Mi Inap Tru Long Autim Tok?

1. Bilong wanem yumi no ken ting olsem yumi no inap mekim wok autim tok?

¹ No ken tingting planti sapos yu save mekim kain askim olsem! Skul yumi kisim o save yumi gat bilong mekim sampela samting, ol dispela samting i no mekim na yumi inap tru long mekim wok autim tok, nogat. Ol man i bin kolim sampela disaipel bilong pastaim olsem ol man ‘i no bin skul na ol i man nating tasol.’ Tasol maski i olsem, ol i bin mekim gut wok bilong autim gutnius, long wanem, ol i strong long bihainim pasin bilong Jisas.​​—⁠Ap. 4:​13; 1 Pi. 2:​21.

2. Wanem sampela pasin bilong Jisas long skulim ol man?

² Pasin Bilong Jisas Long Skulim Ol Man: Taim em i skulim ol man, em i mekim ol tok ol man i kliagut long en na i no hatwok long kisim, na inap helpim tru ol. Ol askim, tok piksa, na ol kirap bilong tok bilong Jisas, i kirapim tru tingting bilong ol man i harim tok. (Mt. 6:​26) Em i tingim tru ol manmeri. (Mt. 14:14) Na tu, Jisas i no pret long toktok na em i toktok olsem man i gat namba, em i save olsem Jehova i bin givim wok long em na i strongim em long inapim wok bilong em.​​—⁠Lu. 4:​18.

3. Long wanem ol rot Jehova i helpim yumi long inapim tru wok autim tok bilong yumi?

³ Jehova i Save Helpim Yumi: Long rot bilong Tok na oganaisesen bilong em, Nambawan Bikpela Tisa bilong yumi i skulim yumi long mekim gut wok bilong autim gutnius. (Ais. 54:13) Yumi inap skelim pasin bilong Jisas long skulim ol man na bihainim, long wanem, Jehova i putim ol dispela stori long Baibel. Jehova i save givim holi spirit bilong em long yumi na i skulim yumi long rot bilong ol miting bilong kongrigesen. (Jo. 14:26) Na tu, i gat ol pablisa i save gut long mekim wok autim tok, em ol inap helpim yumi long mekim gut wok.

4. Bilong wanem i gat as tru na yumi ken ting olsem yumi inap tru long autim gutnius long ol narapela?

⁴ I gat as tru na yumi ken ting olsem yumi inap tru long mekim wok autim tok, long wanem, ‘God wanpela tasol i save mekim yumi inap long dispela wok.’ (2 Ko. 3:⁠5) Taim yumi bilip na wet long Jehova i helpim yumi na yumi mekim gutpela wok long ol samting em i givim, bai yumi “kisim tru olgeta gutpela pasin, na . . . redi long mekim olgeta kain gutpela wok.”​​—⁠2 Ti. 3:​17.