Ol Papamama—Skulim Ol Pikinini Long Bihainim Ol Gutpela Pasin
1 Gutpela pasin em i no samting yumi kisim long papamama samting, na em i no save kamap nating. Papamama i mas lusim taim bilong skulim ol pikinini long mekim ol gutpela pasin. Dispela tok “skulim” i olsem “lainim isi isi” o “putim liklik liklik hap i go insait.” Sapos ol papamama i laik “stretim gut ol pikinini bilong [ol] na skulim ol long tok bilong Bikpela,” orait ol i mas mekim olsem long olgeta taim.—Ef 6:4.
2 Kirap Long Taim Ol i Liklik Yet: Pasin bilong ol liklik pikinini long kisim save na long mekim ol nupela samting em i narapela kain tru. Ol bikpela man i save hatwok long lainim wanpela nupela tok ples, tasol ol liklik pikinini inap lainim 2-pela o 3-pela tok ples long wankain taim tasol. No ken ting olsem pikinini bilong yu em i liklik tumas long kisim ol gutpela pasin. Sapos papamama i kirap kwik long skulim ol pikinini long tok i tru bilong Baibel na ol i mekim long olgeta taim, orait taim ol i kamap bikpela, tingting bilong ol bai pulap long ol save em dispela save bai mekim na ol i gat ‘gutpela tingting na God bai i kisim bek ol.’—2 Ti 3:15.
3 Kisim Pasin Bilong Mekim Wok Autim Tok: Wanpela gutpela pasin papamama inap skulim ol pikinini long en, em pasin bilong autim gutnius bilong Kingdom bilong God long olgeta taim. Planti papamama i save kirap mekim olsem na ol i kisim ol pikinini i go wantaim ol long autim tok long ol haus taim ol pikinini i liklik yet. Taim ol papamama i mekim wok autim tok long olgeta taim, dispela bai helpim ol pikinini long laikim na givim bel long mekim wok autim tok. Ol papamama i ken lainim pikinini bilong ol long pasin bilong autim tok long narapela narapela rot.
4 Taim ol pikinini i putim nem bilong ol long Skul Tiokratik Bilong Autim Tok dispela bai helpim ol. Dispela skul i lainim ol long kisim gutpela pasin bilong stadi na long kaunim buk na kisim gut insait bilong en. Ol i lain long toktok wantaim ol man long Baibel, mekim ol gobek na Baibel-stadi. Kain skul olsem inap kirapim ol long mekim wok painia na long wok strong long winim mak bilong mekim sampela bikpela wok bilong God. Planti brata sista i wok long Betel na ol misineri i save tingim bek long taim bipo ol i bin insait long Skul Tiokratik, na ol i ting olsem skul i bin helpim ol long kisim ol gutpela pasin.
5 Yumi olgeta i olsem graun long han bilong Nambawan Man bilong wokim sospen graun, em Jehova. (Ais 64:8) Taim graun i no strong yet, em i gutpela long wokim sospen graun long en. Taim graun i drai inap longpela taim, em bai kamap strong. Wankain tu long ol man. Taim ol i liklik yet em i no hatwok tumas long skulim ol, na i gutpela moa long kirap skulim ol taim ol i liklik tru. Taim ol i liklik yet em taim ol i lain long ol samting, na em i taim ol i kirap bihainim gutpela pasin o pasin nogut. Yupela ol papamama i save tingim tru ol pikinini, kirap long lainim ol pikinini bilong yupela taim ol i liklik yet long bihainim ol gutpela pasin bilong mekim ol wok Kristen.