikpela tudak, tasol nau ol i lukim bikpela lait. Ol i bin sindaun long ples tudak, tasol nau lait i kamap long ol.” (Ais. 9:2) Dispela “bikpela lait” i kamap ples klia long ol wok em Pikinini bilong God, Jisas Krais, i bin mekim. Wok autim tok bilong Jisas na ofa em i bin givim i helpim ol man i stap long tudak bilong spirit. Ol man i mas kisim dispela lait nau long dispela taim bilong tudak. Bung bilong Kaikai Bilong Bikpela i gutpela rot bilong yumi helpim ol man long tingim dispela “lait bilong graun.” (Jo. 8:12) Long las yia, planti milion man i kamapim bilip bilong ol taim ol i bung wantaim yumi na bihainim tok bilong Jisas, em i tok: “Yupela i mas mekim olsem bilong tingim mi.” (Lu. 22:19) Klostu nau yumi bai mekim Memorial, olsem na yumi ken mekim wanem bilong helpim ol man long tingim dispela lait em Jehova i mekim i kamap?—Fl. 2:15, 16.
2 Kirapim Ol Man Long Pilim Long Bel: Long mun Mas na Epril em i gutpela taim bilong tingim tingim long bel bikpela pasin laikim bilong Jehova na Jisas em tupela i bin kamapim long rot bilong givim ofa bilong baim bek ol man. (Jo. 3:16; 2 Ko. 5:14, 15) Taim yumi mekim olsem dispela bai kirapim yumi long tenkyu tru long dispela gutpela bung. Olgeta lain bilong God bai makim haptaim bilong ritim na skelim long bel ol skripsa ol i makim bilong ritim long taim bilong Memorial, olsem i stap long buklet Skelim Sampela Tok Bilong Baibel Long Olgeta De. Jehova i gat ol gutpela pasin tru na ol samting em i mekim bilong baim bek yumi i kamapim tru ol dispela pasin. Taim yumi tingim dispela samting, yumi amamas olsem em i God bilong yumi. Taim yumi tingim ol samting pe bilong baim bek yumi i mekim long yumi yet dispela i kirapim yumi long laikim God na Pikinini bilong em moa yet, na i kirapim yumi long givim bel long mekim laik bilong God.—Ga. 2:20.
3 Sapos yumi pilim tru gutpela samting Jehova i mekim bilong kisim bek yumi, dispela amamas bilong yumi long Memorial bai kalap i go long ol Baibel sumatin, ol gobek, ol wanblut, ol neiba, ol wanskul, ol wanwok, na ol narapela em yumi singautim ol i kam long dispela bung. (Lu. 6:45) Olsem na yumi mas wok strong long singautim ol i kam long dispela bung—na givim pepa bilong singautim man i kam long Memorial long ol na bai ol i ken tingim dispela bung. Planti bratasista i pilim olsem i gutpela long wokim wanpela lista bilong ol lain ol i save singautim ol i kam long Memorial, na long olgeta yia ol i save raitim long lista nem bilong ol nupela lain ol i laik singautim. Taim yumi stretim gut ol samting na yumi mekim ol samting bilong singautim ol man i kam long dispela bung, em i gutpela rot bilong kamapim olsem yumi tenkyu long God Jehova long ‘dispela presen em i bin givim yumi, em i bikpela moa, na yumi no inap autim gut olgeta tok bilong en.’—2 Ko. 9:15.
4 Lusim Bikpela Haptaim Moa Long Autim Tok: Yu inap mekim bikpela wok moa bilong autim tok long Mas na Epril? Taim yumi wok strong long tokim ol narapela long “gutnius bilong marimari na sori bilong Krais” bai God i mekim gut long dispela wok. Jehova, em As bilong lait bilong ol samting bilong spirit, em i tok: “Insait long tudak lait i ken kamap.” (2 Ko. 4:4-6) Ol elda bai stretim rot bilong mekim sampela bung moa bilong autim tok long ol narapela taim na ples, na dispela bai helpim ol pablisa em ol i laik lusim bikpela haptaim moa long autim tok. Ating ol bai kamapim sampela bung bilong tilim nius long rot long moning tru o autim tok long ol bisnis teritori na autim tok long rot bilong telefon long apinun. Samting bilong helpim yu long mekim bikpela wok moa bilong autim tok, em pasin bilong putim mak long hamas aua yu laik winim, na wok strong long winim dispela aua. Planti bratasista i save mekim wok painia haptaim, na long dispela rot ol i givim bel olgeta long Jehova.—Kl. 3:23, 24.
