Yu Mas Go Bek Lukim Ol!
1 “Man! Mitupela i toktok gut wantaim! Mi no ken lusim tingting long go bek lukim em.” Olsem wanem? Sampela taim yu bin mekim kain tok olsem na bihain yu lusim tingting long dispela man i stap we? Sapos dispela samting i bin painim yu, yu mas save olsem bilong yu inap tingim man na go bek lukim em yu mas raitim nem na stori bilong em long wanpela pepa samting.
2 Raitim Ol Samting Long Notbuk: Taim ol tok yutupela i bin mekim i stap yet long tingting bilong yu, yu mas lusim liklik hap taim bilong raitim ol bikpela samting bilong dispela man na tok yupela i bin mekim. Raitim nem bilong man na olsem wanem yu inap luksave long em. Raitim atres bilong em, tasol yu na no ken raitim nating, nogat; yu mas save gut olsem atres yu raitim i stret. Raitim stori yupela i bin toktok long en, na wanem ol skripsa yu bin ritim, na wanem buk samting yu bin tilim.
3 Sapos yu bin kamapim wanpela askim bilong bekim taim yu go bek lukim man, raitim dispela askim long notbuk. Olsem wanem? Yu bin kisim sampela save long dispela man, o long famili bilong em, o long lotu bilong em? Sapos olsem, raitim long notbuk. Bihain, taim yu lukim em gen, yu ken stori long dispela samting na man bai pilim olsem yu tingim em. Na laspela samting yu ken raitim long notbuk em de na taim yu bin bungim man long namba wan taim, na de na taim yu bin pasim tok long go bek lukim em. Sapos yu raitim gut ol samting bilong dispela man long notbuk, dispela bai kirapim yu long truim tok promis yu bin mekim bilong go bek lukim em.—1 Ti 1:12.
4 Taim yu raitim pinis ol samting long notbuk, putim dispela notbuk wantaim ol narapela samting bilong wok autim tok—bek bilong yu, Baibel, buk Toktok Gut, na ol nius samting bilong tilim—long dispela rot notbuk i redi i stap long olgeta taim. Em i gutpela long raitim ol gobek long wanpela notbuk na ol narapela samting bilong autim tok long narapela notbuk, olsem lista bilong ol haus i no gat man. Maski yu mekim bikpela wok long raitim ol samting bilong ol gobek, em i bikpela samting tru long yu mas go bek na lukim ol!
5 Tingting Long Dispela Man: Taim yu redim ol samting bilong wok autim tok, skelim notbuk i stori long ol gobek bilong yu. Tingting long olgeta wan wan man yu laik go lukim ol na wanem gutpela rot bilong helpim ol taim yu go bek lukim ol. Tingting long olsem wanem yu inap kirapim em long stadi long Baibel. Taim yu redi gut olsem, wok bilong yu long autim gutnius bai karim kaikai, na dispela bai mekim amamas bilong yu i go bikpela.—Snd 21:5a.
6 Olsem na taim wanpela man i putim gut yau long tok bilong yu, yu no ken ting bai yu tingim em na go bek lukim em. Nogat. Yu mas raitim dispela samting long notbuk, na skelim tok yu bin raitim, na tingting long dispela man, na yu mas go bek lukim em!