Pasin Kristen Long Skul
1 Sapos yu wanpela yangpela Kristen i stap yet long skul, yu mas i gat strongpela bilip bambai yu inap stap gut long Jehova. Pasin nogut bilong ol wanskul na sampela narapela samting tu em inap traim bilip bilong yu. Olsem na yu mas bihainim tok bilong Pita na ‘wokabaut stret namel long ol haiden, na bai ol i lukim gutpela pasin bilong yu na litimapim nem bilong God.’ (1 Pi 2:12) Bilong mekim olsem, yu mas strongim bel.
2 Maski yu stap long skul o nogat, yu stap namel long ol man i pamuk, na tok doti, na smok, na kisim drak, na long olgeta de sampela traim i save painim yu—ol dispela samting inap bagarapim gutpela pasin bilong yu. Olsem man i bikpela pinis, yu tu mas “wok strong long lukautim bilip” bilong yu bambai yu inap sanap strong na winim ol hevi.—Ju 3; lukim Julai 15, 1991, Wastaua (tok Inglis), p. 23-26.
3 Long skul i gat ol bilaspasin bilong litimapim kantri, na ol bikpela de bilong dispela graun. Skul i save kirapim yu long tingim wanem ol bikpela de bilong lotu na bilong litimapim kantri? Yu save? Sapos wanpela samting i kamap na i laik traim bilip bilong yu, yu ting yu inap “stap stret long ai bilong God,” na ol man i ‘tok bilas long gutpela pasin yu mekim ol bai sem’?—1 Pi 3:16.
4 Ating ol spot bilong skul o ol bung bilong amamas ol inap pulim yu. Yu mas save olsem wanem ol dispela samting inap bagarapim bilip bilong yu. Olsem na yu mas bung wantaim ol man em ‘bilip bilong ol i ken strongim bel bilong yu.’—Ro 1:12.
5 Jehova Bai Helpim Yu na Yu Inap Sanap Strong: Oltaim Satan i wok long traim bilip bilong yu. Sampela traim ol i bikpela tru, tasol sapos yu sanap strong, bai yu kisim gutpela pe. (1 Pi 1:6, 7) Yu no inap sanap strong long strong bilong yu yet; yu mas askim Jehova long helpim yu. Jisas i tokim ol disaipel: “Yupela i mas was na prea i stap. Nogut traim i kamap long yupela na yupela i pundaun.” (Mt 26:41) Bilong mekim olsem, yu mas bosim gut yu yet.—1 Ko 9:27.
6 Yu mas save, Jehova bai skelim pasin bilong yu long kot bilong em. (Sav 11:9) Maski ol narapela i no lukim ol samting yu mekim, Jehova i save, na em bai skelim yu long ol dispela samting. (Hi 4:13) Sapos yu laik tru long mekim ol samting Jehova i laikim, dispela bai kirapim yu long ‘pret na wok strong long kisim dispela presen God i makim bilong yu.’ (Fl 2:12) Kaunim Baibel long olgeta de. Baibel i kamapim planti gutpela tok bilong helpim yu na i stori long planti man yu ken bihainim gutpela pasin bilong ol.—Hi 12:1-3.
7 Yupela ol papamama, yupela i gat bikpela wok. Yupela i mas bosim gut ol pikinini bilong yupela, na save long ol hevi bilong ol, na helpim ol. Olsem wanem? Yupela i save pas gut wantaim ol? Yupela i bin skulim gut ol na putim ol lo na ol tok bilong God long bel bilong ol na bai ol i ken pilim tru? Taim hevi na traim i painim ol pikinini, ol i stap strong, o ol i les hariap? Ol i bel hevi, long wanem, ol i mas i stap narapela kain long ol wanskul bilong ol? Yupela ol papamama i gat wok long helpim ol. (Lo 6:6, 7) Sapos yu mekim gut wok bilong yu, bai yu inap helpim ol long winim ol traim na sanap strong long bilip.—Snd 22:6.