Husat Inap Long Autim Tok?
1 Long wok autim tok, yu bin pilim wankain olsem Moses? Em i bin tok: “Tasol Bikpela, bipo mi no man bilong toktok gut long ai bilong planti man. Na nau yu toktok wantaim mi, tasol dispela i no mekim mi i kamap man bilong toktok.” (Kis 4:10) Sapos yu pilim olsem, ating yu no laik insait long wok autim tok. Tasol Jisas i tokim yumi “long autim tok long ol manmeri na tokaut klia.” (Ap 10:42) Olsem na long wanem rot yumi inap winim mak bilong man bilong autim gutnius?
2 Save yumi kisim long skul, i no dispela samting i ken inapim yumi long mekim wok autim tok. Pol i bin tok: “Planti bilong yupela i no bin i stap olsem saveman long ai bilong ol man” na “save bilong dispela graun em i olsem longlong pasin tasol long ai bilong God.” (1 Ko 1:26; 3:19) Jisas i bin makim ol aposel bilong em namel long ol man nating—inap fopela bilong ol i man bilong kisim pis. Ol hetman bilong lotu i bin tingim ol olsem man “i no bin skul” na olsem “man nating tasol.” Long tingting bilong ol, ol aposel i no winim mak bilong mekim wok autim tok. Tasol strongpela tok Pita i bin mekim long de Pentikos i kirapim 3,000 manmeri long kisim baptais!—Ap 2:14, 37-41; 4:13.
3 Jehova i Save Inapim Yumi Long Autim Tok: Pol i bin tokaut: “God wanpela tasol i save mekim mipela inap long dispela wok.” (2 Ko 3:5) Jehova, em As bilong gutpela save, i bin skulim planti milion manmeri long autim tok i tru bilong Kingdom long ol narapela. (Ais 54:13) Dispela wok i kamap gut na karim planti kaikai, long wanem, yumi lukim 338,491 i bin kisim baptais long yia i go pinis na ol i stap olsem “pas bilong tokim ol man long pasin bilong mipela.” (2 Ko 3:1-3) I gat gutpela as na yumi ken tingting strong long autim tok long ol samting Jehova i bin skulim yumi long en.
4 Long olgeta hap, oganaisesen bilong God i bin kamapim ol skul bilong lainim ol wokman bilong God. Long rot bilong Baibel na kain kain buk na nius bilong Baibel, yumi kisim skul na lain long “kisim tru olgeta gutpela pasin, na em i mekim yumi i redi long mekim” wok autim tok. (2 Ti 3:16, 17) Planti man i amamas long ol save i stap insait long ol buk na nius bilong Sosaiti. Olsem: Wanpela nius bilong Swiden i tok: “As bilong bilip ol Witnes Bilong Jehova i save autim, em bikpela save bilong ol long Baibel i stret long ol man bilong olgeta hap.”
5 Yumi gat faipela miting, na program bilong yumi long kaunim Baibel na stadi, na ol tok bilong stretim yumi long Skul Bilong Wok Autim Tok, na helpim yumi wan wan i kisim long ol strongpela brata sista, na bikpela samting moa, em spirit holi bilong Jehova bilong helpim yumi; olsem na yumi ken bilip tru olsem Jehova i tingim yumi olsem yumi inap tru long mekim wok autim tok. “Mipela i kisim dispela wok long God yet . . . Mipela i wanbel wantaim Krais, na long ai bilong God mipela i save autim stret ol tok.”—2 Ko 2:17.
6 Sapos yumi kisim tru olgeta samting God i skulim yumi long en long rot bilong oganaisesen bilong em, i no gat as na bai yumi surik o pret. Yumi ken amamas long autim tok long ol narapela, na yumi ken save tru olsem Jehova bai blesim ol wok yumi mekim.—1 Ko 3:6.