Sampela Pasin Bilong Kirapim Tok na Bai Man i Putim Gut Yau
1 Jisas i save gut long pasin bilong kirapim tok. Maski em i toktok wantaim bikpela lain manmeri o wanpela man tasol, em i save toktok long ol samting em i bikpela samting long ol na dispela i kirapim ol long putim gut yau. Em i helpim ol long save olsem wanem tok bilong em inap helpim gut ol.—Mt 5:3-12; Jo 4:7-30.
2 Mas Redi Gut Pastaim: Bilong kirapim man long putim gut yau, kirap bilong tok i mas stret long em, na i mas stret long ol samting em i save tingting planti long en, na i mas helpim em long save olsem wanem ol tok bilong Kingdom inap helpim em yet.
3 Taim yu redim ol tok yu laik mekim, tingim ol samting ol man long hap bilong yu i tingting planti long en. Askim yu yet: Wanpela stori i bin kamap long nius na ol man i tingting planti long en? Wanem tok bai i gutpela long wanpela yangpela, o wanpela man i gat bikpela krismas, o wanpela man o meri i marit, o wanpela papa o mama? No ken kolim kolim wankain kirap bilong tok planti taim; redim tupela o tripela kirap bilong tok na taim man bilong haus i kamapim tingting bilong em, redi long senisim tok. Sampela pablisa i save redim ol narapela narapela kirap bilong tok olsem i stap long buk Reasoning, na ol i traim ol dispela kirap bilong tok long olgeta taim ol i go autim tok. (rs-E p. 9-15) Long dispela rot pasin bilong ol long kirapim tok i olsem nupela na ol man i amamas long harim.
4 Long mun Julai, yu ken mekim tok olsem:
◼ “Moning tru. Mipela i wok long toktok wantaim ol man long wanem ol pasin ol i laik bai man i gat wok long bosim ol narapela i mas bihainim. Yu inap kolim wanpela o tupela pasin yu ting em i bikpela samting? [Larim man i bekim tok. Sapos em i kamapim tok i stret, tokim em yu wanbel long tok bilong em.] Baibel i stori long ol pasin bilong dispela man em God i orait long em long bosim ol manmeri long bihain. Yu bin save long dispela samting? Em hia long Aisaia 9:6, 7. [Kaunim.] Sapos i gat kain man olsem bilong bosim yumi, yu ting bai yumi gat wanem kain sindaun?” Larim man i bekim tok, na nau stori long Song 146:3, 4 na sampela tok i stap long pes 153-154 bilong buk Reasoning i stori long gutpela wok king bilong Jisas. O yu ken mekim wok long pes 112 na 113 bilong buk Stap Oltaim bilong kirapim man long harim sampela tok moa. Tilim buk.
5 Sapos yu toktok wantaim man i tingim tru famili, na yu laik mekim wok long buk Stap Oltaim, traim dispela tok i stap daunbilo.
Taim yu gude pinis, yu ken tok:
◼ “Ol hevi bilong olgeta de i save givim hatwok long ol famili long nau. Yu lukim dispela pasin, a? [Larim man i bekim tok.] Yu ting wanem samting inap helpim famili long stretim ol hevi bilong ol? [Larim man i bekim tok.] Mipela i bin kirapim ol man long lukim ol tok bilong Baibel long dispela samting. Lukim dispela tok Man i kamapim marit i bin mekim long namba wan man na meri.” Kaunim Stat 1:28, na nau opim pes 238 long buk Stap Oltaim na kamapim sampela tok moa, olsem i stap long sapta 29.
6 Sapos yumi bihainim pasin bilong Jisas long kirapim man long putim gut yau na yumi traim pulim man i kam insait long toktok, dispela bai helpim ol man i gat gutpela bel long save, tok bilong Baibel inap helpim ol.
This article is repeated in km 12/95.