Ol Yangpela—Bosim Gut Wokabaut Bilong Yupela
1 Papa bilong yumi Jehova i save tingim ol yangpela, ol i kamap strong long spirit o nogat? Sapos ol yangpela i bihainim gutpela tingting na putim gut yau long ol gutpela tok bilong em na bihainim, ol bai mekim em i belgut tru, na ol bai kisim malolo na kisim strong. (Snd 27:11; Mt 11:28-30) Ol i larim Jehova i stiaim gut wokabaut bilong ol.—Snd 16:9.
2 Taim Krais Jisas i stap yangpela, God i laikim em tru na ol man tu ol i laikim em, olsem na Jisas i stap olsem gutpela piksa bilong ol yangpela i ken bihainim. (Lu 2:52) Ol yangpela long nau, ol tu ol i mas mekim sampela samting na bai God na ol man i ken laikim ol. Sapos ol yangpela i wok long tingim ol samting bilong spirit, dispela bai kamapim klia olsem ol i bosim gut wokabaut bilong ol. Taim Jisas i gat 12-pela krismas, ol man i save, Jisas i laik tokim ol narapela long tok bilong Jehova. (Lu 2:46, 47) Ol yangpela long nau ol tu i gat wankain laik olsem Jisas long kamapim bilip bilong ol long ol narapela.—w90-E 7/1 pes 29-30; w87-E 12/1 pes 21.
3 Yupela ol yangpela, yupela i ken mekim wanem bambai yupela inap givim ol gutpela samting bilong yupela “long Bikpela olsem ofa, na dispela bai i givim biknem long em”? (Snd 3:9) Gutpela sapos yu autim tok na lainim ol man inap planti aua moa, olsem mekim wok painia, a? Sapos yu mekim bikpela wok moa long autim tok ating bai yu kirap nogut, long wanem, dispela bai helpim yu na bai yu kisim bikpela amamas moa. Na bai yu gat rot tu long autim tok wantaim planti pablisa moa. Ating yu inap tokim wanpela o tupela pablisa i gat save long pasin bilong autim tok long i go wantaim yu long autim tok long dispela Sarere Sande.
4 Sapos papamama i traim pasin bilong autim tok wantaim ol pikinini bilong ol na go wantaim ol long autim tok, dispela bai helpim na strongim tru ol pikinini. Na sampela strongpela pablisa long kongrigesen, ol yet i ken tokim ol yangpela long go wantaim ol long ol haus na autim tok na long mekim ol gobek na Baibel-stadi. Sapos ol yangpela i autim tok wantaim ol pablisa i stap strong long ol samting bilong spirit, dispela bai strongim ol yangpela na helpim ol long kamap olsem “man i bikpela pinis.”—Hi 6:1.
5 Olgeta Kristen—ol yangpela tu—ol i mas lain long mekim gutpela pasin moa bilong lainim ol man. Olsem wanem? Yupela ol yangpela i save redim gut ol tok ol i makim yupela long mekim long Skul Bilong Wok Autim Tok? Yupela i save makim taim bilong kaunim buk na mekim stadi bilong yupela yet na long tingim gut ol tok yupela i bin kaunim na stadi long en? Yupela yet i save bihainim ol dispela tok? Yupela i save redim ol tok bilong miting na bai yupela inap kisim gut ol tok na redi long bekim tok? Yupela save raitim sampela hap tok long notbuk samting na traim ol samting Wok Kingdom i tokim yumi long mekim?
6 Gutpela tu sapos yu helpim ol brata sista long klinim Haus Kingdom; na ol lapun o ol brata sista em skin bilong ol i no strong, helpim ol long stretim haus o klinim banis bilong ol, o kain samting olsem. Na no ken les long putim kontribusen bilong yu yet long bokis bilong helpim wok bilong lukautim Haus Kingdom na wok Sosaiti i mekim long olgeta hap bilong graun.
7 Sapos yumi “bihainim tok bilong [Jehova]” na larim em i bosim wokabaut bilong yumi, dispela bai opim rot bilong kisim amamas na long mekim sampela wok moa bilong Jehova.—Sng 119:9.
[Ol Askim]
1. Bilong wanem ol yangpela i mas putim gut yau long ol gutpela tok bilong Jehova na bihainim?
2. Ol yangpela i mas mekim wanem na bai ol i ken bihainim gutpela pasin bilong Jisas?
3. Sapos ol yangpela i mekim wok painia haptaim, olsem wanem dispela bai helpim ol?
4. Husat long kongrigesen i ken helpim gut ol yangpela?
5. Gutpela sapos ol yangpela i givim wanem ol askim long ol yet?
6. Ol yangpela i ken mekim wanem ol samting moa?