Toktok Long Ol Samting Bilong Spirit Bai Strongim Yumi

“Yupela i no ken larim ol kain kain tok nogut i kamap long maus bilong yupela. Nogat. Gutpela tok tasol i mas kamap, inap long strongim ol man i slek. Dispela kain tok i save bringim marimari bilong God i kam long ol man i harim.”​—⁠EFESUS 4:⁠29.

1, 2. (a) Olsem wanem pasin bilong toktok i gutpela samting tru? (b) Ol wokman bilong Jehova i laik bai toktok bilong ol i mekim wanem ol samting?

“PASIN bilong toktok em samting man i no inap save gut long en; em presen God i givim, em i wanpela mirakel.” Dispela em tok bilong saveman Ludwig Koehler. Ating yumi ting dispela gutpela presen God i givim em i samting nating. (Jems 1:17) Tasol tingim bikpela samting tru man i lusim taim sik strok i mekim na wanpela long famili i no inap mekim gut toktok. Joan, em man bilong em i bin kisim sik strok, em i tok: “Mitupela i gat gutpela pasin bilong toktok wantaim na dispela i mekim na mitupela i pas gut. Mi sori tru olsem nau mitupela i no inap moa long mekim olsem!”

² Pasin bilong toktok wantaim inap strongim pasin pren, stretim ol tingting kranki, mekim gut bel bilong man i bel hevi, strongim bilip, na helpim gut sindaun bilong ol man​—⁠tasol pasin bilong toktok i no inap kamapim ol dispela samting wantu tasol. King Solomon i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em. Tasol tok bilong man i gat gutpela tingting i save helpim ol man olsem gutpela marasin.” (Sindaun 12:18) Yumi ol wokman bilong Jehova, yumi laik bai toktok bilong yumi i stretim hevi na strongim man, na i no bagarapim bel na daunim man. Na tu, yumi laik mekim ol toktok i litimapim nem bilong Jehova, long wok autim tok bilong yumi na long ol toktok bilong yumi yet wantaim ol narapela. Man bilong raitim song i tok: “God, oltaim mipela i bin litimapim nem bilong yu. Na bai mipela i tok tenkyu long yu oltaim oltaim.”​—⁠Song 44:⁠8.

3, 4. (a) Yumi olgeta i gat wanem hevi long pasin bilong mekim toktok? (b) Bilong wanem yumi mas tingim gut ol tok yumi mekim?

³ Disaipel Jems i tok: “I no gat wanpela man inap long bosim maus bilong em yet. Nogat.” Em i tok: “Planti taim yumi save tingting long mekim wanpela samting, na yumi save popaia. Dispela kain samting i save kamap long yumi olgeta. Na sapos i gat wanpela man i stap, em i no save mekim sampela tok i no stret, orait em i gutpela man tru, na em bai inap long bosim gut olgeta hap bilong bodi bilong en.” (Jems 3:​2, 8) I no gat wanpela bilong yumi i gutpela olgeta. Olsem na maski yumi gat laik tru long mekim gutpela tok, sampela taim ol tok yumi mekim i no strongim ol narapela o litimapim nem bilong Man bilong wokim yumi. Olsem na yumi mas lain long tingim gut ol tok yumi mekim. Jisas i tok: “Long de God i makim bilong kotim ol manmeri, em bai i tingting long olgeta toktok nabaut ol manmeri i bin mekim na em bai i skelim ol. Long tok bilong yu yet God bai i kolim yu stretpela man. Na long tok bilong yu yet em bai i kolim yu man nogut.” (Matyu 12:​36, 37) Tru tumas, God bai skelim yumi long ol tok yumi mekim.

⁴ Wanpela gutpela rot tru bilong abrusim pasin bilong mekim ol tok i nogutim man em long kisim pasin bilong toktok long ol samting bilong spirit. Dispela stori bai skelim rot bilong yumi inap mekim olsem, na wanem ol samting yumi ken toktok long en, na ol gutpela samting inap kamap long pasin bilong mekim ol tok i strongim man.

