Rot Bilong Kirapim Tingting Bilong Ol Narapela
1 Aposel Pol i gat nem olsem man bilong kirapim tingting bilong ol man. (Ap 19:26) King Agripa tu i bin tok long em olsem: “Olsem wanem? Long dispela sotpela taim tasol, yu ting yu bai mekim mi i kamap Kristen?” (Ap 26:28) Olsem wanem na Pol i save kirapim tru tingting bilong ol man taim em i autim gutnius? Em i save kamapim gut ol tok bilong Baibel i stret wantaim tok bilong ol man i harim tok bilong em.—Ap 28:23.
2 Yumi ken bihainim pasin bilong Pol, na yumi tu i ken kirapim tingting bilong ol man long taim yumi autim tok. Yumi ken mekim olsem wanem? Yumi mas bihainim gutpela tingting taim yumi toktok wantaim na putim yau long tok bilong ol narapela. (Snd 16:23) Tripela bikpela samting bai helpim yumi long mekim olsem.
3 Putim Gut Yau: Taim narapela man i toktok, tingim ol tok yu inap wanbel long en na yupela i ken stori long dispela tok. Sapos em i gat tok long wanpela samting, traim long skelim as bilong dispela tok. Dispela bai helpim yu long save long ol samting em i bilip long en, na i gat wanem as na em i bilip long dispela samting, na wanem samting i bin kirapim em long bilip long en. (Snd 18:13) Long gutpela pasin kirapim em long kamapim tingting bilong em.
4 Kamapim Ol Askim: Sapos wanpela man i kamapim bilip bilong em long God Triwan, yu ken askim olsem: “Bipo tu yu bin bilip long God Triwan?” Yu ken tok moa olsem: “Olsem wanem? Yu bin stadi gut long tok Baibel i mekim long dispela samting?” Na yu ken askim em tu olsem: “Sapos God em i wanpela hap bilong God Triwan, Baibel bai tokaut klia long dispela samting, a?” Bekim bilong man bai helpim yu long toktok gut wantaim em long tok Baibel i mekim long dispela samting.
5 Kamapim Tok i Gat As Bilong En: Wanpela Witnes i askim wanpela meri i bilip olsem Jisas em God, em i tok: “Sapos yu laik tokim mi olsem tupela man i wankain, olsem narapela i no winim narapela, bai yu tok piksa long husat long famili bilong kamapim klia dispela samting?” Meri i tok: “Ating bai mi stori long tupela brata.” Witnes i tok: “Em nau. O long tupela pikinini em mama i karim tupela wantaim, a? Tasol Jisas i lainim yumi long tingim olsem God em i Papa na em yet em i Pikinini, olsem na yu ting Jisas i laik lainim yumi long wanem samting?” Meri i klia gut nau olsem wanpela i gat bikpela krismas na bikpela namba, winim narapela. (Mt 20:23; Jo 14:28; 20:17) Witnes i mekim tok i kirapim tingting bilong meri bambai bel bilong em i ken pilim.
6 Maski yumi kamapim gut ol tok, na tok bilong yumi i stret, i no olgeta man bai harim tok i tru. Tasol olsem Pol i bin mekim, yumi mas strong tru long painim ol man i gat gutpela bel long teritori bilong yumi, na kirapim tingting bilong ol long harim tok bilong Kingdom.—Ap 19:8.