“Yupela i Mas Wok Strong”
1 Taim yumi dediket long Jehova, yumi bin tok promis long givim ol gutpela samting bilong yumi long em. Olsem na i stret aposel Pita i strongim ol Kristen bilong pastaim long wok strong long i stap olsem lain tru bilong Jehova. (2 Pi 1:10) Tru tumas, long nau yumi olgeta i laik wok strong bilong amamasim Jehova. Olsem wanem yumi ken mekim dispela samting? Taim yumi pas gut wantaim Jehova na tingim long bel ol gutpela samting em i bin mekim bilong helpim yumi, bel bilong yumi i save kirapim yumi oltaim long wok strong long mekim wok bilong em. Yumi laik mekim wok bilong yumi i kamap gutpela moa, na sapos inap, yumi laik mekim bikpela wok moa long autim tok.—Sng 34:8; 2 Ti 2:15.
2 Wanpela yangpela brata i laik mekim bikpela wok moa long autim tok, em i pilim olsem, taim em i stadi oltaim long Tok Bilong God, dispela i bin helpim em long laikim Jehova moa na i kirapim em long wok strong moa. Dispela i bin kirapim em long putim aplikesen bilong mekim wok painia. Wanpela sista i bin hatwok long toktok wantaim ol narapela man, em i lainim sampela pasin bilong toktok wantaim ol man olsem i stap long buk Toktok Gut, na i no longtaim em i amamas long mekim gutpela wok moa long autim tok. Em i bin kirapim Baibel-stadi wantaim tupela marit na ol i kam insait long tok i tru.
3 Amamas Long Samting Yu Inap Mekim: Ol kain kain samting i save givim hatwok long sampela bilong yumi, kain olsem sik, ol wanblut i birua, stap rabis, o ol man long teritori i les long harim tok. Planti ol narapela hevi i stap nau long dispela taim bilong las de ating ol inap pasim yumi long autim tok. (Lu 21:34; 2 Ti 3:1) Olsem wanem? Dispela i makim olsem yumi no truim dediket bilong yumi long Jehova? Nogat! Sapos yumi wok strong inap long skel bilong yumi, yumi truim dediket bilong yumi.
4 I no gutpela sapos yumi lukim ol wok ol narapela inap long mekim na yumi skelim yumi yet long dispela samting. Baibel i kirapim yumi long ‘skelim wok bilong yumi yet.’ Sapos yumi mekim tru wok inap long skel bilong yumi wan wan, dispela i save amamasim Jehova na yumi tu i ken amamas long wok bilong yumi.—Ga 6:4; Kl 3:23, 24.
5 Yumi olgeta i mas bihainim tok bilong Pita long ‘wok strong long mekim yumi yet i stap klin long ai bilong God na yumi no gat asua long wanpela samting na yumi stap wanbel wantaim God.’ (2 Pi 3:14) Dispela tingting bai helpim yumi long i stap isi na yumi inap kisim bel isi Jehova tasol inap givim long yumi.—Sng 4:8.