Strongim Famili Bilong Yu
1 Tru tumas, long olgeta hap bilong graun, sindaun bilong ol famili i wok long bagarap. Ol manmeri bilong dispela graun Satan i bosim i strong long mekim pasin giaman na pasin pamuk. (1 Jo 5:19) Olsem na em i bikpela samting long yumi mas ‘strongim famili bilong yumi’ na skulim ol narapela long mekim wankain samting long famili bilong ol.—Snd 24:3, 27.
2 Ol Lo Bilong Baibel i Bilong Lukautim Yumi: Ol famili inap i stap amamas tru taim ol i bihainim ol lo bilong Baibel. Ol dispela strongpela tok i tru inap helpim olgeta long famili long olgeta taim. Taim ol famili i bihainim ol dispela lo, ol bai i stap amamas na kisim bel isi i save kam long God.—Skelim wantaim Aisaia 32:17, 18.
3 Ol dispela lo bilong helpim yumi long strongim famili bilong yumi, ol i stap long buk Rot Bilong Kamapim Amamas Insait Long Famili. Olgeta wan wan sapta bilong buk i kamapim ol lo em olgeta long famili i mas tingim. Buk i kamapim ol tingting bilong God bambai yumi ken kisim tingting bilong em long ol samting buk i toktok long en.—Ais 48:17.
4 Kirap long 1980, taim ol i kamapim dispela buk long tok Pisin, planti bilong yumi i bin kaunim na stadi long buk Famili. Tasol olsem wanem? Taim ol hevi i kamap, yumi inap painim hariap ol lo bilong helpim yumi? Buk i stori long ol dispela samting: man o meri i tingting long marit em i mas tingim wanem ol samting (sapta 2), wanem ol bikpela samting i save helpim marit long i stap amamas oltaim (sapta 3), rot bilong mekim pasin sori i kamap bikpela insait long marit (sapta 6), rot bilong ol papamama i ken stretim ol pikinini long pasin sori (sapta 10), rot bilong kisim amamas taim yumi go lapun (sapta 13), na rot bilong mekim ol samting bambai famili i ken i stap oltaim long bihain (sapta 14).
5 Mekim Tru Wok Long Dispela Buk: Sapos yupela i no bin mekim famili-stadi long buk Famili, o yupela i bin mekim longtaim i go pinis, i gutpela sapos yupela i kirap mekim nau. Na tu, taim ol nupela hevi i kamap long famili, stadi gen long ol sapta long buk i stori long dispela samting, na beten na tingim rot bilong bihainim dispela tok. Narapela samting tu, long mun Mas, makim bikpela hap taim bilong autim tok bambai yu ken wok strong long tilim buk Rot Bilong Kamapim Amamas Insait Long Famili long planti manmeri.
6 Ol famili i save givim bel long God, ol bai kisim strong long spirit na ol i stap wanbel na redi gut long karim ol hevi em Satan i putim long ol. (1 Ti 4:7, 8; 1 Pi 5:8, 9) Yumi amamas tru, long wanem, God, em Man bilong kamapim famili, em i save skulim yumi!