Gutpela Pasin—Em Wanpela Mak Bilong Lain Bilong God
1 Planti man i no save mekim gutpela pasin long nau. Bilong wanem i olsem? Ol man i save hariap hariap long mekim ol samting na ol i no save tingting long mekim ol gutpela tok olsem, “Plis,” “Tenkyu,” o “Eskius.” Baibel i tok pasin bilong ol man bai i go nogut moa long taim bilong las de, em i tok ol ‘bai i laikim ol yet tasol, litimapim nem bilong ol yet, hambak nabaut, i no tok tenkyu, ol bai i no stap pren bilong ol narapela, i no bosim laik bilong bodi bilong ol, birua long olgeta gutpela pasin, na ol bai bihainim kwik olgeta kranki tingting bilong ol.’ (2 Ti. 3:1-4) Olgeta dispela samting i mekim na ol man i no bihainim gutpela pasin. Ol Kristen i lain bilong God, olsem na ol i mas was gut bambai ol i no ken kisim pasin bilong ol man bilong graun na ol i no rispek long ol narapela.
2 Gutpela Pasin Em Wanem Samting? Gutpela pasin em pasin bilong tingim tru bel na tingting bilong ol narapela, pasin bilong i stap wanbel wantaim ol narapela. Gutpela pasin em pasin bilong tingim ol narapela, mekim gutpela pasin, helpim narapela, na mekim pasin isi. Man i laikim tru God na ol narapela man em i save kamapim ol dispela pasin. (Lu. 10:27) I no olsem man i mas tromoi mani bilong mekim ol dispela pasin, tasol ol i bikpela samting tru bilong helpim yumi long pas gut wantaim ol narapela.
3 Jisas Krais em i nambawan gutpela piksa bilong yumi ken bihainim. Long olgeta taim em i bihainim Gutpela Lo Tru: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Lu. 6:31) Ating yumi save pilim tru pasin bilong Jisas long tingim ol narapela na gutpela pasin em i mekim long ol disaipel, a? (Mt. 11:28-30) I no olsem em i bihainim tok bilong wanpela buk na em i mekim ol gutpela pasin, nogat. Gutpela bel i kirapim em long mekim. Yumi mas traim bihainim ol gutpela pasin bilong em.
4 Wanem taim ol Kristen i mas mekim gutpela pasin? Ol i mekim olsem long taim bilong ol bikpela bung tasol, taim ol i laik bai ol man i ting ol i gutpela man? O ol i save mekim gutpela pasin taim ol i laik stiaim tingting bilong ol narapela? Nogat! Yumi mas mekim gutpela pasin long olgeta taim. Orait yumi mas mekim wanem bilong tingim ol narapela taim yumi bung wantaim ol long kongrigesen?
5 Long Haus Kingdom: Haus Kingdom em ples bilong yumi long mekim lotu. God Jehova i singautim yumi long i kam bung. (Sng. 15:1) Yumi save bihainim gutpela pasin taim yumi kam long Haus Kingdom? Yumi save tingim gut klos na bilas bilong yumi? Yumi no laik putim ol klos na bilas bilong wok o pilai samting, o bilas i narapela kain tru. Taim lain bilong Jehova i go long ol kibung o ol miting bilong kongrigesen long olgeta wik, ol i gat nem olsem ol i save putim gutpela bilas i makim ol i man bilong bihainim tok bilong God. (1 Ti. 2:9, 10) Olsem na yumi soim olsem yumi tingim na daun long Man i bin singautim yumi i kam na ol narapela man em i bin singautim ol i kam.
6 Narapela rot yumi ken mekim gutpela pasin long ol miting em yumi mas kam long ol miting long taim stret. Tru, sampela taim em i hatwok long mekim olsem. Ating sampela i stap longwe o ol i gat bikpela famili bilong stretim na redi long i go long miting. Tasol mipela i lukim olsem long sampela kongrigesen, em pasin bilong planti pablisa (25 pesen) long kam taim ol i mekim pinis singsing na beten. Dispela i bikpela samting tru long tingim. Yumi mas tingim olsem bilong mekim gutpela pasin yumi mas was gut, nogut yumi bagarapim bel bilong ol narapela. Jehova, em dispela Man i singautim yumi i kam, em i redim ol dispela bung bilong kisim kaikai bilong spirit bilong helpim yumi. Bilong kamapim olsem yumi amamas long em na tingim em tru, yumi mas kam long taim stret. Na tu, taim man i kam leit long ol miting, em i pulim ai bilong ol narapela na i makim olsem em i no tingim ol man i stap pinis long miting.