5 Yu Inap Insait Long Wok Painia Haptaim? Winim 7-pela yia i go pinis ol i bin daunim aua bilong wok painia haptaim. Dispela i bin opim rot bilong planti long insait long wok painia haptaim na kisim amamas long en. Yu bin insait long wok painia haptaim? Sampela i save mekim long olgeta yia. Long planti kongrigesen, planti pablisa i save mekim dispela wok wantaim, na dispela i wanpela gutpela samting kongrigesen i kisim amamas long en. Olsem wanem? Yu inap mekim wok painia haptaim long mun Mas na Epril? Ating Epril bai i gutpela taim long mekim wok painia, long wanem, em i gat faipela wiken.
6 Olsem wanem? Wasman sekit bai raun lukim kongrigesen bilong yupela long Mas o Epril? I gat wanpela gutpela samting yu inap insait long en. Olsem mipela i bin toksave pinis, long sevis yia bilong 2006, olgeta bratasista i mekim wok painia haptaim long mun we wasman sekit i raun lukim kongrigesen, ol tu bai insait long namba wan hap bilong miting bilong ol painia i save kamap long taim wasman sekit i raun lukim kongrigesen. Ol gutpela tok bilong spirit i kamap long dispela miting bai helpim planti painia haptaim long insait long wok painia oltaim.
7 Taim yu skelim gut 50 aua em painia haptaim i mas kisim, makim wanpela sediul we yu inap lusim olsem 12 aua long wan wan wik long kamapim lait bilong tok i tru long ol man. Yu ken toktok wantaim ol bratasista husat i bin mekim wok painia haptaim bipo, na ol narapela tu. Ating dispela bai kirapim ol tu long insait long wok painia. Taim ol yangpela na lapun pablisa i baptais pinis i stretim gut ol samting, ol i luksave olsem i no hatwok tumas long winim aua bilong painia haptaim. Beten long dispela samting. Na sapos yu inap long mekim wok painia, orait stretim ol samting na bai yu insait long wok painia haptaim.—Mal. 3:10.
8 Planti famili i luksave olsem taim olgeta insait long famili i wok gut wantaim na stretim gut ol samting, wanpela insait long famili inap mekim wok painia haptaim. Wanpela famili i pasim tok long faipela insait long famili, em ol i baptais pinis ol i ken insait long wok painia haptaim. Tupela narapela pikinini em ol i no baptais yet ol i mekim bikpela wok moa bilong autim tok. Bikpela wok famili i mekim i mekim wanem long ol? Ol i tok: “Em wanpela gutpela taim tru, na mipela i pilim olsem wok painia i helpim famili bilong mipela long pas gut wantaim. Mipela i tenkyu long Jehova long dispela gutpela blesing!”
9 Olsem wanem? Wok yumi mekim long Mas na Epril bai strongim yumi, na mekim yumi i go klostu moa long Papa bilong yumi long heven? Wok bilong yumi bai kamap gutpela sapos yumi strongim pasin bilong yumi long laikim God na Pikinini bilong em na mekim bikpela wok moa bilong autim tok. Yumi mas i gat wankain tingting olsem man bilong raitim song, em i tok: “Tasol bai mi bikmaus na tok tenkyu long Bikpela. Long taim ol manmeri i bung bilong lotu bai mi litimapim nem bilong em.” (Sng. 109:30) Jehova bai blesim wok bilong yumi long mun Mas na Epril. Olsem na yumi mas larim bikpela lait i kamap ples klia na dispela bai helpim planti man moa long lusim tudak na kisim “lait bilong laip.”—Jo. 8:12.
[Askim Bilong Stadi]
1. Baibel i bin tok profet long wanem bikpela lait? Wanem bung bai kirapim ol man long tingim dispela lait?
2. Yumi ken mekim wanem na bai yumi pilim tru long bel samting God i mekim long rot bilong dispela pe bilong baim bek man? Dispela bai mekim wanem long yumi?
3. Olsem wanem yumi ken soim olsem yumi pilim tru bung bilong Memorial?
4. Wanem samting inap helpim yumi long mekim bikpela wok moa bilong autim tok long Mas na Epril?
5. Ol i daunim aua bilong painia haptaim, na dispela i mekim wanem long planti bratasista?
6. I gat wanem gutpela samting ol bratasista i ken insait long en?
7, 8. (a) Wanem samting inap helpim yumi long wokim wanpela sediul bilong insait long wok painia haptaim? (b) Olsem wanem pasin bilong wok gut wantaim inap helpim wanpela insait long famili long mekim wok painia haptaim? Olsem wanem dispela i save helpim famili olgeta?
9. Olsem wanem yumi ken larim lait bilong yumi i lait long mun Mas na Epril?