Soim Gutpela Rot Long Ol Pikinini
1 Yumi amamas olsem planti yangpela bilong yumi ol i “litimapim nem” bilong Jehova, na dispela lain i wok long i go bikpela moa. (Sng 148:12, 13) Planti bilong dispela lain ol i pikinini yet. Bilong helpim ol long kamap strong long tok i tru, papamama bilong ol na ol narapela long kongrigesen i gat bikpela krismas, ol i mas bihainim gutpela pasin na skulim gut ol. Ol yangpela i gat bikpela krismas liklik na ol man i bikpela pinis, ol tu inap helpim ol. Sapos yu wanpela yangpela, ating ol dispela tok inap helpim yu.
2 Ol yangpela i no kisim yet 13 krismas, ol i save bihainim ol yangpela i gat 17 krismas samting. Ol i laik stap wankain olsem ol poroman bilong ol em ol i laikim ol tumas. Ol i laik bihainim ol yangpela i gat bikpela krismas liklik, long wanem long ai bilong ol, ol i gat bikpela save na gutpela tingting. Long dispela as, ating bai ol i bihainim toktok na pasin bilong yu, na bihainim pasin bilong yu long laikim ol samting bilong spirit na ol wok yu mekim insait long kongrigesen.
3 Sapos yu gat 17 krismas samting, yu gat wanpela bikpela wok yu mas mekim. Long nau, pasin yu mekim inap helpim o nogutim ol poroman bilong yu ol i liklik long yu. Askim yu yet: ‘Pasin bilong mi i mekim wanem long ol liklik? Mi save tingting gut na givim baksait long ol longlong pasin na “olgeta kain laik nogut i save kamap long bel bilong ol yangpela man”? Mi kamapim klia olsem mi bihainim tok bilong papamama, na ol elda, na ol narapela man i gat bikpela krismas, na mi daun long ol?’ (2 Ti 2:22; Kl 3:20) Ol samting yu toktok long en na ol samting yu mekim, em inap helpim tru ol pikinini i lukim pasin bilong yu na bai ol i ken kamap strong long ol samting bilong spirit.
4 Namba wan wok bilong kongrigesen, em wok bilong autim tok bilong Kingdom. Sapos oltaim yu mekim dispela wok na yu amamas long mekim, dispela inap kirapim ol poroman bilong yu long mekim bikpela wok moa. Sapos yu mekim wok painia, dispela bai kirapim ol pren bilong yu long mekim olsem tu. Na sapos yu bekim tok long ol miting na redi long mekim sampela wok em yumi mas mekim long Haus Kingdom, ating dispela bai kirapim ol narapela yangpela long mekim olsem.
5 Tru, Timoti i winim 20 krismas samting taim Pol i givim sampela tok long em, tasol ol yangpela i no winim yet 20 krismas ol inap bihainim dispela tok em i bin givim long Timoti, olsem: “Yu mas mekim ol gutpela pasin tasol, bai ol Kristen i ken lukim pasin bilong yu na bihainim. Yu mas mekim gutpela pasin long tok bilong yu na long wokabaut bilong yu na long pasin bilong laikim tru ol arapela na long pasin bilong bilip na long pasin bilong i stap klin tru long ai bilong God.” (1 Ti 4:12) Sapos yu amamas na givim bel tru long mekim wok bilong Jehova, dispela inap kirapim ol poroman bilong yu, na ol liklik i lukim pasin bilong yu, long ol i mas wok long kamap strongpela Kristen. (Ef 4:13) Sapos nau tasol famili bilong wanpela yangpela i kirap long stadi, ating gutpela pasin bilong yu inap kirapim em long laikim tok i tru.
6 Tasol bikpela samting moa, em olsem: Sapos yu wok strong long kamapim klia olsem yu bihainim ol gutpela pasin bilong God, dispela bai mekim gut nem bilong Jehova na oganaisesen bilong em. (Snd 27:11) Ol man i gat gutpela bel na i lukim gutpela pasin bilong yu, ol bai save, pasin bilong yu i narapela kain stret long pasin bilong ol yangpela bilong dispela graun. Olsem na taim yu mekim gutpela wok bilong litimapim nem bilong Jehova, yu gat rot long helpim ol yangpela i no gat bikpela krismas.—Sng 71:17.
[Ol Askim]
1. Gutpela pasin bilong husat inap helpim gut ol yangpela insait long tok i tru?
2. Ol yangpela i no kisim yet 13 krismas, ol i laik bihainim husat?
3. Ol yangpela i gat 17 krismas samting, ol i mas mekim wanem bikpela wok?
4. Kolim sampela samting yu ken mekim bilong kirapim ol narapela yangpela long mekim gutpela wok?
5. Sapos yu amamas na givim bel tru long mekim wok bilong Jehova, dispela inap mekim wanem long ol narapela yangpela insait long kongrigesen?
6. Sapos yu wok strong long bihainim ol gutpela pasin bilong God, dispela bai mekim wanem gutpela wok? Gutpela pasin bilong yu inap helpim husat moa?