Rot Bilong Helpim Famili Long Pas Gut Wantaim
1 Ol papamama i gat planti wok i save pulim bikpela hap taim bilong ol, olsem na i hatwok long ol i helpim famili long i stap strong long lotu i tru. Ol famili Kristen i mas pas gut wantaim bambai ol inap i stap strong long bilip long dispela taim bilong planti hevi. (Sav 4:9-12; 2 Ti 3:1-5) Taim famili i wok long kamap strong long spirit, dispela i save helpim ol long i stap wanbel, na bai ol inap sanap strong na sakim Satan na pasin bilong dispela graun.
HELPIM OL LONG KISIM OL GUTPELA PASIN BILONG SPIRIT
2 Em i bikpela samting long papamama i mas kisim ol pikinini i go long ol miting bilong kongrigesen na mekim famili-stadi long olgeta wik. (Lo 6:6, 7; Hi 10:23-25; w-E 11/1/86, pes 23-25) Tasol i gat sampela samting moa papamama i mas mekim bilong lainim gut ol pikinini na helpim ol long kamapim ol gutpela pasin bilong spirit.
3 Papamama i mas laik tru long helpim ol pikinini long kamap strong long spirit, na bai famili i pas gut wantaim. Long lain Israel long bipo, em wok bilong papamama long lainim na skulim ol pikinini. Tok na pasin bilong ol i mas lainim ol pikinini. Ol Israel i save lainim ol pikinini long mekim ol wok olsem ol i mas mekim taim ol i bikpela pinis, na ol i save lainim ol long rit rait, na long kamapim ol gutpela pasin bilong spirit. Taim ol i wok long lainim ol pikinini, ol i laik lainim ol long ol bikpela samting, olsem: Ol i mas aninit long Jehova, na bihainim ol tok bilong Lo bilong Moses, na harim gut tok bilong papamama na ol narapela manmeri i bikpela pinis, na ol i mas save olsem pasin bilong bihainim tok em i bikpela samting.
4 Yupela ol papamama, long olgeta de i gat sampela hap taim bilong yu stap wantaim ol pikinini, na yu mas wok strong long mekim gutpela wok long ol dispela hap taim. Long taim bilong kaikai samting, yu ken toktok wantaim ol pikinini long ol samting bilong spirit. Wanpela papa i kamapim gutpela tingting na em i tok: “Ol papamama i mas lusim bikpela hap taim long helpim ol pikinini—sapos ol i no lusim taim long helpim ol pikinini long bihainim ol gutpela pasin bilong spirit, bai ol i mas lusim taim long helpim ol pikinini long stretim kain kain hevi bilong ol.” Gutpela sapos papamama i wok long helpim ol pikinini long kisim ol gutpela pasin bilong spirit bambai ol pikinini inap sakim ol samting bilong dispela graun i laik pundaunim ol.—1 Ko 3:10-15.
AMAMAS LONG AUTIM TOK
5 Taim yumi wetim gutpela samting i kamap o gutpela samting i painim yumi, bel bilong yumi i save amamas. Sapos man i redi gut bilong autim tok, orait em i ken wetim gutpela samting i kamap. Olsem na sapos yu laik amamas long autim tok, yu mas redi gut pastaim. Famili i ken wok wantaim long traim kolim ol tok ol i laik kamapim long taim ol i go long autim tok. Dispela samting bai helpim ol na bai ol i no pret long mekim dispela wok. (Lukim Taitus 3:1b.) Olgeta wan wan i ken tingim mak ol i laik winim. Papamama i ken helpim ol liklik pikinini o ol pikinini i nupela long autim tok na ol i ken redim liklik tok bilong mekim long taim ol i autim tok.
6 Sapos papamama i wok wantaim ol pikinini bilong ol long autim tok, bai papamama inap kirapim ol long tingim gut ol man, na laik long helpim ol, olsem Jehova na Jisas i mekim. Taim yumi autim tok, dispela i helpim yumi long pas gut wantaim Jehova tu. Sampela famili i save makim wanpela de na long dispela de ol i save autim tok wantaim, na bihain ol i save mekim sampela samting bilong painim gutpela amamas wantaim, olsem na long de olgeta ol i stap wantaim. Sapos ol i poroman gut wantaim olsem, dispela bai givim rot long ol bilong toktok gut wantaim, na bai ol i pas gut wantaim.
7 Yu mas wok strong bambai yu inap toktok gut wantaim ol pikinini bilong yu na bai yupela i pas gut wantaim. Yu no ken larim wanpela samting i pasim yu long mekim ol samting yu mas mekim bilong strongim famili na helpim famili long pas gut wantaim. Beten askim Jehova long helpim ol pikinini bilong yu, na beten wantaim ol, long wanem, Jehova tasol inap mekim wok bilong yu long helpim ol i kamap gutpela.—Sng 127:1; Snd 24:3.
[Ol Askim]
1. (a) Ol papamama i gat wanem hatwok long nau? (b) Nau long dispela taim wanem samting inap strongim na helpim famili long pas gut wantaim?
2. Kamapim sampela tok bilong Baibel i kolim sampela samting i save helpim famili long pas gut wantaim.
3. (a) Ol papamama long lain Israel long bipo ol i gat wanem bikpela wok? (b) Ol i wok strong long lainim ol pikinini long wanem ol bikpela samting bambai famili i ken pas gut wantaim?
4. (a) Ol papamama i mas lusim bikpela hap taim long helpim ol pikinini, na i gutpela sapos ol i lusim taim long helpim ol olsem wanem? (b) Olsem wanem tok bilong 1 Korin 3:10-15 i kamapim klia dispela samting?
5, 6. (a) Olsem wanem na sapos yu redi gut pastaim, dispela inap helpim yu long amamas long autim tok? (b) Sapos famili i poroman wantaim bilong painim gutpela amamas, olsem wanem dispela inap helpim ol?
7. Kaunim Song 127:1 na Sindaun 24:3. Sapos yumi bihainim ol dispela tok, olsem wanem dispela bai helpim famili long pas gut wantaim?