“Bai Mi Mekim Wanem?”
1 Sapos yu wanpela yangpela i wok long kamap man o meri i bikpela pinis, ating yu gat askim olsem, ‘Bai mi mekim wanem long laip bilong mi?’ Ol yangpela Kristen i laik mekim moa yet wok bilong Jehova long autim tok. Tasol olsem wanem yu inap mekim olsem? Long wanem yu mas mekim ol wok bilong man o meri i bikpela pinis, olsem lukautim yu yet long ol samting bilong skin. Ating i hatwok long painim bekim bilong dispela askim. Na tu, long Papua Niugini ating ol bai givim wok long yu long lukautim papamama long ol samting bilong skin taim ol i go lapun.
2 Sampela yangpela bai tingting planti taim ol i lukim ol hevi bilong mani samting long olgeta hap bilong graun na taim ol i tingim ol samting i kamap bihain. Ol inap tingting planti olsem: ‘Olsem wanem? Bai mi kisim sampela skul moa? Mi mas insait long wok painia wantu tasol?’ Bilong helpim man long makim rot i stret, em i mas bekim stret dispela askim, ‘Wanem samting em i nambawan bikpela samting long laip bilong mi?’ Em i mas skelim gut ol tingting i stap long bel bilong em.
3 Yu na papamama bilong yu, yupela i bin tingim wanem samting i olsem nambawan samting yu bai mekim taim yu stap yangpela yet? Yu tingting strong long mekim ol samting bilong kisim bikpela mani, o yu gat laik tru long mekim ol wok bilong Kingdom? Maski man i winim bikpela skul yunivesiti, dispela i no makim olsem em bai painim wanpela gutpela wok. Planti i bin lainim ol wok em inap helpim ol long painim wanpela wok mani, long rot bilong wok aprentis samting, o go long vokesenel skul o teknikel koles samting, o sampela i mekim ol sotpela kos long ol yunivesiti em i no kisim bikpela hap taim bilong ol.
4 Bilip Long Tok Promis Bilong Jehova: Wanpela bikpela samting yu ken tingim em olsem Jehova i tok em bai lukautim ol man i putim ol samting bilong Kingdom i stap nambawan long laip bilong ol. (Mt 6:33) Dispela i no wanpela tok promis nating. Planti brata em ol i bin i go long Skul Bilong Lainim Wok Bilong Lukautim Kongrigesen, paslain long ol i kisim tok i tru, ol i bin winim bikpela skul yunivesiti. Tasol ol i bin mekim wanem ol wok bilong skin? Wan wan ol i bin mekim ol wok ol i lainim long yunivesiti. Planti i bin mekim sampela narapela wok i helpim ol long lukautim ol yet long mani na long wankain taim ol inap mekim wok painia. Taim ol mekim bikpela wok autim tok moa, ol i wok long kisim planti blesing i winim tru ol samting bilong mani.
5 Taim yu laik pasim tok long wanem kain skul moa yu laik kisim, yu mas skelim gut olgeta samting na skelim tu ol tingting i stap long bel bilong yu. Bilong helpim yu long kisim stretpela tingting long ol samting yu inap mekim, skelim ol tok bilong Kirap!, Mas 8, 1998, pes 18-20. Toktok wantaim papamama bilong yu, ol elda, wasman sekit, na ol gutpela painia long hap bilong yu. Dispela bai helpim yu long bihainim gutpela tingting taim yu makim wanem samting yu laik mekim long laip bilong yu.—Sav 12:1, 13.
This is repeated in km 12/08.