Hau Bai Yumi Mas “Bekim” Askim Bilong Olgeta Wan Wan Man?

1, 2. (a) Stori long ekspiriens we i soim olsem gutpela samting i save kamap taim yumi skelim gut ol askim yumi laik givim. (Lukim piksa long kirap bilong stadi.) (b) Wai na yumi no ken pret long toktok wantaim man long ol bikpela tok?

SAMPELA yia i go pinis, wanpela sista Kristen i toktok wantaim man bilong em long tok bilong Baibel. Man bilong dispela sista em i no wanpela Kristen. Long bipo, em i save go tasol long wanpela lotu bilong lain Kristendom. Taim dispela sista na man bilong em i toktok wantaim, man bilong em i tok olsem em i bilip long God Triwan. Sista i luksave olsem man bilong em i no save long insait bilong dispela bilip bilong God Triwan, olsem na em i bihainim savetingting na askim man olsem, “Yu bilip olsem God em i God, Jisas em i God, na holi spirit em i God, tasol ol i no 3-pela God, nogat, ol i 1-pela God tasol?” Man bilong sista i kirap nogut na tok, “Nogat, mi no bilip long dispela!” Dispela i opim rot long sista inap toktok gut wantaim man bilong em na tokim em long ol pasin tru bilong God.

² Dispela ekspiriens i soim olsem gutpela samting i save kamap taim yumi bihainim savetingting na skelim gut ol askim yumi laik givim. Na tu, dispela i kamapim klia wanpela bikpela poin: Yumi no ken pret taim yumi laik toktok long ol bikpela bilip olsem, God Triwan, helpaia, na dispela tingting olsem i gat Krieta i stap, o nogat. Sapos yumi bilip long Jehova na long trening em i givim long yumi, yumi inap kamapim bekim we inap pulim tingting bilong man, na putim tok i go daun long bel bilong em. (Kol. 4:6) Orait nau yumi ken stori long ol samting ol pablisa i save mekim taim ol i toktok wantaim man long ol kain bikpela tok olsem. Yumi bai stori long olsem wanem yumi inap (1) givim ol askim bilong kirapim man long kamapim tingting bilong em, (2) toktok gut wantaim man long ol tok bilong Baibel, na (3) yusim ol tok piksa long kamapim klia mining bilong tok.

GIVIM ASKIM BILONG KIRAPIM MAN LONG KAMAPIM TINGTING BILONG EM

3, 4. Wai na yumi mas yusim ol askim long helpim yumi long kisim save long bilip bilong man? Stori long wanpela eksampel.

³ Ol askim bai helpim yumi long kisim save long bilip bilong man. Sindaun 18:13 i tok: “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin na yu gat sem.” Paslain long yumi kamapim tok bilong Baibel long wanpela samting, yumi mas traim long painimaut bilip tru bilong man. Nogut yumi lusim nating bikpela haptaim long toktok long samting man i no bilip long en!—1 Kor. 9:26.

⁴ Tingim olsem yumi toktok wantaim man long bilip bilong helpaia. I no olgeta man i bilip olsem hel em i wanpela ples we oltaim paia i lait long en na ol man i save kisim pen long en. Olsem na yumi ken tok olsem: “Ol man i gat kain kain tingting long helpaia, olsem na yu yet i gat wanem tingting?” Taim yumi harim pinis bekim bilong man, yumi bai redi gut long helpim em long kliagut long tok bilong Baibel long dispela samting.

5. Hau bai ol askim inap helpim yumi long kisim save long risen bilong bilip em man i holim?

⁵ Taim yumi bihainim savetingting na givim ol askim long man, dispela inap helpim yumi long kisim save long risen bilong bilip em i holim. Tingim olsem yumi autim tok na yumi bungim man husat i tok olsem em i no bilip long God. Ating kwiktaim yumi bai kisim tingting olsem bilip bilong evolusen i kirapim em long holim kain bilip olsem. (Sng. 14:1) Tasol sampela man i no bilip moa long God bikos ol i lukim olsem bikpela pen na hevi i painim ol man, na tu, ol yet i karim pen na hevi. Ol i pilim olsem sapos Krieta bilong yumi i gat pasin laikim, em i no inap kamapim pen na hevi. Olsem na sapos man i gat 2-pela tingting olsem i gat God i stap o nogat, orait yumi ken askim em olsem, “Oltaim yu save pilim olsem?” Sapos man i tok nogat, orait yumi ken askim olsem, wanem samting stret i kirapim em long kisim 2-pela tingting olsem God i stap o nogat. Bekim bilong em inap helpim yumi long save long gutpela rot bilong helpim em long kisim save long tok bilong Baibel.—Ritim Sindaun 20:5.

