Strongim Ol Narapela Long Rot Bilong Bekim Tok Long Ol Miting
1 Long Hibru 10:24 Baibel i tok yumi mas ‘tingting long ol arapela, na kirapim ol long laikim ol arapela na mekim ol gutpela pasin long ol.’ Wanpela rot bilong mekim olsem em long mekim ol gutpela bekim long ol miting bilong kongrigesen. Bilong wanem yumi mas bekim tok? Yumi ken bekim tok olsem wanem? Pasin bilong bekim tok i save helpim husat?
2 Tingim planti taim ol gutpela tok ol narapela i save mekim em i helpim yu long kisim gut wanpela tok na dispela i strongim yu long ol samting bilong spirit. Yu tu i gat gutpela wok long helpim ol narapela long rot bilong ol tok yu bekim. Taim yu bekim tok, yu kamapim olsem yu gat laik long “givim sampela presen bilong Holi Spirit” bilong strongim olgeta i kam long miting.—Ro 1:11, 12.
3 Rot Bilong Bekim Gut Tok: No ken kamapim olgeta tok bilong paragraf na mekim longpela bekim. Planti taim ol longpela bekim i no save bekim stret askim na dispela inap mekim na ol narapela i no laik bekim tok. Namba wan bekim i mas bekim stret askim bilong paragraf. Taim ol narapela i bekim sampela tok moa, ol i ken kamapim olsem wanem yumi ken bihainim ol dispela tok o olsem wanem ol skripsa i stret wantaim ol tok bilong paragraf.—Lukim Buk Bilong Skul (tok Inglis), pes 90-92.
4 Sapos yu save tingting planti na pret liklik taim yu laik bekim tok, paslain yet yu mas redim wanpela sotpela tok, na askim brata i lukautim dispela hap long makim yu long bekim tok bilong dispela paragraf. Bihain long yu mekim olsem long sampela miting moa, dispela bai helpim yu na bai yu no pret moa long bekim tok long ol miting. Tingim Moses na Jeremaia, tupela i tok ol i no gat strongpela bel long toktok long ai bilong planti manmeri. (Kis 4:10; Jer 1:6) Tasol Jehova i bin helpim tupela na ol i givim tok bilong em long ol manmeri. Olsem tasol Jehova bai helpim yu tu.
5 Ol Tok Yu Bekim Bai Helpim Husat? Ol tok yu bekim bai helpim yu yet, long wanem, tok i tru bai pas strong long tingting na bel bilong yu na yu inap tingim gen ol dispela tok long bihain. Na tu, taim ol narapela i harim ol gutpela bekim bilong yu, dispela i save strongim ol. Taim yumi lukim olgeta i wok strong long kamapim bilip bilong ol long ol miting bilong kongrigesen—maski ol i stap longtaim long tok i tru, o ol i yangpela, o ol i man bilong sem, o ol i nupela—dispela i save strongim yumi.
6 Tru tumas taim ‘yumi wetim gutpela taim na yumi mekim wanpela gutpela tok, orait bai yumi amamas,’ sapos ol dispela tok yumi mekim i strongim ol narapela long taim bilong ol miting!—Snd 15:23.