Yu Save Yusim Buk Toktok Gut?
1. Aposel Pol na Jisas i skulim ol man olsem wanem?
1 Aposel Pol i wok strong long “toktok wantaim ol [man] long ol tok i stap long buk bilong God.” (Ap. 17:2, 3; 18:19) Taim em i mekim olsem, em i bihainim pasin bilong Jisas, em olgeta taim Jisas i save kolim ol tok i stap long buk bilong God na em i save yusim ol tok piksa bilong helpim ol man i harim tok bilong em long kisim gut save long laik bilong God. (Mt. 12:1-12) Ol i bin wokim buk Toktok Gut Wantaim Ol Man Long Baibel bilong helpim yumi long mekim wankain wok olsem.
2. Olsem wanem yumi inap yusim buk Toktok Gut long redim ol gutpela kirap bilong tok?
2 Redim Ol Gutpela Kirap Bilong Tok: Buk Toktok Gut Wantaim Ol Man Long Baibel i gat ol gutpela kirap bilong tok long pes 9-15. Pasin bilong lain na yusim ol narapela narapela kirap bilong tok, na moa yet long taim yu autim tok planti taim long wankain teritori, dispela bai helpim yu long stori gut na bai isi moa long yu kirapim tok. Yumi ken ritim stret ol kirap bilong tok long buk taim yumi autim tok long telefon o long taim yu toktok long rot bilong intekom long ol haus i gat bikpela sekiuriti banis samting.
3. Wanem ol tok i stap long pes 16-24 bilong buk Toktok Gut bai helpim yumi long wok autim tok bilong yumi?
3 Taim Ol Man i Katim Tok: Tingim olsem long teritori bilong yu, ating yu inap bungim ol man bilong katim tok, olsem na paslain long yu go autim tok, lusim sampela minit long skelim ol tok i stap long pes 16-21, bilong yu ken givim ol gutpela bekim. Ating sampela man bilong haus ol i bilong lotu Buda, Hindu, o Muslim samting. Sapos olsem, ol tok i stap long pes 21-4 bai i helpim yu.
4. Olsem wanem yumi inap yusim buk Toktok Gut taim ol man i kamapim askim o ol i laik tok pait samting?
4 Bekim Ol Askim: Buk Toktok Gut i ken helpim yumi taim ol man i kamapim askim o ol i laik tok pait long wanpela tok bilong Baibel. Yu ken tokim em olsem, yu laik soim em wanpela gutpela tok i bekim dispela askim bilong em na kamautim buk Toktok Gut. Lista bilong ol bikpela tok bilong buk i bihainim ol leta alfabet, olsem na painim het tok yu ting bai i stret we yu ken kisim ol tok bilong bekim dispela askim. Orait skelim ol askim i stap long strongpela blakpela rait. Sapos yu no painim hariap tok yu laik yusim, orait tanim i go long indeks i stap long baksait. Taim yu painim pinis ol tok i stret bilong bekim askim, orait ritim stret long buk. Sapos yupela i stori long tok bilong wanpela skripsa, orait yu ken lukim ol tok long pes 445 aninit long het tok “Sampela Skripsa Ol Man i Gat Tingting Kranki Long En.”
5. Wanem sampela gutpela wok bilong buk Toktok Gut?
5 Ol Narapela Rot Bilong Yusim Buk: Sampela i save putim buk Toktok Gut long ples wok o long skul bilong helpim ol long bekim ol askim olsem, ‘Bilong wanem yupela i no save selebretim ol bikpela de?’ Ol yangpela i kisim ol tok i stap aninit long het tok “God i Wokim Olgeta Samting” na “Evolusen,” bilong wokim ol ripot long skul samting. Olsem wanem? Yu bai go lukim wanpela i sik o wanpela em wanpela long famili bilong em i dai? Ol tok i stap aninit long het tok “Bilong Strongim Bel Bilong Man,” inap helpim yu long kamapim ol tok bilong Baibel bilong mekim gut bel bilong man. Buk Toktok Gut i gat ol gutpela tok bilong helpim ol brata i redim tok na lukautim ol bung bilong wok autim tok.
6. Yumi laik mekim wanem taim yumi autim tok?
6 Yumi no autim tok bilong yumi ken tok resis wantaim ol man, na tu, yumi no autim tok bilong kamapim ol tok yumi laik kamapim na em tasol, nogat. Yumi laik toktok gut wantaim ol man long ol tok bilong Baibel. Taim yumi mekim gutpela wok long buk Toktok Gut, yumi kamapim klia olsem yumi tingim tru wok autim tok bilong yumi.—1 Ti. 4:16.