6. Yumi mas mekim wanem taim yumi givim askim long man?

⁶ Taim yumi givim wanpela askim, yumi mas putim gut yau long bekim bilong man na pilim tingting bilong em. Ating man bai tok olsem, wanpela bikpela hevi i bin kamap na i kirapim em long kisim 2-pela tingting olsem i gat Krieta i stap o nogat. Paslain long yumi kamapim klia olsem God i stap, yumi mas pilim tingting bilong man na tokim em olsem i no gat rong long em i tingting planti long risen bilong pen na hevi i painim yumi. (Hab. 1:2, 3) Taim yumi soim pasin isi na pasin laikim, dispela inap kirapim laik bilong man long kisim sampela save moa.a

TOKTOK GUT LONG TOK BILONG BAIBEL

7. Sapos yumi laik bai wok autim tok bilong yumi i kamapim gutpela samting, orait yumi mas mekim wanem?

⁷ Orait nau yumi ken stori long olsem wanem yumi inap toktok gut wantaim man long ol tok bilong Baibel. Baibel em nambawan tul bilong helpim yumi long mekim wok autim tok. Tok bilong Baibel i helpim yumi na yumi “inap tru na redi long mekim olgeta kain gutpela wok.” (2 Tim. 3:16, 17) Sapos yumi laik bai wok autim tok bilong yumi i kamapim gutpela samting, dispela i no makim olsem yumi mas ritim planti skripsa, nogat, yumi mas bihainim gutpela pasin taim yumi toktok na stori long mining bilong ol skripsa. (Ritim Aposel 17:2, 3.) Yumi ken skelim 3-pela eksampel.

8, 9. (a) Wanem wanpela rot bilong toktok gut wantaim man husat i bilip olsem Jisas i wankain olsem God? (b) Wanem sampela narapela pasin bilong toktok i bin helpim yu long toktok gut wantaim man long dispela samting?

⁸ Eksampel 1: Yumi autim tok na yumi bungim man i bilip olsem Jisas i wankain olsem God. Yumi inap yusim wanem ol skripsa long toktok gut wantaim em? Yumi inap askim em long ritim Jon 6:38, we Jisas i tok: “Mi lusim heven na kam daun bilong bihainim laik bilong man i salim mi i kam na i no bilong bihainim laik bilong mi yet.” Taim man i ritim pinis dispela ves, yumi ken askim em olsem: “Sapos Jisas em i God, orait husat i stap long heven na salim Jisas i kam daun long graun? Yu ting Man i salim Jisas i kam, em i gat bikpela namba moa winim Jisas? Yumi save olsem man i gat bikpela namba, em tasol bai inap tru long salim narapela.”

⁹ Yumi ken ritim Filipai 2:9. Long dispela ves, aposel Pol i stori long samting God i bin mekim bihain long Jisas i dai na kirap bek. Dispela ves i tok: “God i givim bikpela namba moa long [Jisas] na i givim em wanpela nem i winim olgeta arapela nem.” Bilong helpim man long skelim gut tok bilong dispela ves, yumi ken askim olsem: “Sapos Jisas i wankain olsem God paslain long em i dai na bihain God i givim bikpela namba long em, yu ting dispela i mekim na Jisas i winim God? Tasol, yu ting wanpela man inap holim bikpela namba moa winim God?” Sapos wanpela man i rispektim Baibel na em i gat gutpela bel, dispela kain tingting bai kirapim em long lusim sampela haptaim moa long skelim gut samting em i bilip long en.—Apo. 17:11.

10. (a) Hau bai yumi inap toktok gut wantaim man husat i bilip long helpaia? (b) Yu bin bihainim wanem pasin bilong toktok na dispela i bin helpim yu long toktok wantaim man long helpaia?

