Askim

◼ Yumi ken mekim wanem na bai yumi inap bekim gut tok long ol miting?

 Yumi amamas long go long ol miting bilong kongrigesen long olgeta wik. Long ol miting yumi inap bekim sampela tok​—⁠long dispela rot yumi inap tokaut long bilip bilong yumi na strongim bel bilong ol narapela. (Snd 20:15; Hi 10:​23, 24) Pasin bilong bekim tok em wanpela gutpela samting tru, na yumi mas wok strong long bekim tok long olgeta taim. Olsem wanem yumi inap mekim gut dispela samting?

 Namba wan samting, yu mas redi gut pastaim. Paslain long miting, kaunim na tingim gut ol tok bilong miting. Wok long save gut long as tru bilong ol tok. Maski bipo yu bin harim wankain tok, putim gut yau na wok long lainim sampela nupela tok. Tingim bikpela as tok bilong ol tok. Taim yu redim sampela bekim long wanpela buk i kamapim ol strongpela tok bilong wanpela buk long Baibel, olsem buk Kamapim Tok Hait i mekim, wok long save olsem wanem ol wan wan ves i stret long ol narapela ves i stap klostu. Sapos yu mekim olsem, dispela bai helpim yu long wokim gut tingting na redim sampela gutpela bekim na kisim amamas taim yu bekim tok.

 Nambawan gutpela bekim em ol bekim i sotpela na i klia na i stret long buk bilong stadi. Brata i bekim namba wan tok long paragraf em i mas bekim stret askim. Nau ol narapela i ken kamapim sampela narapela tok long paragraf. No ken stori i go i go na pulim bikpela hap taim na pasim ol narapela long kamapim tok. No ken kaunim tasol ol tok bilong paragraf; kolim long toktok bilong yu yet. Ating yu ken kamapim wanpela skripsa em paragraf i no kamapim tok bilong en na stori liklik long en. Putim gut yau taim narapela i kamapim tok; nogut yu kamapim wankain tok.

 Gutpela sapos planti taim yu putim han i go antap, tasol no ken putim han i go antap long olgeta paragraf. Mipela laik bai ol yangpela i ken bekim sampela tok. Sapos yu pret liklik long bekim tok, tokim brata i lukautim stadi long ol paragraf yu laik bekim tok long en, na taim yu putim han i go antap, ating em i ken makim yu.

 Gutpela sapos yumi olgeta i wok strong long kamapim sampela tok long ol hap bilong miting i gat ol askim na bekim bilong en. Yu mas save, bilong miting i ken kamap gutpela, yu mas amamas long bekim tok na mekim gutpela bekim.​—⁠Sng 26:⁠12.