Askim

◼ Husat i mas mekim ol toksave long Miting Bilong Wok?

Dispela hap bilong miting i bilong helpim kongrigesen long save long ol samting ol i mas mekim bambai ol inap mekim gut wok bilong ol long autim tok. Sampela toksave i bilong kirapim tingting bilong yumi long mekim sampela wok na ol i wankain long olgeta wik. Tasol ol i mas kolim klia na kolim gut olgeta toksave, no ken kolim ol toksave long pasin i olsem toksave i no bikpela samting.

Sampela toksave i bilong ol elda i mas mekim. Sapos ol i bin makim wanpela brata long mekim ol toksave, tasol i gat sampela toksave ol elda yet i mas mekim, orait wasman siaman i mas makim wanpela elda long mekim dispela toksave.

Sapos kongrigesen i kisim wanpela pas i gat sampela tok long en i bilong ol elda tasol, orait wanpela elda i mas kamapim ol tok i bilong kongrigesen. Sampela pas i kam long Sosaiti i gat ol tok long kongrigesen i mas mekim sampela samting, orait wanpela elda i mas ritim dispela pas long kongrigesen. Ating ol kain pas olsem i stori long kongrigesen i mas raitim pas i go long sampela hap em gavman i wok long mekim nogut long ol brata sista bilong yumi. Na ating sampela pas i stori long wasman sekit bai kam lukim kongrigesen, o kibung sekit na kibung distrik bai kamap.

Sampela taim ol i mas mekim toksave long wanpela bikpela samting em kongrigesen i mas save long en bilong i stap gut, na ol i mas kamapim klia ol tok. Sapos olsem, orait wanpela elda i mas mekim dispela toksave.

Maski wanpela elda o kongrigesen sevent i mekim ol toksave, em i mas kolim klia na kolim stret ol tok. Long ol hap i no gat ol elda o kongrigesen sevent na wanpela brata o sista i dediket pinis i mekim ol toksave, ol tu i mas kolim klia na kolim stret ol toksave. Pasin bilong bihainim ol dispela tok bai mekim na kongrigesen i klia gut long ol samting ol i mas mekim na olgeta bai wok gut wantaim long pasin wanbel.​—⁠⁠Sng. 133:1; 1 Ko. 14:​8, 9, 40.