¹⁰ Eksampel 2: Wanpela lotuman i hatwok long bilip olsem ol man nogut i no inap kisim pen long helpaia inap oltaim oltaim. Ating em i bilip long helpaia, long wanem, em i laik bai ol man nogut i kisim pe nogut long pasin nogut bilong ol. Hau bai yumi inap toktok gut wantaim man i gat kain tingting olsem? Pastaim, yumi ken helpim em long kisim save olsem ol man nogut bai kisim strafe. (2 Tes. 1:9) Bihain, yumi ken tokim em long ritim Stat 2:16, 17, we i kamapim klia olsem pe bilong sin em dai. Yumi ken stori long em olsem, Adam i bin mekim sin na long dispela rot olgeta manmeri i kisim sin. (Rom 5:12) Tasol yumi inap tok olsem God i no mekim wanpela tok olsem ol man nogut bai kisim strafe long helpaia. Yumi inap askim olsem, “Sapos Adam tupela Iv bai kisim strafe inap oltaim oltaim, orait yu ting em stretpela pasin long givim tok lukaut long ol?” Yumi ken ritim Stat 3:18, 19, we God i givim strafe long ol bihain long ol i mekim sin, tasol dispela skripsa i no kamapim tok bilong helpaia. Tasol God i tokim Adam olsem em bai dai na tanim i kamap graun gen. Yumi ken askim olsem, “Sapos tru tru Adam bai go long helpaia, yu ting em stretpela pasin long tokim em olsem em bai go bek long graun?” Sapos dispela man i amamas long kisim save, orait dispela kain askim bai kirapim em long skelim gut moa dispela samting.

11. (a) Wanem wanpela rot bilong toktok gut wantaim man husat i bilip olsem olgeta gutpela man bai go long heven? (b) Yu bin bihainim wanem pasin bilong toktok na dispela i bin helpim yu long toktok wantaim man husat i bilip long kisim laip long heven?

¹¹ Eksampel 3: Yumi autim tok na yumi bungim man i bilip olsem olgeta gutpela man bai i go long heven. Kain bilip olsem inap stiaim tingting bilong man long mining bilong tok i stap long Baibel. Tingim olsem yumi laik stori wantaim em long Revelesen 21:4. (Ritim.) Ating dispela man i kisim tingting olsem dispela skripsa i kolim ol blesing em ol man bai kisim taim ol i go long heven. Hau bai yumi inap toktok gut wantaim em? Yumi no ken tingting long ritim sampela moa skripsa, nogat, yumi ken stori gut moa long wanpela hap tok i stap long dispela skripsa yet. Dispela skripsa i tok, “bai i no gat dai moa.” Yumi ken tokim dispela man olsem sapos wanpela samting i no stap moa, orait dispela i makim olsem pastaim dispela samting i bin i stap, na askim em sapos em i wanbel long dispela tok. Ating em bai tok yes. Orait, yumi ken tok olsem ol man i no save dai long heven, nogat, ol i save dai hia long graun tasol. Olsem na i stret long tok olsem Revelesen 21:4 i stori long ol blesing we bai kamap long graun long bihain.—Sng. 37:29.

YUSIM TOK PIKSA LONG KAMAPIM KLIA MINING BILONG TOK

12. Wai na Jisas i bin yusim ol tok piksa?

¹² Jisas i bin yusim tu ol tok piksa taim em i autim tok. (Ritim Matyu 13:34, 35.) Ol tok piksa bilong Jisas i kamapim klia astingting bilong ol man husat i harim em i toktok. (Mat. 13:10-15) Na tu, ol tok piksa i kirapim laik bilong ol man long harim tok Jisas i autim, na ol i tingim yet ol dispela tok. Olsem wanem yumi inap yusim ol tok piksa taim yumi laik skulim ol man?