Ol Tingting i Stap Long Bel

5. Olsem wanem na bel bilong yumi i mekim bikpela wok bilong kamapim tok bilong strongim man?

⁵ Taim yumi wok long kisim pasin bilong mekim ol tok i strongim ol narapela, pastaim yumi mas save olsem ol tok yumi mekim i save kamapim ol tingting i stap long bel bilong yumi. Jisas i tok: “Man em i save autim kain tingting i pulap long bel bilong en.” (Matyu 12:34) Yumi save toktok long ol samting em ol i bikpela samting long yumi. Olsem na yumi mas askim yumi yet olsem: ‘Ol toktok mi mekim i save kamapim wanem tingting i stap long bel bilong mi? Taim mi stap wantaim famili bilong mi o ol wanbilip, mi save toktok long ol samting bilong spirit, o mi save toktok long ol spot, klos, ol piksa wokabaut, kaikai, ol nupela samting mi baim, o sampela stori nating tasol?’ Ating ol samting yumi mekim na ol samting yumi tingting long en, em ol samting i nambatu samting tasol. Sapos yumi stretim gut wanem ol samting i bikpela samting long yumi, i stap bilong yumi na ol toktok yumi mekim bai kamap gutpela moa.​—⁠Filipai 1:⁠10.

6. Olsem wanem pasin bilong tingim tingim ol samting long bel i helpim toktok bilong yumi?

⁶ Narapela rot bilong mekim ol toktok bilong yumi i kamap gutpela moa em pasin bilong tingim tingim gut long bel. Sapos yumi wok strong long tingting long ol samting bilong spirit, bai i no hatwok long yumi toktok long ol dispela samting. King Devit i bin luksave long dispela samting. Em i mekim singsing olsem: “Bikpela, mi laik bai tok bilong mi na tingting bilong mi i ken i orait long ai bilong yu.” (Song 19:14) Na Asap, em man bilong raitim song, em i tok: “Bai mi tingting long olgeta samting yu [Bikpela i] bin mekim. Yu bin mekim ol strongpela wok, na bai mi tingim dispela tu.” (Song 77:12) Sapos bel na tingting i gat strongpela laik long ol tok i tru bilong Tok Bilong God, bai i no hatwok long kamapim ol gutpela toktok. Jeremaia i no inap pasim dispela laik long autim tok long ol samting Jehova i bin skulim em. (Jeremaia 20:⁠9) Yumi tu bai mekim olsem sapos oltaim yumi tingim tingim ol samting bilong spirit.​—⁠1 Timoti 4:⁠15.

7, 8. Wanem ol samting i gutpela bilong toktok long en bilong strongim ol narapela?

⁷ Pasin bilong mekim ol wok bilong spirit bai givim yumi planti samting yumi inap toktok long en bilong strongim ol narapela. (Filipai 3:16) Ol kibung, ol miting bilong kongrigesen, ol nupela buk na magasin samting, na teks bilong de na stori bilong en i kam long Wastaua, olgeta i kamapim ol gutpela samting em yumi inap tokim ol narapela long en. (Matyu 13:52) Na ol ekspiriens yumi kisim long wok autim tok inap strongim man long ol samting bilong spirit!

⁸ King Solomon i laikim tru ol kain kain diwai, animal, pisin, na pis em i lukim long Israel. (1 King 4:33) Em i amamas tru long toktok long ol samting Jehova i bin wokim. Yumi tu ken mekim wankain pasin. Ol wokman bilong Jehova i save amamas long toktok long kain kain samting, tasol oltaim ol samting bilong spirit i gutpela samting bilong toktok long en.​—⁠1 Korin 2:⁠13.

“Tingting Tasol Long Ol Pasin i Tru”

9. Pol i givim wanem tok long ol Filipai?

⁹ Maski yumi toktok long wanem samting, toktok bilong yumi bai strongim ol narapela sapos ol tok bilong yumi i stret long tok aposel Pol i givim long kongrigesen long Filipai. Em i tok: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” (Filipai 4:⁠8) Ol pasin Pol i kolim ol i bikpela samting, olsem na em i tok long “tingting tasol” long ol dispela pasin. Yumi mas larim ol dispela pasin i pulap long tingting na bel bilong yumi. Olsem na i gutpela yumi skelim olsem wanem ol dispela 8-pela pasin Pol i kolim inap helpim yumi long toktok bilong yumi.

