“Yupela i Mas Tenkyu Long God”
1 Taim yumi liklik, ol i lainim planti bilong yumi long tok “plis” o “tenkyu” taim wanpela i mekim gutpela pasin long yumi. Pol i tokim yumi long tenkyu long ol narapela, na yumi mas tenkyu moa yet long Jehova. (Kl 3:15, 16) Tasol olsem wanem yumi inap kamapim tenkyu bilong yumi long Bikpela Man bilong wokim yumi? Na i gat wanem as na yumi mas tenkyu long em?
2 Aposel Pol i tok: “Tasol yumi tenkyu long God. Long strong bilong Bikpela bilong yumi Jisas Krais, God i save strongim yumi na yumi winim pait.” (1 Ko 15:57) Long taim bilong Memorial long olgeta yia, yumi tingim bikpela pasin sori em God na Krais i bin mekim taim ol i givim ofa i opim rot long yumi bilong kisim laip oltaim long bihain. (Jo 3:16) Klostu yumi olgeta i gat wanpela wanblut i bin dai, olsem na yumi amamas tru long tok promis Jisas i mekim long kirap bek! Bel bilong yumi i amamas tru taim yumi tingim olsem yumi inap abrusim bagarap bilong pasin nogut bilong nau na yumi no ken i dai. (Jo 11:25, 26) Bai yumi hatwok long painim ol tok i kamapim tru tenkyu bilong yumi long olgeta gutpela blesing yumi bai kisim long bihain taim graun i kamap Paradais. (KTH 21:4) Em ol gutpela as tru na yumi olgeta i ken tenkyu long God.
3 Rot Bilong Tok Tenkyu Long God: I stret yumi ken beten oltaim bilong tok tenkyu long Jehova long ol gutpela pasin bilong em. (Sng 136:1-3) Na tu, yumi laik kamapim tenkyu bilong yumi long ol narapela gutpela rot. Olsem: Bai yumi kam long Memorial bilong tingim i dai bilong Krais, long Sande Mas 23. Bilong helpim kongrigesen na wok autim tok long olgeta hap, yumi amamas long givim biknem long Jehova long rot bilong mani samting bilong yumi. (Snd 3:9) Yumi helpim tru ol elda na wok gut wantaim ol, na long dispela rot yumi kamapim amamas bilong yumi long Jehova long helpim em i save givim yumi long rot bilong ol. (1 Te 5:12, 13) Long olgeta de, yumi wok strong long bihainim stretpela pasin i save litimapim nem bilong God. (1 Pi 2:12) Jehova i save amamas long olgeta dispela pasin i kamapim tenkyu bilong yumi.—1 Te 5:18.
4 Nambawan Gutpela Rot Bilong Tok Tenkyu: Taim yumi givim bel tru long autim tok, litimapim nem bilong Jehova, kamapim amamas bilong yumi long rot bilong beten, na i stap gut long tok i tru, yumi bihainim ol gutpela rot tru bilong kamapim tenkyu bilong yumi long Man bilong wokim yumi long olgeta samting em i bin mekim bilong helpim yumi. Jehova i save amamas long lukim yumi i mekim wok holi bilong em bilong kamapim laik bilong em olsem “em i laik kisim bek olgeta manmeri.” (1 Ti 2:3, 4) Olsem na planti pablisa tru i bihainim tok bilong Wok Kingdom bilong Februeri long putim nem bilong mekim wok painia haptaim long mun Mas, Epril, na Me, o long wanpela bilong ol dispela mun. Mekim sampela wok moa long wok bilong autim tok em wanpela gutpela rot bilong yumi ken tenkyu long God. Olsem wanem? Yu inap mekim wok painia haptaim long Epril? o Me?
5 Yumi inap bilip tru long yumi bai kisim laip oltaim long bihain. Taim yumi lukim dispela i kamap tru, bai yumi gat planti gutpela as na yumi ken tok tenkyu long Jehova long olgeta de.—Sng 79:13.