Yu Save Mekim Wanem Taim Ol Man i Les Long Harim Tok?
1 Pasin bilong les long harim tok i olsem: Bel bilong man i no pilim wanpela tok, em i no kirap, o em i no gat laik long harim tok. Planti taim dispela kain pasin i givim hevi long yumi taim yumi autim tok. Yu save mekim wanem taim ol man i no laik harim tok? Dispela i mekim na yu no strong moa long autim tok? Olsem wanem yu inap winim dispela hevi bambai yu ken autim tok bilong Kingdom long ol man?
2 Pastaim yu mas save, bilong wanem ol man long teritori ol i les long harim tok. Olsem wanem? Ol i les long harim tok, long wanem, ol i no amamas long ol bikman long politik na lotu bilong ol? Ol i pilim olsem ol i no gat rot bilong stretim ol hevi i painim ol? Ol i gat tupela tingting long ol tok promis bilong ol gutpela samting bai kamap bihain? Ol i no laik tingim ol samting bilong spirit, long wanem, ol i laik lukim stret long ai bilong ol olsem wanem dispela inap helpim ol?
3 Stori Long Ol Samting Kingdom Bai Mekim: I no gat wanpela hevi em Kingdom i no inap long stretim. Olsem na taim rot i op, yumi ken kamapim ol bikpela tok bilong Baibel bilong stori long ol tok promis bilong Kingdom, maski yumi no inap kaunim wanpela skripsa. (Hi 4:12) Tasol olsem wanem yumi ken stiaim stori i go long ol dispela tok?
4 Ol man i mas save i gat wanem as na yumi kam lukim ol. Ol i mas save olsem yumi go lukim ol, long wanem, yumi tingim ol man na yumi sori long ol. Yumi ken mekim wanpela gutpela askim kain olsem, “Yu ting wanem samting inap stretim [kolim wanpela hevi i go bikpela long hap bilong yupela]?” Sapos yu traim wanpela rot bilong toktok wantaim ol man na dispela i no kamap gutpela, traim narapela rot.
5 Long wanpela teritori em planti maniman i stap long en na ol i no laik harim tok bilong Kingdom, ol pablisa i bin wok strong long mekim wanpela kirap bilong tok em inap kirapim man long harim tok. Bilong tilim buk Save, tupela marit i bin traim dispela kirap bilong tok: “Yu ting em i bikpela samting long man i mas skul gut bambai dispela i helpim em long nau? Yu wanbel long tok olsem, man i skul gut em i mas save tu long Baibel?” Long wanpela apinun ol i bin tilim 3-pela buk, wanpela ol i tilim long wanpela meri bihain em i tok, em i kaunim buk Save olgeta na em i orait long stadi long Baibel.
6 Taim ol man i les long harim tok bilong yu, traim kain kain rot bilong toktok wantaim ol, mekim ol gutpela askim bilong kirapim tingting, na mekim wok long ol tok bilong Baibel em i gat strong. Long dispela rot, ating yu inap helpim ol narapela long wetim tu ol gutpela samting bilong Kingdom.