Olsem Wanem Olgeta Long Famili i Ken Wok Wantaim—Long Insait Tru Long Ol Miting
1 Ol famili Kristen i mas bihainim tok bilong Baibel i tok yumi mas bung wantaim long ol miting bilong kongrigesen. (Hi 10:24, 25) Sapos olgeta long famili i wok gut wantaim, ol inap redim gut ol tok bilong ol miting, go long ol miting, na insait long ol miting. Sindaun bilong ol famili i narapela narapela, tasol i gat sampela samting em wanpela papa Kristen, wanpela meri i bilip, o wanpela mama o papa singel em i ken mekim bilong helpim famili bambai ol i ken mekim ol samting bilong spirit wantaim, maski i gat hamas pikinini long haus na hamas krismas ol i gat.—Snd 1:8.
2 Redi Gut: Olgeta long famili i ken wok gut wantaim bilong helpim narapela narapela long redi gut long ol miting bilong kongrigesen. Planti famili i save skelim wantaim ol stori bilong Stadi Wastaua bilong wik. Sampela i save sindaun wantaim na redim Buk-Stadi Bilong Kongrigesen o kaunim hap bilong Baibel em sedyul i makim bilong kaunim long dispela wik. Em bilong helpim famili long tingim ol bikpela tok paslain long ol i go long miting. Long dispela rot, ol tok i kamap long miting bai helpim moa yet olgeta wan wan na ol bai redi long insait long bekim ol tok samting taim rot i op.—1 Ti 4:15.
3 Tingting Long Insait Long Ol Miting: Olgeta long famili i mas putim mak long kamapim bilip bilong ol long ai bilong narapela long rot bilong bekim ol tok long ol miting. (Hi 10:23) Olsem wanem? Yumi mas helpim o strongim wanpela long famili long mekim olsem? Olgeta wan wan insait long famili i mas kisim wanem helpim bilong redim ol tok ol i mas mekim long Skul Bilong Wok Autim Tok? Ol meri i save amamas taim man bilong ol i tingim ol na givim sampela tingting long ol, olsem ol i ken mekim wok long wanem kain tok piksa o wanem rot i gutpela bilong mekim tok. Ol papamama i no ken ting ol i mas redim tok bilong ol pikinini bilong ol. Dispela i no inap helpim pikinini long lain long mekim ol samting. Tasol ol papamama i ken helpim ol pikinini na harim ol taim ol i kaunim strong ol tok bilong ol long haus.—Ef 6:4.
4 Stretim Gut Ol Samting na Go Long Ol Miting: Taim ol pikinini i liklik yet, skulim ol long bilas na redi long go long ol miting long taim yupela i makim. Olgeta long famili i mas wok wantaim long mekim ol wok bilong haus, bambai ol dispela wok i no inap pulim taim bilong ol.—Lukim ol tok bilong buk Family Happiness, pes 112, na Askim Bilong Ol Yangpela, pes 316, 317.
5 Ol papamama na ol pikinini i ken tingim tok bilong Josua long bipo, em i tok: “Tasol mi wantaim famili bilong mi, mipela bai i lotu long Bikpela tasol.” Orait nau yupela i ken pasim tok long wok wantaim bilong insait tru long ol miting bilong kongrigesen.—Jos 24:15.