Strongim Ol Narapela
1 Yumi stap long “taim bilong las de” na “planti hevi nogut tru” i kamap, olsem na yumi olgeta i mas i gat narapela bilong strongim yumi. (2 Ti 3:1) Pol i save ol man i stap long taim bilong em ol i mas i gat narapela bilong strongim ol, olsem na taim em i go lukim ol brata bilong em, em i tokim ol: “Mi laik bai bilip bilong yupela i ken helpim mi na bilip bilong mi i ken helpim yupela tu, na dispela i ken strongim bel bilong yumi olgeta wantaim.” Na em i tok, ol i mas “bihainim olgeta pasin . . . i save strongim bilip bilong ol arapela.” (Ro 1:11, 12; 14:19) Dispela samting i “strongim bel bilong ol disaipel” na i helpim ol long i “stap strong long bilip.” (Ap 14:22) Long nau tu yumi mas i gat narapela bilong strongim yumi olsem.
2 Ol tok yumi mekim inap strongim ol narapela. Gutpela tok yumi mekim i olsem “gutpela piksa ol i wokim long gol na bilasim long silva.” (Snd 25:11) Taim yumi bekim tok long miting, yumi save “strongim bel bilong ol arapela.” (Hi 10:25) Na maus bilong yumi inap strongim ol narapela taim yumi kamapim sampela gutpela ekspiriens, o yumi tokim ol narapela ol i bin mekim gutpela wok, o yumi stori long ol samting bilong spirit. Kain tok olsem inap “strongim ol man i slek.”—Ef 4:29.
3 Toktok Long Ol Samting Bilong Strongim Narapela: Long Filipai 4:8 Pol i kamapim ol samting i gutpela bilong toktok long en olsem: ol pasin i tru, ol pasin i gutpela, ol stretpela pasin, ol klinpela pasin, ol naispela samting, ol samting i gutpela tru, ol pasin i nambawan tru, ol pasin yumi save amamas tru long lukim ol man i mekim. Sapos Baibel i as bilong ol tok yumi mekim, oltaim yumi ken bilip olsem ol tok yumi mekim em i tru na em bai helpim ol narapela. (Jo 17:17) Ol pasin i gutpela, em ol samting olsem dediket bilong yumi, na ol samting yumi lainim long ol miting, na ol samting yumi mekim bilong mekim tru wok autim tok. Taim yumi mekim gutpela tok long ol lo bilong Baibel bilong strongim ol narapela, dispela bai helpim yumi long kisim ‘gutpela tingting na bai God i kisim bek yumi.’ (2 Ti 3:15) Yumi ken kamapim tok olsem yumi pilim tru stretpela pasin bilong ol man insait long klinpela oganaisesen bilong Jehova. Na yumi ken litimapim pasin ol brata i mekim bilong helpim ol narapela. (Jo 13:34, 35) Yumi ken stori long ol gutpela pasin Kristen ol brata i bihainim, olsem bilip, na amamas, na bel isi, na ol i no belhat kwik. Sapos yumi stori long ol gutpela samting olsem, dispela bai helpim ol narapela long “kamap strong.”—Ro 15:2.
4 Long olgeta de i gat planti samting ol man i tingting planti long en na i mekim ol i bel hevi. Sapos yumi no tingting tumas long ol dispela hevi, na yumi bung wantaim ol brata, dispela bai givim nupela strong long yumi! Hap taim yumi lusim long bung wantaim ol brata, em wanpela gutpela samting tru. Sapos oltaim yumi wok long strongim ol narapela, ol bai mekim tok tru long yumi olsem: “Ol i bin mekim isi bel bilong mi.”—1 Ko 16:18.