Redi Gut na Kisim Amamas Long Ol Miting
1 Yumi wanpela lain brata, olsem na i gutpela yumi mas bung wantaim long olgeta wik long ol miting bilong yumi. (1 Ti 4:15, 16) Olsem wanem yumi inap kisim amamas long ol miting na ol inap helpim yumi tru?
2 Yumi mas makim taim long olgeta wik bilong redim tok bilong ol miting. Ating sampela inap lusim bikpela hap taim, winim ol narapela. Tasol maski yumi gat planti wok long mekim, yumi bihainim gutpela tingting taim yumi makim taim bilong redim tok bilong ol miting. Sapos famili i redim ol tok wantaim dispela inap helpim ol tru.—Ef 5:15, 16.
3 Skul Bilong Wok Autim Tok: Wok long bihainim sedyul bilong kaunim Baibel long olgeta wik. (Jos 1:8) Lukim ol buk samting ol bai stori long en na kisim i kam wantaim yu bambai yu inap lukim taim brata i mekim tok. Tingim olsem wanem yu inap mekim wok long ol dispela save long taim yu autim tok.
4 Miting Bilong Wok: Lukim program bilong miting long Wok Kingdom. Kaunim ol stori em ol brata bai mekim tok long en. Sapos brata bai mekim tok long wanpela stori bilong Wastaua o bilong wanpela buk, orait kisim na kaunim dispela tu. Sapos sampela soim bai kamap, kaunim pastaim na bai yu redi long mekim wok long en taim yu autim tok.
5 Stadi Wastaua: Kaunim stadi paslain long miting na katim ol bekim. Sapos yu lukim ol skripsa bilong stadi, dispela bai helpim yu long kisim gut stadi. Tingim gut olsem wanem dispela stadi i helpim save yu kisim pinis—dispela bai i mekim save bilong yu i go bikpela moa. Redim tingting bilong yu long bekim sampela sotpela tok long wanpela o tupela paragraf long taim bilong stadi. Em bikpela rot bilong “tokaut long bilip bilong yumi.”—Hi 10:23.
6 Buk-Stadi Bilong Kongrigesen: Pastaim lukim ol tok bilong stadi; tingim het-tok bilong sapta na ol liklik het-tok. Bihain, taim yu kaunim, lukim wanem ol tok i bikpela tok. Kaunim ol skripsa i helpim ol dispela tok. Traim bekim tok long toktok bilong yu yet. Taim yu redim pinis stadi, tingting bek long en. Traim tingim gen ol bikpela tok na as bilong ol dispela tok.—2 Ti 2:15.
7 Kisim Amamas Long Ol Miting: Bilong kisim amamas tru long ol miting, em bikpela samting long kam long taim stret na bai yumi insait long beten taim brata i beten long kisim spirit holi bilong Jehova. Ol singsing inap helpim yu tu. Sapos yu no gat ol pikinini na i no gat narapela as bilong sindaun long baksait bilong Haus Kingdom, ating taim yu sindaun long ol sia klostu long pletfom bai i no gat planti samting bilong pulim nabaut tingting bilong yu na bai program inap helpim yu moa. Gutpela sapos ol papamama i gat ol liklik pikinini i ken sindaun long arere bilong ol lain sia na long baksait, na sapos ol i mas kisim pikinini i go ausait, dispela i no ken pulim tumas ai bilong ol brata sista.
8 Taim brata i kaunim ol skripsa, traim long lukim long Baibel. Dispela bai helpim yu long tingim gut ol tok yu harim. Stori wantaim famili na ol pren bilong yu long ol samting yu lainim. Olsem bai yu inap holim gut ol tok long tingting. Sapos yu bihainim ol dispela tok bai yu kisim amamas moa long ol miting, na bai ol miting i “kirapim [yumi] long laikim ol arapela na mekim ol gutpela pasin long ol.”—Hi 10:24, 25.