13. Yumi ken mekim wanem tok piksa bilong soim olsem God i holim bikpela namba moa winim Jisas?

¹³ Em gutpela long yusim ol tok piksa we ol man inap kliagut long en. Taim yumi laik kamapim klia olsem God i gat bikpela namba winim Jisas, ating yumi ken tok olsem: Taim God na Jisas i laik stori long pasin bilong tupela long pas gut wantaim, ol i yusim ol hap tok em ol wanfamili i save kolim long narapela narapela. God i kolim Jisas olsem Pikinini, na Jisas i kolim God olsem Papa. (Luk 3:21, 22; Jon 14:28) Yumi ken askim man olsem: “Sapos yu laik skulim mi olsem 2-pela man i wankain, orait yu bai mekim tok piksa na kolim wanem lain insait long famili?” Ating dispela man bai kolim ol bratasusa, o twins. Sapos em i mekim olsem, orait yumi ken tok em nomol long tok olsem. Bihain, yumi ken askim olsem: “Sapos yumitupela inap tingim kwik dispela tok piksa, orait Jisas, em Nambawan Bikpela Tisa, em tu inap tingim dispela tok piksa, a? Tasol Jisas i kolim God olsem Papa bilong em. Long dispela rot, Jisas i soim klia olsem God i bin stap laip longpela taim moa na em i gat bikpela namba moa, winim Jisas.”

14. Wanem tok piksa i soim olsem i no stret long God i larim Satan long givim strafe long ol man long helpaia?

¹⁴ Skelim narapela eksampel. Sampela man i bilip olsem Satan i bosim helpaia. Yumi ken mekim tok piksa bilong helpim papa o mama long luksave olsem i no stret liklik long God i larim Satan i givim strafe long ol man long helpaia. Yumi ken tok olsem: “Tingim olsem pikinini bilong yu i bikhet nogut tru na em i mekim planti pasin nogut. Bai yu mekim wanem?” Ating papa o mama bai tok olsem em bai stretim pikinini. Ating planti taim em bai traim long helpim pikinini long stopim bikhet pasin bilong em. (Snd. 22:15) Yumi ken askim papa o mama olsem, ol bai mekim wanem sapos pikinini i sakim olgeta samting ol i mekim bilong helpim em? Ating planti papamama bai tok olsem, ol bai givim panismen long pikinini. Yumi ken askim olsem, “Bai yu mekim wanem sapos yu painimaut olsem wanpela man nogut i stiaim pikinini long bikhet moa yet?” Ating papa o mama bai kros long dispela man. Orait nau, yumi laik helpim papa o mama long kliagut long mining bilong dispela tok piksa, olsem na yumi ken askim olsem, “Taim yu save olsem wanpela man nogut i bin stiaim pikinini long bikhet, bai yu askim dispela wankain man long givim panismen long pikinini?” Ating bekim bilong dispela askim em nogat. Dispela i soim klia olsem God i no inap yusim Satan long givim strafe long wankain lain em Satan yet i bin stiaim ol long mekim ol pasin nogut!

HOLIM STRETPELA TINGTING

15, 16. (a) Taim yumi autim tok, wai na yumi no ken ting olsem olgeta man bai bilip long tok bilong Kingdom? (b) Yu ting yumi mas i gat bikpela save na bai yumi inap mekim gut wok tisa? Stori long dispela. (Lukim tu blok “Tul Bilong Helpim Yumi Long Bekim Askim.”)

¹⁵ Yumi luksave olsem i no olgeta man yumi autim tok long ol bai kisim tok i tru. (Mat. 10:11-14) Dispela kain samting bai kamap maski yumi mekim ol askim i stret, toktok gut tru wantaim man, na mekim ol tok piksa i gutpela tru. Liklik lain manmeri tasol i bin harim tok bilong Jisas, maski em i nambawan bikpela Tisa husat i bin stap long graun!—Jon 6:66; 7:45-48.

¹⁶ Maski sapos yumi pilim olsem yumi no gat bikpela save, yumi inap mekim gut wok autim tok. (Ritim Aposel 4:13.) Baibel i helpim yumi long bilip olsem “olgeta manmeri em bel bilong ol i gutpela long kisim laip oltaim,” ol bai bilip long gutnius. (Apo. 13:48) Olsem na yumi mas kisim na holim stretpela tingting long yumi yet na ol manmeri yumi laik autim gutnius bilong Kingdom long ol. Jehova i givim trening long yumi, olsem na yumi mas larim dispela trening i helpim gut yumi, na yumi mas bilip olsem dispela trening bai helpim yumi na ol man husat i harim tok yumi autim. (1 Tim. 4:16) Jehova inap helpim yumi long “save long wanem tok i stret long bekim long olgeta man wan wan.” Long stadi i kamap bihain long dispela, yumi bai kisim save long wanpela rot bilong mekim gut wok autim tok, em long bihainim wanpela tok em planti man i save kolim olsem Gutpela Lo Tru.