“Olsem Wanem? Bihain Bai Olgeta Man i Laikim Tru Ol Narapela?”
1 Long olgeta hap bilong graun, long 169 tok ples, ol bai autim wanpela gutpela tok bilong kirapim na mekim gut bel bilong ol man. Wanem dispela tok? Ol bai autim dispela tok olsem wanem?
2 Dispela tok em bilong pasin bilong laikim ol narapela. Dispela tok i stap insait long Kingdom Nius Namba 35, nem bilong en, “Olsem Wanem? Bihain Bai Olgeta Man i Laikim Tru Ol Narapela?” Long sotpela tok tasol dispela Kingdom Nius i skelim pasin i stap long nau long olgeta hap bilong graun, na i kamapim olsem ol man i no laikim narapela na dispela i as bilong planti hevi na pen. Na em i tokaut bilong wanem long taim bilong yumi ol man i lusim pasin bilong laikim ol narapela, na dispela bai kamapim wanem samting long bihain.
3 Na tu, Kingdom Nius Namba 35 i soim ol man olsem pasin tru bilong laikim ol narapela em i stap namel long planti milion manmeri long taim bilong yumi. Nius i tokaut klia husat i insait long wok bilong kamapim bek wok Kristen bilong pastaim—pasin bilong laikim ol narapela olsem Jisas i bin skulim ol man long en, em i mak bilong lotu i bin i stap long taim bilong ol aposel.—Lu 10:25-37.
4 Bilong pinisim ol tok, Kingdom Nius Namba 35 i stori long olsem wanem klostu nau olgeta manmeri bai bihainim pasin bilong laikim tru ol narapela aninit long Kingdom bilong God em Krais i bosim. Nius i kirapim ol man i kaunim dispela tok long kisim buklet God i Laik Yumi Mas Mekim Wanem? na ol i ken kisim save long olsem wanem ol i ken i stap aninit long dispela Kingdom em bai stap long olgeta hap graun olsem Baibel i stori long en.
5 Husat Bai Autim Dispela Tok? Long mun Oktoba na Novemba, ol Witnes Bilong Jehova long olgeta hap bilong graun ol bai autim dispela tok long ol pren, ol man i stap klostu, na ol wantok bilong ol. Mipela i laik kirapim olgeta man i winim mak olsem pablisa long insait long wok bilong tilim Kingdom Nius Namba 35 long olgeta manmeri.
6 Nambawan bikpela as na yumi mekim dispela wok em bilong kirapim tingting bilong ol man long mekim Baibel-stadi long buklet Yumi Mas Mekim Wanem? o long buk Save. Na tu, taim olgeta wan wan wokman bilong Jehova i givim bel olgeta long mekim dispela wok, dispela bai litimapim nem bilong God bilong pasin sori, em Jehova, na Pikinini bilong em, Krais Jisas.