10. Olsem wanem ol toktok bilong yumi inap kamapim ol samting i tru?

¹⁰ Ol pasin i tru i makim ol tok i tru, na i no dispela tasol, nogat. Em i makim tu samting i stret na inap long yumi ken bilip tru long en, olsem tok i tru bilong Baibel. Olsem na taim yumi toktok wantaim ol narapela long ol tok i tru bilong Baibel em yumi bin amamas long en, o ol tok i bin mekim gut bel bilong yumi, o tok kaunsel bilong Baibel we i bin helpim yumi, yumi mekim pasin bilong tingting long ol pasin i tru. Tasol yumi sakim ol giaman tingting ol man i kolim olsem “gutpela save,” em ol tok i no tru. (1 Timoti 6:20) Na yumi abrusim pasin bilong stori long ol tok baksait o sampela stori em yumi no save ol i tru o nogat.

11. Long toktok bilong yumi, yumi inap toktok long wanem ol gutpela samting?

¹¹ Ol samting i gutpela long man i mekim i makim ol samting i gat gutpela nem na ol i bikpela samting long yumi mas mekim, na i no ol liklik samting nating. Em i makim wok Kristen bilong yumi long autim tok, dispela taim nogut bilong planti hevi tru em yumi stap long en, na yumi mas wokabaut stret. Taim yumi toktok long ol gutpela samting olsem, yumi strongim tingting bilong yumi long was i stap long ol samting bilong spirit, na holimpas pasin bilong i stap gut long God, na wok yet long autim gutnius. Tru tumas, ol gutpela ekspiriens yumi kisim long wok autim tok na ol samting nau i wok long kamap long graun na i kirapim yumi long tingim gen olsem yumi stap long taim bilong las de, ol i kamapim planti samting em yumi inap toktok long en.​—⁠Aposel 14:27; 2 Timoti 3:​1-5.

12. Pol i tok long yumi mas tingim ol pasin i stretpela na i klinpela, olsem na yumi mas abrusim wanem ol samting?

¹² Dispela tok stretpela i makim olsem yumi mekim pasin i stret long ai bilong God​—⁠bihainim ol lo bilong em. Klinpela pasin i makim olsem tingting na pasin i stap klin. Yumi no ken mekim pasin bilong sutim tok giaman, o mekim ol tok pilai nogut, o ol tok bokis long maritpasin. (Efesus 5:3; Kolosi 3:⁠8) Long ples wok na long skul, ol Kristen i save bihainim gutpela tingting na i go longwe taim ol narapela i toktok long ol kain samting olsem.

13. Wanem ol samting i insait long ol samting i naispela na i gutpela tru?

¹³ Taim Pol i tok long yumi mas tingim ol samting i naispela, em i tok long ol samting ol man i save amamas long en o i save kirapim man long laikim narapela, na em i no tok long pasin birua, bel nogut, o kros. Ol samting i gutpela tru i makim ol gutpela stori. Ol kain gutpela stori olsem i makim ol laip stori bilong ol brata sista em ol i stap gut long God, na ol dispela stori i save kamap olgeta taim long ol Wastaua na Kirap! Taim yu ritim pinis ol dispela stori bilong strongim bilip, ating yu ken toktok wantaim ol narapela long tingting bilong yu long ol dispela stori. Na taim yumi harim stori bilong ol wok bilong spirit ol narapela i mekim, dispela i save strongim tru yumi! Pasin bilong toktok long ol kain samting olsem bai strongim pasin laikim na pasin wanbel insait long kongrigesen.

14. (a) Bilong kamapim pasin i nambawan tru, yumi mas mekim wanem? (b) Olsem wanem toktok bilong yumi inap kamapim ol samting ol man i ken amamas long en?

¹⁴ Pol i toktok long “olgeta pasin i nambawan tru.” Ol samting i nambawan tru i makim ol samting i gutpela tru na i stret olgeta. Yumi mas was gut na larim ol stiatok bilong Baibel i stiaim toktok bilong yumi na bai oltaim yumi mekim ol tok i stretpela, klinpela, na i nambawan tru. Ol samting yumi ken amamas long en i makim ol samting i gutpela long mekim. Sapos yu harim gutpela tok o lukim wanpela i stap gutpela piksa long kongrigesen, yu ken toktok long dispela wantaim dispela man yet na wantaim ol narapela tu. Planti taim aposel Pol i tok amamas long ol gutpela pasin bilong ol wanbilip bilong em. (Rom 16:12; Filipai 2:​19-22; Filemon 4-7) Na tru tumas, ol samting God i bin wokim, em ol samting inap tru long yumi ken amamas long en. Long ol samting God i bin wokim, i gat planti samting em yumi inap toktok long en bilong strongim ol narapela.​—⁠Sindaun 6:​6-8; 20:12; 26:⁠2.

