Helpim Ol Pablisa i No Save Autim Tok Long Olgeta Mun
1 Sampela pablisa i no save autim tok long olgeta mun, na mipela i tingting planti long dispela. Wanem samting inap mekim na pablisa i larim wanpela mun olgeta i lus na em i no bin insait liklik long bikpela wok bilong autim tok na kamapim ol disaipel?
2 Ating bikpela sik i bin painim sampela, na sampela i no tingim wok autim tok em i bikpela samting. (2 Ko 4:7) Sampela narapela ol i no mekim stadi bilong ol yet na kam long olgeta miting, olsem na ol i no pilim moa olsem taim i sot pinis. Na ating sampela i no bin putim ripot, long wanem, ol i pilim olsem aua bilong ol i liklik tumas. Tasol maski i gat wanem as na ol i no putim ripot, yumi laik helpim ol.
3 Ol elda i mas wok long save long sindaun bilong olgeta long kongrigesen na ol samting ol i mas helpim ol long en, bambai ol inap helpim gut ol. Taim ol elda i miting wantaim, ol i mas tingim husat i no bin autim tok long olgeta mun, na husat inap helpim dispela pablisa na helpim em long wanem rot.
4 Long olgeta mun kuskus i mas wokim lista bilong ol pablisa i no bin putim ripot na givim long ol brata i lukautim Buk-Stadi. Orait nau kwiktaim ol elda i ken helpim ol dispela pablisa. Long gutpela pasin isi, brata i lukautim Buk-Stadi i ken toktok wantaim pablisa na bai em i ken save wanem samting i pasim pablisa long autim tok na em i ken mekim wanem bilong helpim em. (Snd 27:23) Orait nau brata i ken stretim rot bilong em yet o narapela strongpela pablisa o painia i ken wok wantaim dispela pablisa long autim tok. Ol inap autim tok wantaim long olgeta wik o olsem wanem? Sapos pablisa i no gat rot long kam long grup o em i gat ol liklik pikinini na narapela i mas helpim em, orait, brata i ken askim sampela narapela pablisa long helpim dispela pablisa.
5 Taim wasman bilong wok autim tok i go lukim ol Buk-Stadi, em i ken stretim rot wantaim brata i lukautim Stadi na tupela wantaim i ken go lukim ol pablisa i no save autim tok long olgeta mun. Ating ol inap kirapim ol dispela pablisa long tingim wok autim tok i olsem wanpela bikpela samting ol i mas mekim. (Ro 10:10) Gutpela sapos yumi wok strong olsem, bilong kamapim klia yumi laikim ol “manmeri i bilip long Bikpela.”—Ga 6:10.