Rot Bilong Kisim Pasin Bilong Skelim Gut Ol Tok
1 Wanpela buk i kamapim insait bilong dispela tok “skelim gut ol tok” olsem “pasin bilong toktok wantaim narapela man bilong senisim pasin o tingting bilong em.” Bilong mekim wok autim tok bilong yu i kamap gutpela moa, yu mas wok long kisim pasin bilong helpim ol man yu bungim long skelim gut ol tok. (Ap 17:2-4) Tasol olsem wanem yu ken kisim dispela pasin?
2 Pastaim Wok Long Tingim Tingim Ol Tok: Taim yu stadi long tok i tru bilong Baibel na tingting long ol tok yu bin stadi long en, dispela bai helpim yu. Sapos sampela tok yu kaunim i strongpela tok, yu mas lusim hap taim bilong skelim ol narapela buk bilong kisim gut save long en na tingim tingim save yu kisim long en. No ken kisim save tasol long dispela tok, yu mas wok long save gut long as bilong tok olsem Baibel i makim.
3 Redi Bilong Mekim Wok Autim Tok: Tingting long olsem wanem bai yu stori gut long tok i tru long olgeta kain man. Redim wanpela gutpela askim bilong kirapim laik bilong man long harim tok. Tingting long olsem wanem bai yu kamapim wanpela tok bilong Baibel i stret long askim na kamapim gut insait bilong en. Tingim ol tok ol man inap kamapim long ol tok yumi mekim na ol i no wanbel long en, na tingting long olsem wanem bai yu stori long en. Makim wanpela tok insait long buk samting yu laik tilim i stret long dispela.
4 Bihainim Pasin Bilong Jisas: Jisas i makim nambawan pasin bilong helpim ol man long skelim gut ol tok bilong Baibel. Bilong skelim pasin bilong em long skulim ol man, kaunim stori i stap long Luk 10:25-37. Tingim ol dispela samting: (1) Stiaim tok i go stret long Baibel taim yu bekim askim bilong ol man. (2) Kirapim ol long kamapim tingting bilong ol na taim ol i mekim gutpela tok, tok amamas long ol. (3) Skripsa yu soim long ol i mas stret wantaim askim bilong ol. (4) Mekim wanpela tok piksa bilong helpim man long pilim gut ol tok long bel bambai em i ken kisim gut bekim bilong askim.—Lukim Wastaua, Novemba 1, 1986, p. 23, 24, par. 8-10.
5 Mekim Wok Long Tul Yumi Kisim: Ol i wokim buk Toktok Gut Wantaim Ol Man Long Baibel bilong helpim yumi long autim tok. Ol kirap bilong tok, na tok bilong bekim long man i katim tok, na ol gutpela tok bilong helpim man long skelim gut tok i helpim yumi long kisim pasin bilong skelim gut ol tok. Buk Toktok Gut em i wanpela gutpela tul yumi mas karim long olgeta taim yumi go autim tok na yumi no ken pret long mekim wok long en taim yumi toktok wantaim man long Baibel. Stori long pes 7 na 8 bilong buk na save long olsem wanem yu ken mekim gut wok long en.
6 Taim yu wok long kisim pasin bilong skelim gut ol tok, wok bilong yu long autim tok na skulim ol man bai kamap gutpela moa. Long dispela rot yu na ol man yu bungim ol long wok autim tok, yupela bai kisim ol gutpela blesing.