Mekim Ol Toktok Bilong Strongim Man

15. Wanem lo bilong Baibel i makim olsem ol papamama i gat wok long toktok gut wantaim ol pikinini bilong ol?

¹⁵ Lo 6:​6, 7 i tok: “Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” Dispela lo i makim olsem ol papamama i mas toktok gut wantaim ol pikinini bilong ol long ol samting bilong spirit.

16, 17. Ol papamama Kristen inap lainim wanem samting long pasin bilong Jehova na Abraham?

¹⁶ Yumi ken tingim longpela toktok i bin kamap namel long Jisas na Papa bilong em long heven taim ol i toktok long wok em i kisim bilong kam long graun. Jisas i tokim ol disaipel bilong em: “Papa i bin salim mi na mi kam, em yet i tokim mi long olgeta tok mi mas mekim na autim.” (Jon 12:49; Lo 18:18) Yumi ken ting olsem Abraham i bin lusim bikpela hap taim long toktok wantaim pikinini bilong em Aisak, long olsem wanem Jehova i bin mekim gut long ol na long ol tumbuna bilong ol. Ol kain toktok olsem i bin helpim Jisas na Aisak long daunim ol yet na bihainim laik bilong God.​—⁠Stat 22:​7-9; Matyu 26:⁠39.

¹⁷ Ol pikinini bilong yumi tu ol i mas kisim ol toktok bilong strongim ol. Ol papamama i gat planti wok bilong mekim, tasol ol i mas painim sampela taim bilong toktok wantaim ol pikinini bilong ol. Sapos inap, stretim rot na bai long wanpela taim long olgeta de, famili olgeta i ken kaikai wantaim. Long dispela taim bilong kaikai o bihain long en, bai i gat rot bilong mekim ol toktok bilong strongim narapela, na dispela inap helpim tru famili long i stap gut long ol samting bilong spirit.

18. Stori long wanpela ekspiriens i kamapim ol gutpela samting i save kamap taim papamama na ol pikinini i toktok gut wantaim.

¹⁸ Alejandro, em wanpela painia na em i gat 23 krismas samting, em i tingim bek ol samting em i bin gat tupela tingting long en taim em i gat 14 krismas. Em i tok: “Ol wanskul na ol tisa i mekim na mi gat tupela tingting olsem God i stap tru o nogat, na ol tok bilong Baibel i tru o nogat. Papamama bilong mi i lusim bikpela hap taim long toktok gut wantaim mi. Ol dispela toktok i bin helpim mi na mi no gat tupela tingting moa long God na Baibel, na tu, ol dispela toktok i bin helpim mi long skelim stret ol samting mi mas mekim long i stap bilong mi.” Na olsem wanem long nau? Alejandro i tok moa: “Mi stap yet wantaim papamama. Mipela i gat planti wok bilong mekim, olsem na i hatwok long mitupela papa yet i toktok wantaim. Olsem na wanpela taim long olgeta wik, mitupela i save kaikai wantaim long ples wok bilong em. Mi laikim tru ol toktok mitupela i save mekim.”

19. Bilong wanem yumi olgeta i mas toktok wantaim ol narapela long ol samting bilong spirit?

¹⁹ Yumi amamas tu long ol rot i op na yumi inap toktok wantaim ol wanbilip long ol samting bilong spirit. Yumi inap mekim olsem long ol miting, na long taim yumi mekim wok autim tok, na long ol bung bilong amamas, o long taim yumi raun wantaim. Pol i bin gat laik tru long toktok wantaim ol Kristen long Rom. Em i salim pas long ol na tok: “Mi laikim tumas long lukim yupela, long wanem, . . . mi laik bai bilip bilong yupela i ken helpim mi na bilip bilong mi i ken helpim yupela tu, na dispela i ken strongim bel bilong yumi olgeta wantaim.” (Rom 1:​11, 12) Johannes, em wanpela elda Kristen, em i tok: “Pasin bilong toktok wantaim ol wanbilip Kristen long ol samting bilong spirit, dispela i save inapim wanpela bikpela samting. Em i save mekim gut bel na mekim ol hevi i isi moa long karim. Planti taim mi save askim ol lapun long stori long i stap bilong ol na samting i bin helpim ol long stap gut long God. Insait long ol yia i go pinis, mi bin toktok wantaim planti bilong ol, na wan wan bilong ol i bin kamapim sampela gutpela tingting o save na dispela i bin helpim i stap bilong mi.”

