Em i Save Pasim Yu Long Autim Tok?
1 Klostu olgeta manmeri i gat planti samting bilong mekim. Ol Witnes Bilong Jehova i gat planti wok tru bilong mekim—stadi long Baibel, go long ol miting bilong kongrigesen, na mekim wok autim tok. Na tu, yumi save mekim wok mani, wok bilong haus na bilong skul, na planti narapela wok, na bilong mekim olgeta dispela samting yumi mas lusim bikpela hap taim. Dispela i givim hatwok tru long ol het bilong famili.
2 Long planti hap i gat hevi bilong mani, olsem na ol het bilong famili i mas lusim planti aua long mekim wok mani, na wok strong long kisim mani inap long ol i ken lukautim famili. Taim wok mani i pinisim bikpela hap taim na strong bilong ol, ol i no gat bikpela hap taim bilong autim tok. Ol i gat wok bilong lukautim famili long samting bilong skin, olsem na sampela inap ting ol inap autim tok liklik taim tasol. (1 Ti. 5:8) Tru, long nau i hatwok long kisim ol samting bilong skin ol man i mas kisim. Tasol wok mani bilong yumi i no ken pasim yumi long autim gutnius. (Mk. 13:10) Olsem na yumi olgeta i mas skelim sindaun bilong yumi.
3 Ol samting bilong graun i save senis oltaim, olsem na het bilong famili inap ting em i mas bungim sampela mani bilong lukautim famili long taim bilong hevi, dispela inap mekim na em i lusim bikpela hap taim long mekim wok mani. (1 Ko. 7:31) Taim man i mekim sampela wok mani moa, em inap kisim sampela samting moa bilong skin o em inap painim sampela amamas moa. Tasol yu ting dispela bai mekim na famili i stap amamas na belgut moa sapos ol i kisim ol dispela samting, tasol ol i lusim sampela wok bilong spirit na ol i no go oltaim long ol miting? Yumi laik abrusim olgeta samting inap bagarapim yumi long ol samting bilong spirit. Em i savepasin long bihainim tok bilong Jisas na ‘bungim ol gutpela samting long heven’ na no ken “stap rabis long ai bilong God.”—Mt. 6:19-21; Lu. 12:15-21.
4 Painim Kingdom Pastaim: Jisas i lainim ol disaipel long putim ol samting bilong spirit i go pas long olgeta narapela samting. Em i tokim ol: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ ” Bilong wanem em i tok olsem? Em i tok: “Papa bilong yupela i stap long heven em i save pinis, yupela i mas kisim dispela olgeta kain samting.” Sapos yumi bilip tru long dispela tok, bai i no gat wanpela samting i pasim yumi long bihainim tok Jisas i mekim bihain long dispela. Olsem: “Namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu [bilong skin] long yupela.” God bai lukautim yumi na bai yumi no sot! (Mt. 6:31-33) Nau em i no taim bilong tingting planti long painim ol samting bilong skin, o painim gutpela sindaun long dispela taim nogut em klostu i laik pinis.—1 Pi. 5:7; 1 Jo. 2:15-17.
5 Nambawan as bilong mekim wok mani, em bilong lukautim yumi long ol samting bilong skin. Tasol yumi mas i gat planti samting o olsem wanem? Aposel Pol i tok: “Sapos yumi gat kaikai na laplap samting, orait yumi ken tok, ‘Em inap long mi.’ ” Olsem wanem? Yumi traim long kisim planti samting moa, winim kaikai na laplap samting? Sapos yumi mekim olsem, ol samting Pol i tok long en inap painim yumi. Em i tok: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta.” (1 Ti. 6:8, 9; Mt. 6:24; Lu. 14:33) Olsem wanem yumi inap save olsem laik bilong kisim planti samting bilong skin i pasim yumi?
6 Sapos wok mani bilong yumi i mekim na yumi lusim liklik hap taim tasol bilong autim tok, o yumi no lusim sampela laik bilong yumi yet bilong helpim wok bilong autim gutnius, orait yumi mas stretim tingting bilong yumi long ol samting i mas i stap namba wan. (Hi. 13:15, 16) Sapos yumi kisim ol samting inap tasol bilong helpim sindaun bilong yumi, dispela bai helpim yumi long rausim ol samting em inap stopim yumi long autim tok. Taim yumi laik givim taim na strong bilong yumi long mekim ol samting, ol wok bilong Kingdom i mas i stap namba wan samting yumi laik mekim.
7 Wok i No Save Lus Nating: Pol i kirapim yumi long ‘mekim wok bilong Bikpela, em dispela wok bai i no inap lus nating.’ (1 Ko. 15:58) Nambawan bikpela ‘wok bilong Bikpela’ em wok bilong autim tok bilong Kingdom na kamapim ol disaipel. (Mt. 24:14; 28:19, 20) Bilong wok strong tru long mekim wok autim tok, yumi mas makim taim bilong autim tok long olgeta wik na yumi no ken mekim narapela samting long dispela hap taim. (Ef. 5:15-17) Long dispela rot wok mani na ol sampela narapela samting tu i no ken pasim yumi long mekim wok autim tok.
8 Taim yumi givim yumi yet bilong autim tok i tru bilong Baibel long ol narapela man, yumi kisim bikpela amamas bilong man i save givim ol samting long narapela. (Ap. 20:35) Taim yumi autim tok bilong Kingdom, yumi ken wet long gutpela samting bai kamap bihain, long wanem, “God em i no man nogut, na bai em i lusim tingting long ol gutpela wok [yumi] i bin mekim.”—Hi. 6:10.