Ol Papamama i Save Amamas!
1 Sapos yu wanpela yangpela i stap yet wantaim papamama Kristen, i gat wanpela bikpela rot bilong yu ken mekim ol i amamas. Sapos yu bihainim stretpela pasin, bai “papamama bilong yu i belgut tru na i amamas.” (Snd 23:22-25) Papamama i laik bai yu stap gutpela long bihain. Bai ol i amamas tru sapos bel bilong yu yet i pilim gut tok i tru na yu dediket long Jehova.
2 Yu ken amamas olsem papamama bilong yu ol i insait long tok i tru. Kirap long taim mama i karim yu, ol i bin lukautim yu long ol samting bilong kaikai, klos, haus, na lukautim gut yu taim sik i bin painim yu. Na bikpela samting moa yet, ol i bin wok long lainim yu long Jehova na ol stretpela pasin bilong em—ol i skulim yu olsem bilong helpim yu long kisim laip oltaim. (Ef 6:1-4) Yu ken mekim wanem bilong soim olsem yu pilim tru ol dispela samting?
3 Pilim Gut Tok i Tru: Papamama i bin wok long helpim yu long tingim gut tok i tru, na kamap strong long spirit, na pas gut wantaim oganaisesen bilong Jehova. Bilong soim olsem yu pilim tru ol dispela samting ol i bin mekim, gutpela sapos yu amamas long insait long famili-stadi na bai papamama i no gat wok long subim yu. Soim olsem yu gat laik long go long ol miting, na yu yet yu kirap na redi bambai famili i ken kamap long miting long taim stret. Sindaun wantaim papamama long taim bilong miting, na opim ol buk samting bilong stadi na lukim ol tok. Wok long bekim sampela tok. Redi long mekim ol tok ol i makim yu long mekim long Skul Bilong Wok Autim Tok. Tokim ol brata yu laik helpim ol long mekim sampela wok bilong lukautim Haus Kingdom. Sapos yu insait long ol dispela samting, dispela bai helpim yu long tingim ol gutpela samting bilong spirit.
4 Putim Sampela Mak Yu Laik Winim: Yu mas insait gut long wok bilong autim tok na wok long kamap pablisa. Kaunim hap bilong Baibel em sedyul i makim long olgeta wik, na i gutpela moa yet sapos yu wok long kaunim Baibel olgeta. Wok long winim ol mak bilong dediket na kisim baptais. Papamama i ken helpim yu long tingim gut ol samting yu laik stadi long en long skul, na bai dispela i ken helpim yu long insait tru long wok bilong Jehova. Wok long kisim gutnem na bai ol elda i ken orait long yu long mekim wok painia o wok long Betel samting. (Ap 16:1, 2) Sapos yu winim ol mak yu bin putim long yu yet, dispela bai helpim yu long ‘skelim gut olgeta pasin na bai ol stretpela pasin i pulap tru long yu.’—Fl 1:10, 11.
5 Taim yu yangpela yet, em taim bilong kisim save, na lain long mekim sampela wok, na kisim save long pasin bilong sindaun gut wantaim ol narapela. Na yu ken amamas—yu no gat ol hevi na ol wok bilong man i bikpela pinis. Solomon i tok: “Yupela i mas amamas long taim yupela i yangpela yet.” (Sav 11:9) Sapos yu tingting long mekim wok bilong Jehova taim yu yangpela yet, bai yu kisim planti blesing bilong i stap oltaim oltaim.—1 Sto 28:9.
6 Sapos yu “wok long kisim stretpela pasin” na yu “givim baksait long olgeta kain laik nogut i save kamap long bel bilong ol yangpela,” orait, papamama i no ken hevi na tingting planti. (2 Ti 2:22) Na yu yet bai i belgut tru. (Snd 12:25) Na bikpela samting moa yet, bai yu mekim Man bilong wokim yu, em God Jehova, i belgut tru.—Snd 27:11.