Helpim Ol Manmeri i Sot Long Ol Samting
1 Jehova i save lukautim yumi long ol samting bilong spirit long rot bilong lain gutpela “wokboi.” (Mt 24:45-47) Yumi kisim ol samting bilong spirit long rot bilong ol buk, ol Baibel, ol volyum, ol video, ol kaset, na ol CD bilong kompiuta bilong helpim yumi long skelim tok bilong Baibel. Ol samting Jehova i save givim long yumi em inap tru long skel bilong yumi, na ol dispela samting i no lus nating. Nogat.
2 Bilong wokim ol dispela samting ol i mas tromoi planti mani. Ol brata sista i stap long olgeta hap ol i save baim ol dispela samting. Dispela em i tru moa yet long nau, long wanem, oganaisesen i kirap tilim ol buk samting na ol i no makim pe bilong ol dispela samting, ol man yet i ken givim kontribusen long laik bilong ol yet.
3 Ol Samting Yumi Inap Mekim: Yumi ken bihainim tok bilong Pol bilong helpim ol man “i sot long ol samting.” (Ro 12:13) Taim yumi givim ol kontribusen bilong helpim wok long olgeta hap, yumi wok long givim ol samting bilong yumi bilong helpim ol brata i stap long ol narapela hap bilong graun. Sampela ol i tingim dispela samting na ol i makim hamas mani ol i laik givim olsem kontribusen long olgeta mun bilong helpim wok long olgeta hap, wankain olsem ol i save mekim bilong helpim kongrigesen long baim ol samting bilong Haus Kingdom. Ol i save dispela mani i no bilong wokim ol buk samting tasol, nogat; em i bilong helpim olgeta wok bilong Kingdom.
4 Na tu, yumi inap helpim ol brata i sot taim yumi no odaim planti tumas bilong ol dispela samting yumi inap kisim. Yumi mas tingim dispela samting taim yumi odaim ol samting Sosaiti i mas lusim bikpela pe bilong wokim. Ol dispela samting i olsem: Ol video, ol CD-ROM, ol bikpela buk na volyum, na ol sabskripsen long kaset. Taim yumi odaim ol samting long skel tasol—olsem wanpela samting tasol bilong famili olgeta—dispela i mekim na ol brata bilong yumi long ol narapela hap ol inap kisim ol samting bilong spirit ol i mas kisim bambai ol inap i stap strong na autim gutnius long hap ol i stap long en.—Hi 13:16; Fl 2:4.
5 Ol kontribusen yumi givim long Haus Kingdom bilong helpim wok bilong Sosaiti long olgeta hap na ol kontribusen bilong ol man yumi tilim nius samting long ol, ol dispela mani inap baim hap bilong ol samting yumi tilim long ol man. Tasol taim yumi kisim ol samting bilong yumi yet olsem ol buk singsing, ol yia buk, na ol Baibel, yumi no ken ting ol kontribusen bilong ol man ausait bai baim ol dispela samting. Klostu olgeta mani bilong baim ol dispela samting em lain bilong Jehova i save baim. Planti pablisa i tingim dispela samting, na ol i skelim pe bilong ol kain buk olsem em hamas long ol stua, na nau ol i givim kontribusen long mak bilong pe bilong stua. Sapos yumi no givim kontribusen bilong inapim pe bilong ol samting yumi kisim, dispela inap mekim na bai oganaisesen i no inap mekim wok ol i laik mekim long olgeta hap.
6 Jisas i bin tok ol disaipel tru bilong em bai laikim tru ol wanbilip bilong ol na dispela bai soim olgeta man olsem ol i disaipel bilong em. (Jo 13:34, 35) Pasin bilong yumi long givim kontribusen na long helpim ol narapela i sot long sampela samting, em i gutpela rot bilong soim olsem yumi Kristen tru.