7 Taim yumi bung, yumi luksave long ol nupela man i kam long miting? Taim yumi go tok amamas long ol i kam, yumi mekim gutpela pasin. (Mt. 5:47; Ro. 15:7) Yumi tok gude long ol, yumi sekanim ol, na yumi smail long ol—olgeta dispela samting i liklik samting, tasol i makim olsem yumi Kristen tru. (Jo. 13:35) Wanpela man i kam namba wan taim long Haus Kingdom, em i tok: “Long wanpela de tasol mi bungim ol gutpela manmeri i save laikim tru ol narapela, em ol man mi no save long ol. Mi no bin bungim kain man olsem long lotu mi bin kamap bikpela long en. Mi luksave olsem mi painim pinis tok i tru.” Olsem na em i senisim pasin bilong em, na 7-pela mun bihain em i kisim baptais. Em nau, ol gutpela pasin inap helpim tru ol man!
8 Sapos yumi save mekim gutpela pasin long ol man yumi no save long ol, orait “yumi mas strong tru long mekim gutpela pasin long ol arapela manmeri i bilip long Bikpela.” (Ga. 6:10) Yumi mas bihainim tok bilong Baibel: “Yupela i mas aninit long ol lapun na mekim gut long ol.” (Wkp. 19:32) Yumi mas tingim ol lapun long taim yumi bung.
9 Putim Gut Yau: Long ol miting bilong kongrigesen, ol elda na kongrigesen sevent i save kamapim sampela tok bilong spirit bilong strongim yumi. (Ro. 1:11) Sapos yumi slip, kaikai PK na pairapim long maus, toktok planti taim wantaim man i sindaun klostu long yumi, go nating nating long toilet, ritim ol narapela buk, o mekim ol narapela samting long miting, dispela bai kamapim tru olsem yumi no mekim gutpela pasin. Ol elda i mas i stap olsem gutpela piksa long dispela samting. Ol gutpela pasin Kristen bai kirapim yumi long rispektim brata i mekim tok na ol tok bilong Baibel em i kamapim, na putim gut yau long tok bilong em.
10 Gutpela Pasin na Ol Pikinini: Oltaim ol papamama i mas was long pasin bilong ol pikinini bilong ol. Sapos liklik pikinini i krai o em i no laik stap isi long taim bilong miting na dispela i mekim na ol narapela i no inap harim gut tok, orait em i gutpela long kisim pikinini i go ausait hariap na mekim em i stap isi. Tru, ating sampela taim em i hatwok long mekim olsem, tasol tingim, dispela i soim olsem yu tingim ol narapela. Ol papamama i gat ol liklik pikinini na ol i ting pikinini i no inap stap isi, ol i save sindaun long ol sia long baksait bambai ol i no ken pulim ai bilong planti man tumas sapos ol i mas kirap long taim bilong miting. Na ol narapela i kam long miting, ol i ken tingim ol dispela kain famili na larim ol i sindaun long ol sia i stap long baksait.
11 Ol papamama i mas was gut long pasin bilong ol pikinini bilong ol paslain na bihain long ol miting. Ol pikinini i no ken ran insait long Haus Kingdom, long wanem, dispela inap kamapim bagarap. Pasin bilong ran nabaut ausait long Haus Kingdom em tu inap kamapim bagarap, na long taim bilong tudak em i nogut moa yet. Pasin bilong toktok strong long ausait inap bagarapim i stap bilong ol man i stap klostu na ol i kisim tingting nogut long lotu bilong yumi. Mipela tok amamas long ol papamama i wok strong tru long was gut long ol pikinini bilong ol insait na ausait long Haus Kingdom, long wanem, dispela i mekim na yumi amamas long bung wantaim na stap wanbel.—Sng. 133:1.
12 Long Buk-Stadi: Yumi amamas long gutpela pasin bilong ol brata bilong yumi em ol i larim yumi mekim miting bilong kongrigesen long haus bilong ol. Taim yumi kam bung, yumi mas tingim gut haus na ol samting bilong ol. Paslain long yumi go insait long haus, yumi mas rausim su bilong yumi bambai yumi no ken bagarapim plua bilong ol. Ol papamama i mas was long ol pikinini, ol i mas i stap long hap bilong haus bilong mekim Buk-Stadi tasol. Ating grup em i liklik na narapela i save gut long narapela, tasol yumi no ken ting yumi inap mekim ol samting long laik bilong yumi yet long haus bilong ol narapela. Sapos liklik pikinini i laik i go long toilet, papa o mama i mas i go wantaim em. Na tu, Buk-Stadi em i wanpela miting bilong kongrigesen, olsem na yumi mas bilas olsem yumi save mekim taim yumi go long Haus Kingdom.
13 Em i Bikpela Samting Long Mekim Gutpela Pasin: Taim yumi mekim gutpela pasin Kristen, dispela i save helpim wok autim tok bilong yumi, na tu, em i helpim yumi long stap gut wantaim ol narapela. (2 Ko. 6:3, 4, 6) Yumi ol man bilong lotuim God bilong amamas, olsem na ating yumi no hatwok long smail, stap wanbel, na mekim tu ol narapela liklik samting bilong amamasim ol narapela. Ol dispela gutpela pasin bai mekim na i stap bilong yumi olsem ol man bilong lotuim God bai kamap gutpela moa.