Bihainim Tok—No Ken Harim Nating Tasol
1 Ol Kristen tru long nau ol i save, ol i mas bihainim ol tok bilong God, ol i no ken harim nating tasol. (Je 1:22) Dispela i makim ol i narapela kain tru long ol man em ol i tok ol i Kristen, tasol ol i save litimapim nem bilong God long maus tasol. (Ais 29:13) Jisas i tokaut klia olsem, God bai kisim bek tasol ol man i bihainim laik bilong Em.—Mt 7:21.
2 Sapos yumi lotu long God, tasol yumi no mekim ol pasin God i laikim, yumi lotu nating tasol. (Je 2:26) Gutpela sapos yumi askim yumi yet olsem: ‘Olsem wanem ol pasin mi mekim i kamapim klia olsem mi bilip tru? Long olgeta wokabaut bilong mi, wanem samting i makim olsem mi save bihainim stret bilip bilong mi? Olsem wanem mi inap bihainim moa yet pasin bilong Jisas?’ Sapos yumi no giamanim yumi yet long bekim ol dispela askim, dispela bai helpim yumi long skelim pasin bilong yumi long mekim laik bilong God na bai yumi i ken wok strong moa sapos yumi mas mekim olsem.
3 Yumi bihainim Jisas, na olsem man bilong raitim Song, nambawan tingting bilong yumi long olgeta de i mas wankain olsem em i tok: “God, oltaim mipela i bin litimapim nem bilong yu. Na bai mipela i tok tenkyu long yu oltaim oltaim.” (Sng 44:8) Bilip Kristen i olsem wanpela rot yumi bihainim, na long olgeta de em i bosim olgeta samting yumi mekim. Yumi kisim bikpela amamas tru long olgeta wok yumi mekim, taim yumi mekim bilong litimapim nem bilong Jehova!—Fl 1:11.
4 Bilong Litimapim Nem Bilong Jehova Yumi Mas Mekim Sampela Wok Tu: Sapos God i laik yumi mekim gutpela pasin tasol, bai yumi gat wok tasol long stretim ol pasin bilong yumi. Tasol hap wok lotu bilong yumi tu em bilong tokaut long olgeta gutpela pasin bilong Jehova na autim nem bilong em long ol man!—Hi 13:15; 1 Pi 2:9.
5 Wok bilong autim gutnius em wanpela bilong ol bikpela wok yumi mekim. Jisas i givim bel tru long mekim dispela wok, long wanem, em i save ol man i harim tok ol inap kisim laip oltaim. (Jo 17:3) Long nau tu wok bilong “helpim ol manmeri long tok bilong God” em i bikpela samting; em dispela wanpela rot tasol bilong kisim bek ol manmeri. (Ap 6:4; Ro 10:13) Olsem na yumi save, long dispela as Pol i kirapim yumi strong long “autim tok bilong [God]” na yumi “mas wok strong” long mekim.—2 Ti 4:2.
6 Long olgeta de, wok bilong litimapim nem bilong Jehova i mas stap olsem wanem long i stap bilong yumi? Man bilong raitim Song i tok, oltaim em i save litimapim nem bilong Jehova. Yumi gat wankain tingting, a? Yes, yumi gat. Olsem na olgeta man yumi bungim bai yumi tingting long autim nem bilong Jehova long ol. Taim yumi toktok wantaim ol, bai yumi painim rot bilong stiaim tok i go long ol samting bilong spirit. Na bai yumi wok long go oltaim long ol bung bilong autim tok em kongrigesen i putim. Ol brata sista i no gat sampela samting i pasim ol, ol i ken tingting strong long mekim wok painia, long wanem, long dispela rot wok autim tok bai stap olsem nambawan bikpela samting long i stap bilong ol. Baibel i tokim yumi olsem, taim yumi strong long bihainim laik bilong God, yumi bai stap amamas.—Je 1:25.