Yumi Gat Planti Gutpela Samting Bilong Spirit, Winim Bilong Bipo!
1 Planti man i laik bai wanpela taim i ken kamap na ol i ken tok, “Mipela i gat planti gutpela samting, winim bilong bipo!” Long tingting bilong ol, dispela taim bai kamap taim ol i gat planti gutpela samting bilong skin na bai ol inap ‘malolo na kaikai na amamas i stap.’ (Lu 12:19) Tasol long ol samting bilong spirit, yumi inap tok, yumi no save sot long wanpela gutpela samting. (Sng 34:10) Olsem wanem yumi inap tok olsem?
2 Sindaun 10:22 i tok “Bikpela yet i givim yumi planti gutpela samting.” Tru tumas, yumi ken tok, “God i save givim yumi planti gutpela samting bilong mekim yumi amamas.” (1 Ti 6:17) Olsem na yumi gat planti gutpela samting tru, winim bilong ol narapela man!
3 Tingim Ol Blesing Yumi Kisim Pinis: Wan wan tasol bilong yumi i gat planti gutpela samting bilong skin. Tasol yumi kisim blesing, long wanem, yumi no save tingting planti tumas long ol samting yumi mas kisim bilong olgeta de. Jehova i save long ol samting yumi mas kisim, na em i tok promis long givim long yumi. (Mt 6:31-33) Dispela tok promis i mekim na yumi stap bel isi—em wanpela gutpela samting tru.
4 Tasol ol blesing bilong spirit i winim ol blesing bilong skin. Bilong kisim laip, yumi mas kisim ol kaikai bilong spirit i kam long Jehova. (Mt 4:4) Ol man i wetim ol lain bilong graun long givim kaikai bilong spirit long ol, bai ol i hangre—tasol yumi no hangre; yumi gat planti kaikai bilong spirit. (Ais 65:13) ‘Gutpela wokboi’ i helpim yumi long kisim planti save i bringim man long laip oltaim.—Mt 24:45; Jo 17:3.
5 Insait long bikpela lain brata bilong yumi i stap long olgeta hap bilong graun, i gat ol gutpela brata na sista yumi ken bung wantaim ol, em narapela i laikim tru narapela. (Jo 13:35) Kongrigesen em i gutpela ples i gat bel isi i stap long en, na i save mekim gut bel bilong yumi na i givim nupela strong long yumi. Ol elda i wok strong long was long yumi, na ol i helpim yumi long karim kain kain hevi. (Hi 13:17) Taim yumi go klostu long ol brata, dispela i save strongim yumi olgeta wantaim na bai yumi inap sanap strong.—Ro 1:11, 12.
6 Wok yumi mekim, em tu i wanpela blesing. I gat planti wok bilong skin ol man i les long mekim na ol i no kisim amamas long en. Wok bilong autim gutnius i mekim yumi yet na ol narapela man i amamas. (Ap 20:35) Tru tumas, yumi lukim gutpela samting i kamap long ol bikpela wok yumi mekim.—Sav 2:24.
7 Wanpela gutpela samting tru i olsem: Yumi bilip na wetim gutpela samting i kamap bihain. (Ro 12:12) Yumi wetim wanpela nupela taim i kamap i gat stretpela pasin i stap long en, na yumi wantaim famili bilong yumi inap i stap isi na amamas inap oltaim oltaim! Dispela samting yumi wetim i kamap em i winim olgeta amamas bilong dispela graun.—1 Ti 6:19.
8 Yumi Ken Mekim Wanem Bilong Kamapim Tenkyu Bilong Yumi? Yumi no inap givim wanpela samting long Jehova bilong bekim ol gutpela pasin em i bin mekim bilong helpim yumi. Tasol yumi ken kamapim tenkyu bilong yumi olsem: (1) Long olgeta de tok tenkyu long Jehova long gutpela pasin marimari em i bin mekim long yu (Ef 5:20), (2) bihainim ol tok bilong God na long dispela rot yu ken kamapim klia olsem yu laikim em tru (1 Jo 5:3), (3) mekim nem bilong em i stap holi long rot bilong autim gutnius (Sng 83:18, NW), na (4) helpim lain Kristen, givim bel long wok gut wantaim dispela lain.—1 Ti 3:15.
9 I gat planti samting i mekim na yumi inap i stap amamas tru, winim bilong olgeta narapela man long graun. (Sng 144:15b) Tingting bilong yumi, na pasin yumi mekim, na wok bilong God yumi mekim, ol dispela i mas kamapim klia olsem yumi stap amamas long paradais bilong spirit. Tru tumas, yumi gat planti gutpela samting, winim bilong bipo!