Tingim Tru Naispela Nem Bilong Jehova
1 Satan i bin bagarapim nem bilong God taim em i kirapim tupela namba wan tumbuna bilong yumi long mekim sin. Tok bilong Satan i makim olsem Jehova i bin giamanim Adam. (Stt 3:1-5) Insait bilong nem bilong God i olsem em inap truim ol tok bilong em, olsem na taim Satan i sutim dispela tok giaman long Jehova, em i bagarapim tru nem bilong God. Jehova i wok long kamapim laik bilong em, na long dispela rot em i stretim bek nem bilong em na mekim i kamap naispela tru.—Ais 63:12-14.
2 Nem bilong Jehova i stap long yumi ol manmeri bilong em. (Ap 15:14, 17) Dispela i givim rot long yumi long kamapim olsem yumi laik bai dispela nem i ken i stap holi. Yumi kisim save olsem nem bilong Jehova i naispela tru, long wanem, nem bilong em i makim olgeta samting i gutpela, na pasin sori, na pasin marimari, na stretpela pasin, na gutpela pasin. Yumi pret tru long dispela bikpela nem holi bilong God. (Sng 8:1; 99:3; 148:13) Bel i mas kirapim yumi long mekim wanem?
3 Mekim Nem Bilong God i Stap Holi: Nem bilong God i holi olgeta na yumi no inap mekim wanpela samting bilong mekim em i kamap holi moa. Tasol taim yumi bihainim ol stretpela pasin na mekim wok bilong autim tok bilong Kingdom, bai yumi kamapim klia olsem yumi tingim nem bilong God olsem wanpela samting i holi tru. Yumi mas tokaut olsem: “Kolim nem bilong Bikpela na singaut long em na tok tenkyu long em. Tokaut long olgeta lain manmeri long ol bikpela wok em i bin mekim, na tokim ol long em i gat biknem.” (Ais 12:4) Yumi ken mekim dispela samting olsem wanem?
4 Long olgeta taim rot i op, yumi mas tokaut long nem bilong Jehova na long olgeta samting nem bilong em i makim. Maski yumi autim tok long ol haus o long kain kain taim na ples, o long ol stua, long rot o long rot bilong telefon, dispela wok i litimapim nem bilong Jehova. Taim yumi painim ol man i amamas long harim tok, yumi mas makim taim stret bilong go bek lukim ol na skulim ol moa long Jehova. Yumi mas bihainim ol dispela tok yumi stretim wantaim ol bilong i go lukim ol na yumi mas wok strong long kirapim ol Baibel-stadi. Yumi amamas, long wanem, long olgeta yia planti handet tausen manmeri i wok long kisim save long naispela nem bilong Jehova, na ol i daun long en, na ol i mekim dispela nem i stap holi.
5 Taim yumi givim bel tru long mekim dispela wok bilong mekim nem bilong God i stap holi, yumi helpim Jehova long bekim tok Satan i bin kamapim long Iden. Dispela em i nambawan gutpela wok yumi inap mekim. Yumi mas wok strong long litimapim dispela naispela nem bilong Jehova na tingim olsem wanpela gutpela samting tru!—1 Sto 29:13.