Mekim Gut Tok Bilong Tilim Buk Stap Oltaim
1 Jisas i save gut long pasin bilong kirapim tok. Em i save wanem tok bai kirapim man long putim gut yau. Bilong kirapim tok wantaim wanpela meri Samaria, em i askim em tasol long wara. Kwiktaim dispela i kirapim tingting bilong em, long wanem, “ol Juda i no save poromanim ol Samaria.” Jisas i toktok wantaim meri na dispela i helpim em wantaim planti ol narapela na ol i bilip. (Jo 4:7-9, 41) Pasin bilong Jisas inap lainim yumi.
2 Taim yumi redim ol tok bilong tilim buk Stap Oltaim, askim yu yet: ‘Ol man long teritori bilong mipela ol i save tingting planti long wanem samting? Wanem tok bai i gutpela long wanpela yangpela, o wanpela man i gat bikpela krismas, o wanpela man o meri i marit?’ Redim tupela o tripela kirap bilong tok na bai yu ken kirapim tok i stret long man bilong haus.
3 Planti famili i bruk na planti man i tingting planti long dispela samting, olsem na yu ken tok:
◼ “I gat planti samting i givim hevi long ol famili long nau. Wanem samting i ken helpim ol? [Larim man i bekim tok.] Baibel inap helpim tru yumi. [Kaunim 2 Timoti 3:16, 17.] Baibel i kamapim ol gutpela tok bilong helpim ol famili long pas gut wantaim. Lukim ol tok i stap hia long paragraf 3 long pes 238 bilong dispela buk, Yu Inap i Stap Oltaim Long Paradais Long Graun.” Kaunim paragraf 3, na tilim buk.
4 Sapos yu kamapim wanpela stori i bin kamap long nius, yu ken mekim tok olsem:
◼ “Yu bin harim dispela tok i bin kamap long nius [kolim wanpela stori i bin kamap na ol man i tingting planti long en]? Wanem tingting bilong yu? [Larim man i bekim tok.] Ating yumi stap long taim nogut tru, a? Baibel i tok, ol dispela samting i makim olsem yumi stap long las taim.” Nau stori long ol tok i stap long pes 150-153 bilong buk Stap Oltaim.
5 Planti man i tingting planti long pasin nogut i go bikpela. Yu ken kamapim namba wan kirap bilong tok aninit long het-tok “Crime/Safety” long pes 10 bilong buk “Reasoning”:
◼ “Mipela i toktok wantaim ol man long ol samting yumi ken mekim bilong i stap gutpela. I gat planti pasin raskol i bagarapim sindaun bilong yumi long nau, a? Yumi mas mekim wanem na bai yumi inap wokabaut long rot long nait na yumi no ken pret?” Yu ken kaunim Song 37:10, 11 na stori long ol gutpela samting Kingdom bilong God bai kamapim—mekim wok long pes 156-158 bilong buk Stap Oltaim.
6 Sapos yu redim gutpela kirap bilong tok, dispela inap helpim yu long painim ol man i hangre long stretpela pasin.—Mt 5:6.
This article is repeated in km 6/95.