Bagarap i Laik Painim Ol Man!
1 Baibel i kamapim klia laik bilong Jehova long “kisim bek olgeta manmeri.” Tasol sapos ol dispela planti bilion manmeri i laik kisim laip, tingting bilong ol long God Jehova na Kingdom bilong em, em Jisas Krais i bosim i mas stret. Bilong bihainim stretpela tingting ol i mas kisim save “long as bilong tok tru.” (1 Ti 2:3, 4) Yumi gat wok long toksave olsem liklik taim God bai rausim olgeta pasin nogut na kamapim nupela taim i gat stretpela pasin tasol long en, na tu, God i givim wanpela bikpela wok long yumi bilong helpim ol manmeri na bai ol i no ken bagarap.—Mt 24:14; 28:19, 20; Ro 10:13-15.
2 Bilong Wanem Yumi Mas Mekim Hariap? Jisas i givim tok lukaut olsem “bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo.” (Mt 24:21) Bikpela samting bilong dispela bikpela hevi tru bai kamap long Armagedon. (KTH 16:16) Planti manmeri tru bai bagarap sapos ol i no harim gutnius, na insait long dispela lain em ol wantok bilong yumi em ol i no bilip, ol wanwok, ol wanskul, na ol narapela man yumi save long ol. Tasol yumi laik helpim “olgeta manmeri,” olsem God i mekim, na em i bin kamapim klia olsem em i laikim tru olgeta manmeri bilong graun na em i salim Pikinini bilong em, Jisas Krais i kam bilong baim bek olgeta man. (Jo 3:16) Yumi mas wok strong long singautim olgeta manmeri long ran i kam long lotu bilong God na ol bai stap gut. Yumi mas givim bel long mekim wok bilong autim gutnius, long dispela rot bai yumi no gat asua long blut bilong ol man.—Ese 33:1-7; 1 Ko 9:16.
3 Yumi Laik Dispela Wok i Kamapim Wanem Samting? Baibel i kamapim klia olsem dispela wok bilong autim tok em i bikpela samting. Olsem aposel Pol i tok, “Krais i bin givim bel bilong en long mipela, na dispela i save kirapim mipela” long bihainim ol lo bilong God. (2 Ko 5:14) Na tu, planti taim Wastaua i save kamapim klia olsem yumi gat wok bilong autim tok. Long olgeta taim ol Wok Kingdom Bilong Yumi i save stori long rot yumi ken bihainim bilong mekim dispela wok. Ol elda i save stretim dispela wok na ol i strongim yumi long insait long en. Ol narapela pablisa i save askim yumi long wok wantaim ol long autim tok. Yumi save harim planti tok long wok bilong redim gut ol tok yumi bai mekim long wok autim tok, na tilim ol magasin na ol buk, na mekim ol gobek na Baibel-stadi, na autim tok long olgeta taim yumi gat rot long mekim. Olgeta dispela samting i helpim yumi long mekim dispela wok bilong helpim ol man na ol i no ken bagarap.—1 Ko 9:22, 23; Ef 1:13.