Long Gutpela Pasin Toktok Wantaim Ol Man na Bai Ol i Ken Pilim
1 Pasin bilong toktok wantaim man em olsem “narapela i givim tingting long narapela long rot bilong mekim tok.” Mekim tok long gutpela pasin na stori long samting ol narapela i save tingting planti long en em inap kirapim tingting bilong ol man, na em inap helpim yumi long putim tok bilong Kingdom i go daun long bel bilong ol. Ol samting i bin kamap i kamapim klia, sapos yumi toktok wantaim ol man long gutpela pasin isi na yumi no autim wanpela bikpela tok long ol, ol gutpela samting inap kamap.
2 Rot Bilong Kirapim Toktok Long Gutpela Pasin: Bilong yumi ken toktok wantaim ol narapela, i no olsem yumi mas redim ol bikpela bikpela tok na planti skripsa. Nogat. Yumi mas kirapim ol narapela long toktok wantaim yumi. Olsem: Taim yumi toktok wantaim man i stap klostu long yumi, yumi save toktok long kain kain samting. Yumi no tingim wanem ol tok bai yumi mekim, nogat; yumi toktok tasol wantaim em long ol samting em i kamapim. Sapos yumi givim bel long harim ol tok bilong em, dispela inap kirapim em long toktok yet wantaim yumi. Em wankain long taim yumi autim tok long ol narapela.
3 Bilong toktok wantaim man long gutpela pasin, yumi ken toktok long ol pasin raskol, ol hevi bilong ol yangpela, ol samting i kamap long hap bilong yumi o long olgeta hap bilong graun, o long san ren win samting. Sapos yumi stori long ol samting i save painim ol man, dispela i gutpela rot bilong kirapim tingting bilong ol long harim tok. Taim yumi kirap pinis long toktok wantaim man, nau isi isi yumi ken stiaim tok i go long tok bilong Kingdom.
4 I no olsem yumi no ken redi pastaim bilong toktok wantaim man. Nogat. Yumi mas redi. Tasol, yumi no gat wok long wokim wanpela autlain o tingim wanpela bikpela tok yumi laik autim, sapos yumi mekim bai yumi no inap senisim na mekim ol tok i stret long ol man o long samting yumi toktok long en. (Skelim wantaim 1 Korin 9:20-23.) Gutpela rot bilong redi em olsem, makim wanpela o tupela bikpela tok bilong Baibel bilong stori long en. Sapos yu lukim gen ol bikpela tok i stap long buk Toktok Gut, dispela bai helpim yu long mekim olsem.
5 Ol Gutpela Pasin Bilong Toktok Wantaim Man: Taim yumi toktok wantaim ol narapela, yumi mas mekim gutpela na stretpela pasin. Sapos yumi lap liklik na amamas dispela inap kamapim klia ol pasin bilong yumi. Tok yumi autim em nambawan gutpela tok long dispela graun; na em inap pulim tingting bilong ol man i gat gutpela bel. Sapos ol i pilim olsem yumi laikim ol tru, na dispela i kirapim yumi long autim sampela gutnius long ol, ating dispela bai kirapim ol long harim tok bilong yumi.—2 Ko 2:17.
6 Pasin bilong toktok wantaim ol man, em i gutpela samting tru. Olsem na yumi mas mekim gutpela na stretpela pasin taim yumi autim tok bilong Kingdom. (Ga 5:22; Kl 4:6) Wok strong long mekim olsem, na taim yumi lusim man, em bai tingim ol gutpela pasin bilong yumi. Long dispela rot, maski bel bilong em i no bin pilim gut ol tok long dispela taim, ating long narapela taim em bai harim gut tok taim wanpela Witnes i toktok wantaim em .
7 Bilong kirapim toktok wantaim man long gutpela pasin, i no olsem yumi mas save gut long autim wanpela bikpela tok, nogat. Yumi mas toktok long ol samting ol man i save tingting planti long en, na kirapim man long harim. Sapos yumi redi gut pastaim, nau bai yumi inap toktok wantaim ol man long gutpela pasin. Yumi mas wok strong long putim dispela tok i go daun long bel bilong ol man yumi bungim. Na toktok wantaim ol long dispela gutpela tok tru—em tok bilong ol blesing bilong oltaim em Kingdom bai kamapim.—2 Pi 3:13.