Yu Save Daunim Laik Bilong Yu Yet?
1 Taim yumi pilim tru ol samting Jisas i bin mekim bilong helpim ol manmeri, dispela i mas kirapim yumi long daunim laik bilong yumi, na long mekim wok long save na strong bilong yumi. Baibel i tokim yumi olsem: “Yupela i mas givim bodi bilong yupela long God olsem ofa i stap laip na i holi na God i save laikim, em wok bilong God yupela i mekim.” (Ro 12:1) Sapos sampela taim yu skelim yu yet, dispela bai helpim yu long save yu bihainim dispela pasin inap long skel bilong yu o nogat.
2 Taim Yu Wok Long Kisim Save Long Baibel: Yu bin makim taim bilong ritim Baibel na bilong mekim stadi bilong yu yet long olgeta taim? Yu save bihainim dispela sedyul? Yu save redim gut ol tok bilong ol miting bilong kongrigesen long olgeta taim? Sapos yu wanpela het bilong famili, yu save mekim Baibel-stadi wantaim famili bilong yu long olgeta taim? Bilong mekim ol dispela samting, ating yu mas lusim sampela hap taim yu save mekim wok long en bilong lukim televisen o mekim wok long kompiuta o sampela narapela samting. Tasol dispela i no bikpela samting, long wanem, hap taim yu lusim bilong ritim Tok Bilong God bai helpim yu long kisim laip oltaim!—Jo 17:3.
3 Taim Yu Skulim Ol Pikinini Bilong Yu: Gutpela taim bilong kirap long lainim pasin bilong daunim laik bilong yumi yet, em taim yumi liklik yet. Skulim ol pikinini bilong yu long save olsem i gat taim bilong pilai, na tu, i mas i gat taim bilong wok na taim bilong mekim ol wok bilong spirit. (Ef 6:4) Givim ol sampela gutpela wok bilong mekim long haus. Wokim wanpela sedyul bilong mekim wok autim tok wantaim ol long olgeta taim. Yupela yet i mas stap olsem gutpela piksa bambai lo yupela i putim i gat strong.
4 Taim Yu Mekim Wok Bilong Kongrigesen: Taim olgeta i daunim laik bilong ol yet bilong mekim ol samting i helpim olgeta, dispela bai strongim tru kongrigesen. (Hi 13:16) Olsem wanem? Yu inap lusim sampela hap taim moa bilong mekim wok autim tok na kamapim ol disaipel? Yu inap helpim ol brata sista i sik o lapun, ating yu ken helpim ol long kam long ol miting long ka bilong yu?
5 Taim Jisas i no givim yet laip bilong em olsem ofa, em i tokim ol disaipel bilong em long tingim ol samting bilong Kingdom pastaim, na olgeta narapela samting long i stap bilong ol i mas i stap namba tu. (Mt 6:33) Taim yumi daunim laik bilong yumi yet, dispela bai mekim na yumi belgut moa taim yumi mekim yet wok bilong Jehova wantaim amamas.