20. Yumi inap mekim wanem sapos yumi bungim man i gat pasin bilong sem?

²⁰ Olsem wanem sapos wanpela i no amamas long toktok wantaim yu taim yu laik toktok long ol samting bilong spirit? Sapos olsem, orait yu no ken les kwik. Ating bihain bai i gat wanpela gutpela taim bilong toktok wantaim em. Solomon i tok: “Sapos man i autim klia tru wanpela gutpela tingting, orait tok bilong en i olsem gutpela piksa ol i wokim long gol na bilasim long silva.” (Sindaun 25:11) Kamapim olsem yu pilim tingting bilong ol man em ol i gat pasin bilong sem. “Tingting bilong man i olsem wanpela hul wara i daun moa. Tasol man i gat gutpela save, em inap pulim dispela tingting i kam antap.”a (Sindaun 20:⁠5) Na bikpela samting moa yet, no ken larim pasin bilong ol narapela i pasim yu long toktok long ol samting yu pilim tru long bel.

Toktok Long Ol Samting Bilong Spirit i Helpim Man

21, 22. Yumi kisim wanem ol gutpela samting taim yumi toktok long ol samting bilong spirit?

²¹ Pol i tok: “Yupela i no ken larim ol kain kain tok nogut i kamap long maus bilong yupela. Nogat. Gutpela tok tasol i mas kamap, inap long strongim ol man i slek. Dispela kain tok i save bringim marimari bilong God i kam long ol man i harim.” (Efesus 4:29; Rom 10:10) Tru, yumi mas wok strong long stiaim toktok i go long ol gutpela samting, tasol bai yumi kisim planti gutpela samting taim yumi mekim olsem. Pasin bilong toktok long ol samting bilong spirit i mekim na yumi inap kamapim bilip bilong yumi long ol narapela na strongim lain brata bilong yumi.

²² Olsem na i gutpela yumi mekim wok long dispela presen, em pasin bilong toktok, long strongim ol narapela na litimapim nem bilong God. Ol dispela toktok bai mekim yumi i stap belgut na i strongim bel bilong ol narapela. Na bikpela samting moa yet, toktok bilong yumi bai mekim Jehova i belgut, long wanem, em i save putim yau long toktok bilong yumi na em i save amamas taim yumi mekim gutpela wok long en. (Song 139:4; Sindaun 27:11) Sapos yumi toktok long ol samting bilong spirit, yumi ken bilip tru olsem Jehova i no inap lusim tingting long yumi. Baibel i tok long ol man i mekim wok bilong Jehova nau long taim bilong yumi, na i tok: “Bihain ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.” (Malakai 3:16; 4:⁠5) Em i bikpela samting tru long toktok bilong yumi i mas strongim ol narapela long ol samting bilong spirit!

[Futnot]

Bai Yu Bekim Olsem Wanem?

• Ol toktok bilong yumi i kamapim wanem samting bilong yumi?

• Yumi inap toktok long wanem ol samting bilong strongim ol narapela?

• Pasin bilong toktok i mekim wanem bikpela wok insait long famili na long kongrigesen Kristen?

• Ol toktok bilong strongim man i save kamapim wanem ol gutpela samting?

[Ol Piksa long pes 12]

Ol toktok bilong strongim man i save kamapim . . .

“ol pasin i tru”

“ol pasin i gutpela long ol man i mekim”

“olgeta pasin yumi save amamas tru long lukim”

“ol samting i gutpela tru”

[Ol Kredit Lain]

Video cover, Stalin: U.S. Army photo; Creator book cover, Eagle Nebula: J. Hester and P. Scowen (AZ State Univ.), NASA

[Piksa long pes 13]

Taim bilong kaikai i gutpela taim tru bilong toktok long ol samting bilong spirit