Bihainim Gutpela Pasin Kristen Taim Yu Autim Tok na Litimapim Nem Bilong God
1 Aposel Pol i raitim pas i go long ol Korin na em i tok: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun.” (2 Ko 6:3) Na em i tokim ol Filipai, ‘wokabaut bilong yupela i mas stret na yupela i bihainim gutnius.’ (Fl 1:7) Dispela tok bilong Baibel i helpim yumi long save yumi mas bihainim gutpela pasin Kristen, em bikpela samting. Olsem wanem? Pasin yu bihainim taim yu autim tok em i save litimapim nem bilong God?
2 Yumi stori long wanem kain ‘pasin’? Em pasin yumi save bihainim long olgeta taim, olsem pasin bilong yumi long wokabaut na pasim klos, na pasin yumi mekim long narapela man. Sapos yumi bihainim gutpela pasin Kristen, bai yumi tingim ol narapela man na sori long ol na laik long helpim ol. Planti manmeri long nau ol i no tingting long bihainim gutpela pasin olsem, tasol ol Kristen i save, ol i mas bihainim gutpela pasin. Yumi save, maski yumi mekim planti gutpela wok, tasol sapos yumi no bihainim gutpela pasin Kristen, wok bilong yumi bai lus nating.
AUTIM TOK LONG OL HAUS
3 Taim yu autim tok, na yu wokabaut lusim wanpela haus i go long narapela haus, ol man inap luksave olsem yu wanpela wokman tru bilong God? Klos yu pasim na pasin bilong yu i kirapim ol man long harim tok? Yumi laik bai ol pikinini i raun wantaim yumi na autim tok, tasol yumi lainim ol long bihainim gutpela pasin na bai pasin bilong ol i litimapim tok i tru? Taim yu autim tok, ol i putim yau long tok bilong yu o ol i pilai? Sapos pikinini i bikhet o em i no bihainim gutpela pasin, bai em i pulim ai bilong man bilong haus na bai man bilong haus i no harim gut tok yu laik autim. Sapos yu lainim gut ol pikinini bilong yu, bai pasin bilong ol i litimapim nem bilong Jehova na nem bilong papamama na nem bilong kongrigesen. Wanpela meri i stori long tupela yangpela brata i bin autim tok long em, na em i tok, “Mi amamas tru long toktok wantaim tupela. . . . ol i bilas gut na kom gut. Gutpela sapos ol narapela yangpela i bihainim pasin bilong tupela.” Dispela meri i pilim tru gutpela pasin bilong dispela tupela yangpela brata.
4 Taim yumi toktok wantaim wanpela man, olsem wanem yumi inap bihainim gutpela pasin? Aposel Pita i tok, taim yumi toktok wantaim wanpela man yumi mas mekim “tok isi” na yumi mas mekim “long gutpela pasin.” (1 Pi 3:16) Yumi mas tingim gut dispela tok bilong Pita. Na taim wanpela man i krosim yumi, yumi mas bihainim moa yet dispela tok. Sapos yu strong long kamapim tingting bilong yu yet na yu daunim tok bilong narapela man, yu ting pasin bilong yu bai litimapim nem bilong God? Sapos yu laik bihainim gutpela pasin Kristen, yu mas tingim gut narapela man. Sapos man i no laik harim tok, orait yu no ken subim em long harim, o subim em long kisim buk samting. Yumi mas harim gut tok bilong narapela man, em bikpela samting. Em gutpela pasin Kristen. Taim man bilong haus i toktok, yumi mas harim gut tok bilong em. Sapos yumi mekim olsem, bai yumi inap save long tingting bilong em na bai yumi save long rot bilong helpim em.—Snd 18:13.
5 Taim yumi autim tok long ol haus, yumi mas tingting long bihainim gutpela pasin Kristen. Yumi no ken bung bung long rot o klostu long wanpela haus na pasim rot bilong ol man i laik wokabaut i go i kam. Taim yumi sanap long rot na tilim magasin, yumi mas tingim gut dispela samting.
MEKIM OL GOBEK NA BAIBEL-STADI
6 Taim yumi stap long haus bilong narapela man, yumi mas bihainim gutpela pasin Kristen. Em i singautim yumi i kam long haus bilong em, olsem na yumi mas tingim gut ol samting bilong em na yumi no ken mekim nabaut. Sapos yu makim taim bilong go bek lukim wanpela man o mekim Baibel-stadi wantaim em, yu mas i go lukim em long taim stret olsem yu makim pinis. Sapos pablisa i kisim pikinini bilong em i go wantaim em long Baibel-stadi, ol pikinini i mas bihainim gutpela pasin na ol i no ken mekim nabaut long ol samting bilong narapela man. Yumi mas was gut, nogut yumi pundaunim wanpela man.—2 Ko 6:3.
7 Sapos yumi bihainim gutpela pasin taim yumi autim tok, bai yumi litimapim nem bilong Jehova. ‘Wokabaut bilong yumi i mas stret na yumi bihainim gutnius.’—Fl 1:27.